रञ्जना लिपि स्यनेज्याः थ्वहे जेष्ठ १५ निसें

११३८ अनलाथ्व चतुर्दशी/येँ

थ्वहे वइगु जेष्ठ १५ गतेनिसेँ इतुंबहालय् लच्छियंक रञ्जना लिपि स्येनज्या न्हयाइगु जूगु दु । इतुम्बहाः सुधार समिति व येँ महानगरपालि २४ वडा समितिया मंकाः ग्वसालय् नेपाल भाषा प्रचलित लिपि स्यनेज्या समापनया ज्याझ्वलय् समितिया नायः मनोज शाक्यजु नुगः खँ तयेगु झ्वलय् थुगु सूचं बियादीगु खः ।

“झी पुर्खां झी नेवाः खयानं झीसँ थःगु मौलिक भाय् मसःगु हुनिं सकसितं थःगु मौलिक भाय् सयेकेगु ह्वता चू लायेमाः धैगु बिचाः यानाः वंगु लच्छि न्ह्यः नेपाल लिपि गुथिलिसें खँ ब्याकाः वय्कःपिनिगु गुहालीं हे प्रचलित नेपाल लिपि स्यनेज्या क्वचाकागु खः आः निगूगु चरण कथं रञ्जना लिपि स्यनेज्या जुइ” वय्कलं धयादिल ।

ज्याझ्वःया समापनय् वंगु लच्छि न्ह्यः नेपाल लिपि गुथिं न्हयाकूगु नेपाल भाषाः प्रचलित लिपि स्यनेज्याः ताःलापिन्त दसिपौ व मेडल इनेगु ज्या जूगु खः । नेपाल लिपि स्यनेज्या क्वचाय्काः जूगु जाँचय् प्रशिल शाक्य न्हाप, निलिम महर्जन ल्यू व सदिक्षा शाक्य लियांल्यु लाःगु खः । न्हाप, ल्यू व लियांल्यु लापिन्त मङ्गलादेवी लुँ–वह ज्या पसःपाखेँ ग्वाहालि जुगु वहःया तक्मा दोहलपा कथं ब्यूगु खः ।

लिपि स्यनेज्याःय् ताःलापिं फुक्कसित प्रदेश नं ३ या सभासद् राजेश शाक्य, २४ वडाया नायः बालकृष्ण श्रेष्ठ, नेपाल लिपि गुथिया नायः निरञ्जन ताम्राकारलगायत व्यक्तित्वपाखेँ दसिपौ, तक्मा व लिच्व पौँ देछायादिल ।

उगु ज्याझ्वलय् नेपाल लिपि गुथिया स्यनामि शरद कसाःजुयात इतुंबहाः सुधार समितिया नायः मनोज शाक्यं हनापौ व सकल ब्वमिपिनिगु पाखें बुद्धया मूर्ति लःल्हागु खः ।
अथेहे नेपाल लिपि स्यनेज्याय् विशेष ग्वाहालि यानादिपिं नेपाल लिपि गुथिया पुलाम्ह नायः प्रतापमान शाक्य, दुजःपिं पुष्परत्न ताम्राकार, लुमिन ताम्राकार व इतुंबहाः मिसा पुचःया नकीं भुवनहेरा शाक्ययात नं लुमन्ति चिं देछाया सम्मान यात ।

ज्याझ्वलय् सभासद् राजेश शाक्य, २४ वडाया नायः बालकृष्ण श्रेष्ठ, इतुम्बहाः सुधार समितिया सल्लाहकार भगवान शाक्य, नेपाल लिपि गुथिया नायः निरञ्जन ताम्राकारया लिसें स्यनामि शरद कसाःजुं नुगः खँ तयादिगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.