मोहनिया लसताय् दिपकया वरपर पिदन

ने‍ स‌ं ११३८ काैलाथ्वः पंचमी

झीगु सम्वाददाता

म्येहालामि दिपक बज्राचार्यं मोहनिया लसताय् थःगु न्हूगु म्ये ‘वरपर’ पिथनादीगु दु । मोहनिया लकस क्यनातःगु म्येया म्यूजिक भिडियो दिपकं मोहनिया लसताय् थः फाय्नपिनिगु नितिं देछा कथं सार्वजनिक यानादीगु खः ।

म्येहालामि बज्राचार्यया हे सःलिसें लय् दुगु म्येया म्येग्वः वय्कःया हे रिदम ब्यान्डया रिकि शाक्यं च्वयादीगु दु । म्यूजिक अरेंज रिदम ब्यान्डयागु खः । म्येया भिडियोलय् नम्रता श्रेष्ठं अभिनय यानादीगु दुसा छायाङ्ककन सुगत व आदित्ययागु खः । दृश्य सम्पादनलिसें निर्देशन अनुप पौडेलं यानादीगु दु ।

लिपांगु इलय् पप शैलीया म्येय् मौलिक नेपाली लोक बाजंया फ्यूजन यायेगु यानाच्वंम्ह म्येहालामि दिपकं थुगु म्येय् नं उगु प्रयोगयात त्वःतादीगु मदुनि । थुगु म्येय् वय्कलं सारङ्गी लिसेंया नेपाली बाजंत छ्यलादीगु दु । थुगु म्येया मेगु न्हूगु खँ धइगु थुकिया ताल खः । म्येहालामि दिपकं कापः थायेगु तानं बीगु तालय् थुगु म्ये दयेकादीगु दु ।

भिडियोलय् तानय् कापः थानाच्वंगु लुलिसें मोहनिया हे लकस क्यनातःगु दु । पासापिं, थःथितिपिं मुनाः मोहनिया लसता हनाच्वंगु लुलिसें म्येया शुरुवातय् हे धुम्रपान, मध्यपान वा जुवातासयात हःपाः बीगु मखसें सीमा दुने च्वनाः नखः हने धइगु हसना बी वय्कलं ल्वःमंकामदी ।

‘हरेक म्येय् छुं न्हूगु बी धइगु बिचाः ज्वनाः ज्या यायेगु खः । थुगु म्येय् जिं कापः थायेगु तानया सलं बीगु तालयात बः कयागु दु’ दिपकं धयादिल, ‘जि व जिगु टिमं फक्व मेहनत यानागु दु । स्वकुमि, न्यनामिं नं ययेकादी धइगु आश दु ।’

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: