यलय् चर्या नृत्य सम्बन्धि कार्याशाला गोष्ठीया समापन

११३८ बछलाथ्व पंचमी/यल

झीगु संवाददाता

वंगु २०७५ बैशाख २ गतेनिसें ५न्हू तक न्ह्याःगु यलय् चर्या नृत्य सम्बन्धि कार्याशाला गोष्ठीया समापन म्हिगः छगू ज्याझ्वःया दथुइ क्वचायेकल । ज्याझ्वलय् लसकुस यासें केन्द्रीय न्वकू संजय शर्मा राजोपाध्यजुं चर्या नृत्य सयेकेगु चाहना सकसिगु दुगु खःसां मिसापिनिगु नितिं जक पद्मकन्या कलेजय् दुगु व मिजंतयेगु नितिं मदुगु हुनिंयानाः थुकथंया मिसा मिजं सकसितं चर्या नृत्यया ज्ञान बिइगु तातुना नेपालय् हे दकलय् न्हापांगु खुसिइ अक्षेश्वर महाविहारय् कार्याशाला गोष्ठी यानागु खँ धयादिल ।

किपा-रेखा शाक्य

नेपाःया मौलिक परम्परागत चर्या नृत्यया थःगु हे मौलिकपन दुगु हुनिं थुकियात न्हू पुस्तायात हस्तान्तरण यायेमाःगु थौंया आवश्यकता खः धाःसें न्हापा न्हापा थुकियात सार्वजनिक रुपय् न्ह्यब्वयेगु मयाःगु खँ नं लुमंकादिल ।

अथेहे चर्या नृत्यया प्रशिक्षक प्रज्वल बज्राचार्यजुं थःम्ह ३० दँ न्हयःनिसें याना वयागु अध्ययन व थःम्ह थुकथं प्याखं हुलावयागु बारे अनुभव कनादिसें नेपालय् हे न्हापांगु खुसिया कार्याशाला गोष्ठीइ थःगु सक्रिय भूमिकाय् न्हूगु पुस्तायात स्यनेकने याये खंगु थःगु हे थासय् महत्वपूर्ण जुगु धयादिल । लिसें वय्कलं थः अबु व थःम्ह थी थी द्यःयात स्मरणयाना हुलेगु चर्या नृत्य उम्ह हे द्यः दुगु थासय् द्यःया भेषभुषा पुनाः हुला तयागु डिभिडी नं सकसिगु नितिं सयेकेगुया छगू बांलागु माध्यम जुइगु धाःसें केन्द्रीय संघयात लःल्हानादिगु खः ।

उगु ज्याझ्वःया मू पाहाँ कथं झायादीम्ह यल महानगरपालिका १६ वडाया वडा अध्यक्ष निर्मल रत्न शाक्यजुं कार्याशाला गोष्ठीइ ब्वति कयादीपिन्त दसि पौ लःल्हानादिसें चर्या नृत्य तःतधंगु पुजाय् स्वयेमज्यू धकाः गुरुजुपिन्सं जक द्यःया स्तुतियानाः हुलेगु प्याखंयात सकसिगु नितिं प्रेरणादायी जुइगु कथं स्यनेगु ज्यायात च्वछायादिल । नापं नेपाःया मौलिक परम्परागत प्याखंयात ल्यंका तयेत महानगरपालिकां गुहालीयात सदां न्ह्यचिलेगु प्रतिबद्धता प्वंकादिसें पर्यटन व संस्कृतिया संरक्षण शाखा नं चायेके त्यनागु खँ कनादिल ।

किपा-रेखा शाक्य

ज्याझ्वलय् ब्वतिकयादिम्ह प्रशिक्षार्थी दिपेश शाही ठकुरीं थःम्ह थी थी नृत्यया तालिम कयाः मेपिन्त नं स्यनागु धाःसें चर्या नृत्यया बारे थःम्ह गबलें मस्यूगु खँ सयेकेगु ह्वताः ५न्हू तकया चर्या नृत्य कार्याशाला गोष्ठी वयाः ज्ञान कयागु अनुभव प्वंकादिल । ज्याझ्वलय् रीताजुं चर्या नृत्य नं न्ह्यब्वःगु खः ।

किपा-रेखा शाक्य

नुगः खँ तयेगु झ्वलय् नृत्य निर्देशक संघ नेपालया केन्द्रीय अध्यक्ष भुवनदास श्रेष्ठजुं नृत्यया थःगु हे भाव भंगिमा दइगु व हरेक नृत्यया महत्व दुगु खँ धाःसें थुगु गोष्ठी ब्वति कयादिपिन्त थःम्ह सयेकागु ज्ञानयात हलिं न्यंक प्रचार प्रसार यायेत इनाप यानादिल । अथेहे अक्षेश्वर महाविहार संगठन समितिया अध्यक्ष राजेश शाक्यजुं महाविहार केवल शाक्य व बज्राचार्य वर्गयात जक मखसें हरेक जाति जनजातिया नितिं नं थुगु थाय्या मू लुखा सदां चालाच्वंगु दइ धाःसें आगामि दिनय् नं थज्यागु बांलागु ज्याये सहभागिता बिइत तयार दुगु खँ धयादिल ।

ज्याझ्वलय् नृत्य निर्देशक संघया दुजःपिनिगु नं उपस्थिति दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: