fbpx

येँया उपमेयर हरिप्रभाया लिसें मय्जुपिन्सं नं जनबहाः द्यः सालिगु

झीगु सम्वाददाता / ने सं ११३९ चाैलाथ्वः सप्तमी

येँया उपमयेर हरिप्रभा श्रेष्ठ खड्गीजुया लिसें मिसा पुचःया मय्जुपिन्सं नं न्हापांगु खुसिइ जमलं जनबहाः द्यः कन्हे सालिगु जुगु दु । न्हापालिपा जनबहाः द्यःया रथजात्रा मिजंतय्सं जक सालिगु यानावयाच्वंगु खः । येँया तःजिगुु जात्रा कथं हनावयाच्वंगु जनबहाःद्यः (सेतो मछिन्द्रनाथ) रथजात्राया तयारी पूवंगुया जानकारी बिइगु ज्याझ्वलय् पाहां मय्जु खड्गीजुं थ्व खँ न्ह्यथनादीगु खः ।

युवापुस्तायाके अझं नं थःगु तजिलजिया मतिना नुगलय् ल्यना च्वंगु दनिगु व उकियात थातं तयेत नं झीसँ मिजं पिन्त जक मखु मिसापिन्त नं उतिकं हे नापं यंकाः जिम्मेवारी बोध याके बिइफत धाःसा जक हे झीगु संस्कार, संस्कृति ल्यना च्वनीगु नुगः खँ वय्कलं प्वंकादिल । नापनापं येँया तःजिगु जनबहाः द्यःया जात्राया नितिं आर्थिक रुपं यायेमाःगु गुहाली सदां यानाच्वनेगु बचं बिसें नेपाःया परम्परागत तजिलजिनाप स्वानाच्वंगु हरेक ज्याखँय् महानगरपालिका नापं दइगु खँय् विश्वस्त यानादिल ।

जनबहाः द्यः रथजात्राया व्यवस्थापन समिति ११३९ या संयोजकया नापं जनबहाः द्यःया गुरुजु व २५ वडाया अध्यक्ष श्री नीलकाजी शाक्यजुं जनबहाः द्यःया रथ सालेत माःगु सकतां पूर्वाधार पूवने धुंकूगु जानकारी बिसें सकसितं थःगु मौलिक व परम्परागत जात्रायात व्यवस्थित व सभ्यया नापं भव्य यायेत इनाप यानादिल ।

किपा रेखा शाक्य
किपा रेखा शाक्य

श्री आर्यावलोकितेश्वरया रथयात्रां सकल मानवया सुख, समृद्धिया नापं देशय् भय, अकाल, महामारी, ल्वय्पाखें मुक्त जुइमाः धइगु अभिप्रायं थ्व जनबहाः द्यःया रथजात्रा कालान्तरनिसें न्ह्यानाच्वंगु खः धयादिल ।

थौं नेपाल पर्यटन बोर्डय् पत्रकार नापलायेगु झ्वलय् दँय्दसं न्हयाइगु जात्रायात विगत ११३३ निसें ११३८ तक थ्यंगु बखतय् यक्व हे जात्राय् सुधार याये धुनागु व व्यवस्थित व सहज रुपं जात्रा सम्पन्न जुइमाः धकाः थःपिन्सं सकसिगु गुहालि कयाः हे ज्या याना वयाच्वनागु खँ जात्रा व्यवस्थापनया सचिव सुजिव बज्राचार्यजुं कनादिल ।

जात्रायात व्यवस्थित, सभ्य, व भब्य कथं हनेत जनस्तरपाखें सकसिगु संलग्नताय् जात्रा व्यवस्थापन समिति हे दयेकागु खँ धाःसें थुगसि नेवाः ख्यःया गन्यमान्य पूर्व सांसदया लिसें अन्य गन्यमान्य व्यक्तित्वपिन्त जात्रा स्वयेत सहज जुइमाः धकाः त्रिचन्द्र कलेजया प्रांगण् मञ्च हे दयेकाः स्वकेगु व्यवस्था यानागु जानकारी बियादिल ।

