यलया ऐतिहासिक कात्तिक प्याखं काति दबलिइ न्ह्यानाच्वन

ने. सं. ११३९ कछलाथ्व अष्टमी  बिहिबाः

रेखा शाक्य

यलया ऐतिहासिक कात्तिक प्याखं   न्हिथं न्ह्यानाच्वंगु दु । ३७८ दँ पुलांगु धयातःगु थ्व प्याखं जुजु सिद्धिनरसिंह मल्लं न्ह्याकाथकुगु धइगु खँ इतिहासय् उल्लेख दु । व हे प्याखं यलया लाय्कूया दबलिइ वंगु कछलाथ्व पंचमी अर्थात २६ गते सोमबाःनिसें आः वइगु मंसीर ७ गते शुक्रबाः तक न्ह्याइगु जुगु दुगु दु ।

किपाः रेखा शाक्य

प्याखंया न्हापांगु न्हि कुन्हु बाथः प्याखं अन्तर्गत ‘लेवः लायेगु’ क्यंगु खःसा निन्हुया न्हि कुन्हु “खुसि छिकेगु” , स्वन्हुया न्हि कुन्हु “उषाहरण लिला वाणासुरयात सहश्रभुज वरदान” या प्याखं क्यंगुु खः । थौं प्यन्हूया न्हि कुन्हु “उषा अनिरुद्र श्रृंगार” क्यनीगु जुइ । अथहे कन्हेनिसें छसिकथं “देवी प्याखं”, “युद्ध कला”, “वाणासुरया सहश्रभुज त्वाल्हाइगु”, “जल शयण- मुध- कैटव वध”, “वराह अवतार- हिरण्याक्ष वध”, “नृसिंह अवतार- हिरण्यकश्यपु वध”, “वस्त्रहरण लिला”, “दधि लिला” (धौ गोप तछ्याय्गु) क्यना थुुगसिया कार्तिक प्याखं क्वचायेकेगु धाःगु दु ।

किपाः रेखा शाक्य

जुजु सिद्धिनरसिंह मल्लंं न्ह्याकाथकुगु थ्व प्याखं हलिंया दकलय् ताःहाकगु नाट्य परम्पराया कथं कायेगु याः । सिद्धिनरसिंह मल्लं कृष्णलीलाय् आधारित प्याखंयात न्ह्याकाः छवाः तक क्यनेगु यानाथकुगुयात वया काय् श्रीनिवास मल्लं लोक नाटकत थप यानाः १५ न्हू थ्यंकूगु नं धाइ ।

किपाः रेखा शाक्य

अथेहे श्रीनिवास मल्लया काय् योगनरेन्द्र मल्लं शास्त्रीय नाचत थप यानाः हाकनं लच्छि तक थ्व प्याखं क्यनेगु परम्परा न्ह्याकुगु नं इतिहासय् उल्लेख दु । लिपा प्याखं क्यनेत आर्थिक अभाव जूगु हुनिं थ्व प्याखं निन्हुं हे सिधयेकुगु नं खनेदु । न्हापा न्ह्यागु हे जुसां आः धाःसा १२ न्हु तक हे क्यनेगु यानाच्वंगु दु ।

किपाः रेखा शाक्य

कार्तिक नाच संरक्षण समितिं न्हापाया परम्परा कथं हे लच्छि तक न्ह्याकेगु तातुंगु खःसां कार्तिक नाच ब्यबस्थापन समितिं थुगसि धाःसा व पूमवनिगु धाःगु दु । शिक्षामूलक जुइगु कार्तिक प्याखं क्यनेत कलाकार व वाद्यवादक यानाः थ्यमथ्यं १०० म्ह ब्वति काइगु समितिया नायः किरण चित्रकारं कनादिगु दु ।

किपाः रेखा शाक्य

https://www.facebook.com/rajendra.manandhar.7906

प्याखनय् दक्वं भूमिकाय् राजोउपाध्या ,जोशी ,चित्रकार ,श्रेष्ठ लगाएत दक्वं नेवाः समुदायं म्हितिगु खः ।  वंगु आइतबाः मंगलबजार दरवार लागाया दुने च्वंगु नासः चुकय् नात्येश्वरया विधिवत पुजा सम्पन्न याःगु खः । प्याख‌ं  न्हियान्हिथ‌ं बहनीसिया ७ बजे शुरु जुइ ।

किपाः रेखा शाक्य

 

किपाः रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.