यूट्युबय नेवाः म्येया भ्यूज, व बजाः बिस्तारया सम्भावना

  • बिराजकाजी राजोपाध्याय

जमाना सामाजिक संजालया जुइधुंकल । न्हापा न्हापा जूसा छुं नं फिल्म स्वयेत कि हलय वनेमाल । मखुसा डिभिडि पिहांवयेकाः डिभिडि चाः न्याना हयाः अथवा बालं कयाहयाः स्वयेमाल । अथे हे, छुं म्ये स्वयेत टिभिइ क्यनीला धकाः पियाच्वनेगु बाहेक उगु म्येया डिभिडि चा: बजारय्‌ पिदनीला धकाः पीगु हे खः । तर आः मुक्कं हलिं छपा पाल्हातय न्ह्यःने धुंकल । छगः स्मार्ट फोन ल्हातय्‌ दत कि यूट्यूबय छु स्वयेगु, – ल्यत्तुल्यलं स्वयेदु ।

यूट्यूब – गुगलया भिज्यूअल संजाल । थुगु साइट दुने लखौं जक मखु, करोडौं हे भिडियोज दु । म्ये, संकिपा जक मखु, ट्राभलब्लग, मोटोब्लग, रोचक जानकारी, जीवनि लिसें निजी पार्टि अथवा छुं सेलेब्रेसनया भिडियो तकं दु । उलि जक मखु, भ्यूज अप्वः दयेकेगु ल्याखं म्वाःमदुगु, मखू मखूगु खँ ल्हानातःगु गफगाफं जाःगु भिडियो तकं दइ ।

गुलिसिया नितिं यूट्यूबय्‌ भिडियो अपलोड यानाः भ्यूज अप्वः मुंकेगु सौख जक नं जुइफु तर गुलिसिया लागिं थ्व लजगाः नं जुयाच्वंगु दु । थौंया दिनय्‌ वयाः यूट्यूबयात हे लजगाः दयेकाच्वंपिं नेपाःमि यूट्यूबरतय्‌गु ल्याः नं झनझन थहां वनाच्वंगु दु । यूट्यूबया मनिटाइज च्यानल दयेकाः उकी भिडियो दयेकाः अपलोड यायेगु अले उकीया भ्यूजया ल्याखं धेबा कमे यायेगु ज्या यानाच्वंपिं यूट्यूबरतय्‌गु ल्याः नेपालय्‌ नं न्हिथं थहां वनाच्वंगु दु ।

नेवाः कला ख्यलय्‌ नं यूट्युबया छ्यला अप्वया वनाच्वंगु दु । नेवाः म्ये यूट्यूबय्‌ शेयर यानाच्वंगु च्यानल मनिटाइज जुइगु च्यानल खः वा मखु, उकिया चर्चा आः मयाये । थन चर्चा यायेत्यनागु विषय यूट्युबय दुगु आपाः स्वःगु नेवाः म्येत छु छु खः ले, यूट्यूबय्‌ आपाः स्वःगु नेवाः म्येया खँ ल्हायेबलय्‌ छु म्ये गुलि स्वःगु खनेदु ले ?

हलिंया मेमेगु भाय्‌ वा देय्‌या भिडियोया खँ ल्हायेबलय यूट्यूबया भ्यूज रेकर्डया मिटर हे पुलाः स्वःगु म्ये धयागु ला ‘साइ’यागु गङनम स्टाइल हे खः । थुगु म्ये आःतक्कया दुने ३,०८,७२,६३,३८७ (३ अरब ८ करोड, ७२ लाख ६३ हजार, ३ सय ८७)क्वः स्वयेधुंकूगु दु । आः नेवाः म्येया भ्यूज थुकथं अरबया ल्याखय्‌ ला छु, करोडया ल्याखय्‌ थ्यनेत नं थाकुयाच्वंगु खनेदु । तर लाखया ल्याखय भ्यूज दुगु नेवाः म्येत धाःसा आपाः हे दु । थुगु च्वसुइ उकथंया हे नेवाः म्येया चर्चा याये ।

