राम शेखर नकःमिया ‘सिमात फफ स्वः’ पितब्वज्या

११३८ चिल्लागा नवमी/ख्वप

राम शेखर नकःमि ग्वाहालि पुचःया ग्वसालय्  मदुम्ह हास्यब्यंग्य कलाकार राम शेखर नकःमिया कृति ‘सिमात फफ स्वः’ नेपालभाषा व खसभाषा निगूलिं भाषं छगू हे सफुतिइ बाखं मूनाःया पितब्वज्या जुल । मूपाँहा नेपालभाषा एकेदेमिया चान्सलर चित्तरञ्जन नेपालीं  सफू पितब्वज्या यानादीगु खः ।

किपा गुहाली नेवाः सूचना केन्द्र

साहित्यया विकास यायेत अनुवादया नं भूमिका दइगु खँ मूपाहाँ चित्तरञ्जनं कनादिल । थुगु सफू नेपालभाषं न्हापा नं पिदने धुंकूगु खः, तर खसभाषं अनुवाद यानाः निगुलिं भाषं निगूगु संस्करण कथं पिदंगु खः ।

मुँज्या नायः नरेन्द्र भक्त हाडां मदुम्ह साहित्यकार राम शेखर नकःमियात ग्वाहालि यायेत दयेकूगु ग्वाहालि पुचलं आः साहित्यिक व सांस्कृतिक योगदानया निति ज्या याइ धयादिल ।

किपा गुहाली नेवाः सूचना केन्द्र

उगु ज्याझ्वलय् पाहाँ कथं तिलक प्रसाद कायस्थ, आशा काजी थकू झायादीगु खः । ओम चरण अमात्य, त्रिरत्न शाक्य, गोविन्द मान श्रेष्ठ,ध्रुव मधिकःमि, अगिव बनेपाली, केवल प्रकास कायस्थ, कृष्ण प्रजापतिपिसं मंकाः कथं उगु सफूया भाय् हिलादीगु खः ।

किपा गुहाली नेवाः सूचना केन्द्र

न्वचू तयेगु झ्वलय् पाहाँ कथं झायादीम्ह मल्ल के सुन्दरं राम शेखर छम्ह कलाकार, साहित्यकार, निर्देशक जक मखु मार्कसिजमया आधारय् च्वइम्ह यथार्थवादी क्रान्तिकारी च्वमि नं खः धका धयादिल । ज्याझ्वलय् अन्य गन्यमान्य भाषासेवी व साहित्यकारपिनिगु नं सहभागिता दूगु खः ।

बुखँ व किपाः साभार नेवाः सूचना केन्द्र


Share this...
Share on Facebook
Facebook
Tweet about this on Twitter
Twitter

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.