नापं जात्राया जिम्मेवारीयात कयाः उमेश स्थापितया नेतृत्वय् आर्थिक उपसमिति, पञ्चनारायण महर्जनया संयोजकत्वय् सांस्कृतिक बाजागाजा, सत्यनारायण डंगोलया नेतृत्वय् रथ निर्माण निरीक्षण, मचाराजा महर्जनया नेतृत्वय् गुथि संस्थान समन्वय समिति, सुरक्षा निकायया जिम्मा डि एस पी बासुदेव खतिवडानाप समन्वय याना गणपतिलाल श्रेष्ठ, प्रचार प्रसारया जिम्मा राजीव राजोपाध्याय, घःमाः चुकू व्यवस्थापनय् नरेश महर्जन, संघसंस्थानाप समन्यवय यायेगुलि किरण यात जिम्मा बियागु जानकारी बियादिल । नापनापं जात्राया रुटय् लाःगु स्थानीय क्लब, संघसंस्था, सुरक्षा निकाय, ट्राफिक प्रहरी, नेपाल स्काउट, नेपाल रेडक्रस सोसाइटीया स्थानीय शाखात दक्वं तयारी अवस्थाय् दुगु खँया जानकारी बियादिल ।

किपा रेखा शाक्य

ल्याय्म्ह पुस्तायात कःघाना यंकेगुया लिसें युवापिन्त जिम्मेवारी बोध जुइकेगु हे वइगु दिनय् थुगु ज्या पुस्ता हस्तान्तरणया पलाः खः धयादिल । नापं दँय्दसं जात्रा व्यवस्थित यायेगु झ्वलय् छुं छुं ज्याखँय् परिमार्जित तकं यानाः जात्रायात सहज दयेकेगुलि नं जात्रा व्यवस्थापनं कुतः यानागु जानकारी बियादिल । उगु हे झ्वलय् थुगसि मिसापिन्त नं जनबहाः द्यःया रथ सालेगु लकस ब्वलंकाःगु धयादिल ।

अथेहे जात्राया बारे सकल धर्मालम्वीया नितिं धकाः जात्राया दिं व ईया जानकारी ब्यूसें सकसितं गुहाली यायेत इनाप यानादिल ।
जनबहाः द्यःया जात्रा दँय्दसं चौलाथ्व अष्टमी निसें दशमी स्वन्हु यंक येँया थी थी विशेष रुटय् जनबहाः द्यःया रथ सालेगु याइगु खः ।

कन्हे चौलाथ्व अष्टमी कुन्हु न्हापांगु दिं जुया सनिलय् जनबहालं द्यःयात चिधंगु खतय् तया जमलय् दयेका तःगु तःधंगु खतय् द्यः विराजमान याकिइ । अन लिपा शार्दुलगणया गुरुजु पल्टन पाखें तोप तयेवं रथयात तीनधारा पाठशाला, घण्टाघरया लँपु जुयालि रत्नपार्क, भोटाहिटीं साला असंभुलु अजिमाया लिक्क दुवातय् थ्यंका याः न्यायेकी । अथेहे राष्ट्रपतिपाखें द्यःया दर्शन बहनी १० बजेया ई क्वछिना तःगु दु ।
अथेहे बैशाख १ गते असनं हनुमान ध्वाखा कालभैरव सनिलय् ५ बजे, बैशाख २ गते हनुमानध्वाखां लगं तक सनिलय् ४ बजे । थ्वहे दिं कुन्हु मां सिमा छचा चाहुइकिगु व बैशाख ३ गते सनिलय् ल्यंदनिगु मां सिमा निचाः चाहुइकिगु अले बैशाख ४ गते सनिलया ६ बजे जनबहाः द्यःयात हाकनं चिधंगु खतय् बिज्याका जनबहालय् लसकुस याना बिज्याकेगु धलः सार्वजनिक याःगु खः ।

ज्याझ्वलय् येँ महानगरपालिकाया मेयर विद्या सुन्दर शाक्यं जनबहाः द्यः जात्राया लसताय् सकल नेपाःमियात भिंतुसें जात्रा भव्य यायेत सकसितं इनाप यानादिलसा मिसा पुचःया नानीहेरा महर्जनजुं मिसापिन्त ब्यूगु थुगु ह्वतायात कयाः सुभाय देछाया दिल ।

Leave a Reply

Your email address will not be published. Required fields are marked *