यलया विपद व्यवस्थापन तालिम कुरिन्टारय्

११३८ चिल्लागा षष्ठी/कुरिन्टार

यल महानगरपालिका अन्तर्गत विपद व्यवस्थापन समितिया ग्वसालय् ४०म्हेसिया विपद व्यवस्थापन टोली विशेष तालिमया लागिं चितवनया कुरिन्टार थ्यंगु दु ।

यल महानगरया १६गू वडापाखें ल्यःपिं ल्यायम्हतयगु पुचः ४न्हुया बन्द शिविर तालीमया लागिं चितवन कुरिन्टार थ्यंगु खः । कुरिन्टारय् सशस्त्र प्रहरी बल, नेपाल विपद व्यवस्थापन तालिम केन्द्रया समानुदेशक प्रहरी वरिष्ठ उपरिक्षक ई.प्रजाभक्त श्रेष्ठं लसकुस यानादिल ।

‘महानगरपालिकाया आज्जु व समुदायया परिस्थितिबारे अन्तर्क्रिया यानाः आवश्यकता कथं परिमार्जित तालिम बीत निर्देशन बियागु दु ।’ लसकुस यासें ई. श्रेष्ठं धयादिल ।

यल महानगरपालिका १६ वडां तालिमया संयोजनया भूमिका काःगु दु । ‘१६ वडाया संयोजनय् मेगु वडाया ब्वतिमिपिन्त नं समुदायस्तरय् हे थप व्यवस्थित याये फयेमा धकाः तालिमया ग्वसाः ग्वयागु खः’ तालिम कजि लिसें १६ वडाअध्यक्ष निर्मलरत्न शाक्यं धयादिल ।

भुखाय् लिसें छुं नं कथंया विपद व्यवस्थापनया पूर्वतयारी व्यवस्थित यायेगु आज्जुं तालीम जूगु १६ वडा विपद व्यवस्थापन समितिया सचिव दिलिप जोशीं धयादिल ।

न्हापांगु चरणया तालिम अन्तर्गत १ निसें १६ वडाया ब्वतिमिपिन्त आव्हान याःगुलिइ ११गू वडाया ४०म्हेसिनं तालिमय् ब्वति काःगु दु । तालिमय् १७दँनिसें ४०दँ तक्कयापिनिगु ब्वति दु ।

न्हापांगु चरणया तालिमया उलेज्या बिहिबाः कुरिन्टार् तालिम केन्द्रया समानुदेशक प्रहरी वरिष्ठ उपरिक्षक ई.प्रजाभक्त श्रेष्ठपाखें जुइगु धाःगु दुसा आइतबाः यल महानगरपालिकाया मेयर चिरिबाबु महर्जनया उपस्थितिमा समापन ज्याझ्वः जुइगु ग्वसाः खलकं जानकारी ब्यूगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.