विषयवस्तुयात न्ह्यःने यंके व हे अरबौं भ्यूज थ्यंगु म्ये गङनम स्टाइलपाखें हे । थुगु म्येया नेवाः भर्सन नं पिदन । थौंकन्हय्‌ बुदिंया म्येपाखें चर्चाय दुम्ह म्येहालामि सुरजबीर बज्राचार्य थुकिया नेवाः भर्सन ग्यानपु स्टाइल नं दयेकल । ग्यानपु स्टाइलया भ्यूज नं नेवाः संगीत ख्यलय्‌ बांलाःगु हे खनेदत । अनिल महर्जनया च्यानलपाखें २०१२ या डिसेम्बरय्‌ अपलोड जुयाच्वंगु ग्यानपु स्टाइलया भ्यूज ३०द्वलं मयाक्क थ्यन । अरबौंया भ्यूजया खँ जुयाच्वंथाय ३०द्वः जक ला थें नं जुइफु । तर नेवाः संगीत ख्यलय्‌ थ्व नं बांलाःगु भ्यूज थें जुल उगु इलय्‌ । थुगु ग्यानपु स्टाइल म्ये राजेन्द्र खड्गीया नथिङ इम्पोसिबल संकिपाय्‌ नं तःगु खः । नथिङ इम्पोसिबल संकिपाया ग्यानपु स्टाइल म्ये यूट्यूबय्‌ २०१३ फेब्रुअरीइ अपलोड जुइधुंकाः १६द्वः धइथें भ्यूज दयेधुंकल ।

नेवाः म्येया भ्यूज धयागु छु थथे हे १५द्वः वा ३०द्वः जक हे खः ला ले सा ? थ्व स्वयां आपाः भ्यूज द हे मदुला ? छितः अथे तायाच्वंगु खःसा न्यनादिसँ, मखु । नेवाः म्येया भ्यूज लाख पूगु नं दु । ‘रुपेन थक्वाः’ नेवाः संकिपा ख्यलय्‌ लोकंव्हाःम्ह, नासलं लीम्ह हिसि दुम्ह कलाकार खः । वय्‌कलं ख्यालि म्ये नं हालादीगु दु व छपु म्ये ला अतिकं लोकं नं व्हाःगु खः । २०१६ अक्टोबरय हाइलाइट्स नेपाल च्यानलपाखें अपलोड जूगु ‘मुसुमुसु न्हिलाः छं हायेकः वयेमते’ धइगु रुपेनया म्येया भ्यूज थ्यंमथ्यं १ लखत्या धइथें थ्यनेधुंकल । थुगु म्येया सफलता धुंकाः रुपेनं दयेकूगु मेगु म्ये ‘थौंकन्हय्‌ जितः’ नं हाइलाइट्स नेपाल च्यानलं हे २०१७ अक्टोबरय्‌ अपलोड जूगु खः । थुकिया भ्यूज धाःसा ४द्वःतिया हाराहारीइ दु ।

सिरसाया हेकु म्ये ला नेवाः संगीत ख्यलय्‌ अतिकं लोकं व्हाःगु लोक म्ये खः । थुगु म्येयात यक्व हे म्येहालामिपिन्सं हालाः रेकर्ड याःगु दु । २०१५ नोभेम्बरय्‌ अपलोड यानातःगु सविता मालाकारं हालातःगु सिरसाया हेकु म्येया भ्यूज ला ४ लख पुलेधुंकल । अथे हे द ब्लाय्‌क हक धयागु ब्यान्डं रिमिक्स यानाः दयेकातःगु सिरसाया हेकु म्येया भ्यूज नं २ लखत्या स्वयां आपाः जुइधुंकल । थुगु म्ये २०१३ मे महिनाय्‌ अपलोड जूगु खः ।

