यलय् चर्या गुरु पद्मराज बज्राचार्य (माहिला गुरुजु) सम्मानित

११३८ बछलागा  दुतीया/येँ

सभासद् कृष्णलाल महर्जनं आः नेपालय् नं अन्तर्राष्ट्रि नृत्य दिवसयात तःजिक हनेगु याःगुलिइ लसता प्वंकुसें थज्याःगु ज्याझ्वलं देशय् सुलाच्वंपिं प्रतिभा पिब्वयेत दबू चूलाःगु खँ तयादिल । कला व कलाकारीत क्षेत्रया विकासया लागिं थम्हं फुगु ग्वाहालि यायेगु प्रतिवद्धता नं महर्जनं प्वंकादिल । अन्तर्राष्ट्रिय नृत्य दिवसया अवसर लाकाः वंगु अाइतबाः चतुदर्शी कुन्हु यलय् चर्या गुरु पद्मराज बज्राचार्य (माहिला गुरुजु)यात सम्मानित याःगु ज्याझ्वलय् वय्कलं नुगः खँ प्वंकादीगु खः ।

अन्तर्राष्ट्रिय नृत्य दिवस अप्रिल २९ या लसता दिवस हनेगु झ्वलय् नृत्य निर्देशक संघ नेपाल, यल कचां यलया केशव नारायण चुक, लाय्कू मंगलय् छगू ज्याझ्वःया ग्वसाःयागु खः । सम्मानित बज्राचार्ययात सम्मान यायेगु झ्वलय् संघया केन्द्रीय न्वकू संजय शर्मा राजोपाध्यायं ह्याउँसिन्हः तिकादिलसा केन्द्रीय नायः भुवनदास श्रेष्ठं स्वांमाः क्वखायेकादिल । परम्परागत व सांस्कृतिक रुपं सम्मान यायेगु झ्वलय् यल कचा नायः स्वजन रघुवंशीं बेतालिं चिकादिल । अथे हे, प्रदेश ३ यल क्षेत्र नम्बर २ पाखें प्रतिनिधि सभाय् निर्वाचित सभासद् कृष्णलाल महर्जनं दोसल्लां न्ययेकाः हनापौ लःल्हानादिल । सम्मानित जुइधुंकाः बज्राचार्यं थुगु सम्मानं थःत तःधंगु हःपाः ब्यूगु धयादिल ।

संघया केन्द्रीय न्वकूसंजय शर्मा राजोपाध्याययं नृत्ययात पाठ्यक्रमय् हे दुथ्याकाः शैक्षिक स्तरं हे थुकिया बिकास याना यंकेमाःगु बिचाः तयादिल । कलाकार देय्या तिसा मखसें राज्यया न्यागूगु अंग हे खःगु राजोपाध्यायं लिसा कयादिल ।

सभासद् महर्जनं त्वाःदेवाय् मत च्याकाः उलेज्या जूगु ज्याझ्वलय् कचाया छ्यान्जे अनुप शाक्यं लसकुस यासें कचापाखें न्हापा जूगु उद्घोषण तालीम, चर्या नृत्य कार्यशाला गोष्ठी थुज्वःगु ज्याझ्वःया बारे जानकारी बियादिल । अथे हे छ्यान्जे शाक्यं वइगु जेठया निगूगु वालय् कचा नायः स्वजन रघुबंशीया याकः सनिल व जेठया लिपांगु वालय् नेवाः ताल पद्धतिया कार्यशाला यायेगु योजना दुगु खँ धयादिल ।

ज्याझ्वलय् हिपहप, जुम्बालिसेंया पाश्चात्य हुलाप्याखंया लिसें चर्या, कत्थक, कौडा, झ्याउरेलिसेंया हुलाप्याखंत नं न्ह्यब्वःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.