यलया नरसिंह जात्रा वंगु शुक्रवाः क्वचाल 


११३८ गुँला गाः सप्तमी/यल

वंगु शुत्रवाः यलय् दँय्दसं थें भाद्र कृष्ण पञ्चमीया दिनस हनिगु प्राचीन ” उपाकलं सायाः नरसिंह जात्रा “ तःजिक सम्पन्न जुल । यलया राजोपाध्याय ब्राम्हणपिनिगु उपाकर्म गुठीया थकालीया ल्याखं पट्कोया निवासी ध्रुव ज्वालानन्द शुक्ल राजोपाध्यायया पाः कथं थुगु जात्रा सम्पन्न जूगु खः ।

थुगु जात्राय् पाःलाया पुरोहित, जिलाजं वा भिन्चा मध्ये छम्हसित नरसिंह दयेकेमाःगु परम्परा कथं ध्रुव ज्वालानन्द राजोपाध्यायया जिलाजं ख्वपया खौमाटोल निवासी मनिन्द्रराज राजोपाध्याययात नरसिंह दयेकाः यलया सायाः लँपुइ परिक्रमा याकुगु खः । नरसिंहया लिसें उगु जात्राय् न्याम्ह जोडि अप्सरा, लक्ष्मी, सरस्वती व प्रह्लादया लिसें नगर परिक्रमा याकेगु चलन दु ।

थुगु जात्राया प्राचीनता बारे स्पष्ट तथ्य छुं मदुगु विज्ञपिनिगु धापू दु । स्थानीय संस्कृतिविद् या लिसें नृसिंह जात्रा विज्ञ हेरम्बानन्द राजोपाध्याजुं थुगु जात्राया ३८७ दँ तकया प्रमाण लुइधुंकुगु खँ धयादीगु दु । । मल्लकालय् राजकिय सम्मान तकं चूलागु थ्व जात्रा मल्लकालसिबें न्ह्यः हे न्ह्याये धुंकूगु खःसां उकिया ऐतिहासिक प्रमाणत इतिहासया गर्भय् वा विभिन्न घटनाय् ल्हाना वंगु वा ल्हाका छ्वःगु खँ उपाकर्म गुठी यलया धापू दु ।

यल नगरय् नरसिंहया निगू रुप विराजमान जुयाच्वंगु दु । कार्तिक नाचया नरसिंहयात उग्र रुपया व उपाकलं सायाःया नरसिंहयात शान्त रुपकथं कायेगु याः । विश्व शान्तिया कामना सहित हनिगु थुगु जात्रा न्ह्याइपुक सम्पन्न जुलधाःसा दैवी प्रकोपया लिसें अन्य घटना, दुर्घटनापाखें मुक्ति दइगु , ल्वचं मकःइगु जनविश्वास समाजय् दु ।

जात्राय् धिमेय्, भजन समूहया लिसें लाखे नं नगर परिक्रमा याःगु खः ।

बुखँ विराजकाजी राजाेपाध्याय 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.