मदनकृष्ण व हरिवंशया ख्यालि म्ये हरिमाया म्ये २०१७ अप्रिलय्‌ अपलोड जुइधुंकाः थुकिया भ्यूज ला ५ लखं च्वय्‌ थहां वनेधुंकल । ५ लखं च्वय्‌ भ्यूज थ्यनेधुंकूगु मेगु नेवाः म्ये धइगु आशिष्मा नकःमि व यमन श्रेष्ठं हालातःगु फिगर कोकाकोला नं खः । २०१५ अक्टोबरय अपलोड जूगु थुगु म्ये अधकट्टि संकिपायागु मेरो फिगर कोकाकोलाया नेवाः भर्सन खः । राजेश महर्जन व देविका वन्दनां हालातःगु ‘जिगु वैंश धाल छ ला ल्यासे जुयावल रे’ म्ये नं थौंकन्हय्‌ अतिकं लोकं व्हाः । थुगु म्ये २०१५ फेब्रुअरीइ अपलोड जुइधुंकाः आःतक्क ३ लखत्याम्हेसिनं धइथें स्वयेधुंकूगु दु । अथे हे २०१५ अगष्टय्‌ बज्र क्रिएशन च्यानलय्‌ अपलोड जूगु पानवती संकिपाया संजीप प्रधान व दिपा श्रेष्ठं हालातःगु व छु गल्ली म्येया भ्यूज ३ लख पुलेधुंकल ।

छगू लखं वा छगू लखत्यां मयाक्क स्वःगु म्येत यक्व हे दु । २०१७ फेब्रुअरीइ अपलोड जूगु भीमप्रसाद प्रजापति व सानुमैयाँ ताम्राकारं हालातःगु हाइ हाइ रे कान्छि मय्‌जु, २०१३ अगष्टय्‌ अपलोड जूगु कविता जोशीं हालातःगु ए दाइचा छ ला साप झंगः खनी, २०१५ अगष्टय्‌ अपलोड जूगु रवि भोमिं हालातःगु ताहा मचा, २०१५ फेब्रुअरीइ अपलोड जूगु द ब्लाय्‌क हकया अबिरया होलि, २००७ डिसेम्बरय्‌ मेरो सेरोफेरो च्यानलपाखें अपलोड जूगु सपनी श्रीं हालातःगु स्वयेगु मन जुल रे, २००८ अक्टोबरय्‌ श्रेष्ठपवन च्यानलपाखें अपलोड जूगु रमेश ताम्राकार व जुनु श्रेष्ठं हालातःगु ’स्वये धकाः स्वइगु मखु‘ म्येत १ लख स्वयां आपाः भ्यूज दयेधुंकूगु म्ये खः । थुगु म्ये दुने गुगुं म्येत २ लखया न्ह्यःने तक्क नं थ्यनेधुंकूगु दु ।

भ्यूअरसीपया ल्याखं स्वयेबलय्‌ यूट्युबय नेवाः म्येया भ्यूज बांलाःगु हे ल्याखय्‌ खनेदु । च्वय्‌ न्ह्यथनागु बाहेक अझ हे नं बांलाःगु भ्यूज दुगु मेगु म्येत दनि । तर उगु म्येत दक्वं हे मनिटाइज जुइगु च्यानलपाखें अपलोड जुयाच्वंगु नं मखु । गुगुं मनिटाइज जुइगु खःसा गुगुं फ्रि च्यानल खः । यदि यूट्युबयात नेवाः संगीतकःमिपिन्सं व्यावसायिक ल्याखं हे छ्यले फःसा थुकिं नं छुं ग्वाहालि जुइगु हे खनेदु । मनिटाइज जुइगु च्यानलपाखें नेवाः म्येत अपलोड यानाः थुकीयात नं व्यावसायिक दयेका यंकेफःसा नेवाः संगीत ख्यःयात अझ तब्याका यंकेफइगु हे खनेदु । आः यूट्यूबय्‌ सितिकं स्वयेगु त्वःताः सुनां सिडि न्याइ धयाच्वनेमाःगु आवश्यकता दइमखु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.