यचुसे च्वंका ख्वालय् चमक पिकायेत घरेलु उपाय


थौंकन्हे मनूतय् नयेगु, त्वनेगु, पुनेगु नापं बांलाकेगु धइगु तसकं यः । मनू धैम्ह नुगलं बांलाय्माः, ख्वालं मखु धाःसा नं मिसा जुइमा वा मिजं बांलाकेगु जुलकि छुं नं कसर त्वःतीमखु । थिकेगु क्रिम नापं हरेक कथंया घरेलु नसात छ्यलाः थःयात बांलाकेगु कुतः याना हे च्वनी । अथे यानाः नं गुलिसियां धाःसा ख्वालय् ग्लो (चमक) मवयाच्वंगु जुइफु । ख्वालय् चमक मवयाच्वंगु जूसा थन छुं भचा टिप्स न्ह्यथनागु दु । थुगु टिप्सपाखें ख्वाः यचुसेच्वंकाः ख्वालय चमक नं पिकायेत तसकं हे ग्वहालि याइ ।

यचुसेच्वंकाः ख्वालय् चमक पिकाइगु टिप्स

१. बेसन, चंदन, हलु व दुरुया फेस प्याक

थुकिया नितिं २ गू चम्चा बेसनय् भतीचा चंदन पाउडर, छगू चिम्ति हलू अले भतिचा दुरु कायेगु । थुपिं फुकंया बांलाक पेस्ट दयेकाः ख्वालय् पायेगु । १ घन्टा लिपा ख्वाउँसेच्वंगु लखं ख्वाः सिलेगु । थुगु फेस प्याकय् दुरुया पलेसा लः वा गुलाफ जल नं छ्यले फइ ।

२. मुसू

खास यानाः मुसू केँ दयेकेत छ्यलेगु याइ । अथे जुसा नं मुसू ख्वालय् चमक हयेत नं छ्यलेफइ । मुसू केँपाखें ग्लो स्किनया नितिं न्हापा मुसू केँया पेस्ट दयेकेगु, अले उगु पेस्टय् छुं भतिचा कस्ति ल्वाकछ्यायेगु । उगु पेस्ट ख्वालय् २०/३० मिनेट पायेधुंकाः ख्वाउँसेच्वंगु लखं ख्वाः सिलेगु ।

३. कागती

ख्वाः तुयुकेगु नापं चमक पिकायेगुनितिं कागतीया खोला तसकं हे लाभदायक जु । कागतीया रस चिकुलां ख्वालय् बुलेमज्यू । अथे खःसां कागतीया खोला धाःसा ज्यू । हरेक दिन ख्वालय् कागतीया खोलां हल्का कथं बुलेगु अले छुं ईलिपा ख्वाः सिलेगु यायेगु । थथे नियमित कथं यात धाःसा ख्वाः तुयुसे यचुसे च्वनी नापं ख्वालय् चमक नं दइ ।

४. गोलभेडा

गोलभेडा नयेगु नापनापं ख्वाःयात चम्के यायेगु नितिं तसकं हे ज्याखलय् जू । गोलभेडाया पेस्टय् कस्ति व चिनि ल्वाक छ्यानाः ख्वालय् पायेगु अले बाघौ लिपा ख्वाः सिलेगु । थथे नियमित यात धाःसा छुं न्हिलिपा हे ख्वाःया रंगय् ह्यूपाः वयाः यचुसे तुयुसे च्वनी ।

५. धौ

धौ नयेगुया नापं बांलाकेगुली नं तसकं हे ज्याखलय् जू । ख्वालय् धौ बुलेगु अले छुं ई लिपा लखं सिलेगु । नियमित कथं थथे यात धाःसा ख्वालय् चमक हयेत तसकं हे ग्वहालि याइ ।

६. मेवा

मेवाय् यक्व हे भिटामिनत दइ । व हे जुयाः ख्वालय् चमक हयेत नं मेवां तसकं हे ग्वहालि याइ । व हे जुयाः ख्वालय् चमक पिकायेत पाकेजूगु मेवाया पेस्ट दयेकाः पायेगु । पेस्टयात ख्वालय् छुं ईतक अथें हे तयाः लिपा लखं सिलेगु । छगू हप्ताय् निकः वा स्वकः थथे मेवाया पेस्ट ख्वालय् पायेगु यात धाःसा ख्वाःया चमक बुलुहुँ बुलुहुँ अप्वयावइ ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.