“मेरो काठमाडौंः हाम्रो काठमाडौं” सफूया उलेज्या

११३८ तछला थ्व चाैथी/येँ

झीगु संवाददाता

म्हिगः शनिबाः छगू ज्याझ्वःया दथुइ भाजु नेमसिंह नकःमिया “मेरो काठमाडौंः हाम्रो काठमाडौं” सफूया उलेज्या जुल ।

किपाः रेखा शाक्य

भाषासेवी नरेशवीर शाक्यया सभानायःसुइ न्ह्याःगु ज्याझ्वलय् मू पाहाँ येँ महानगरपालिकाया उपप्रमुख हरीप्रभा खड्गी श्रेष्ठजुं विधिवत रुपं त्वाः देवाय् मतः च्याके धुंकाः सफूया उलेज्या यानादीगु खः ।

किपाः रेखा शाक्य

सभायात लसकुस यासें सभानायः शाक्यं धयादिल – झी यैँया स्थानीयवासी, झी सकलें झीगु भाषा संस्कार व संस्कृति व सम्दापह्यमिपिं खः तर थौं कन्हे झी सकलें थ्वहे पाखें विमुख जुजुं वनाच्वंगु अवस्थाय् दु । उकिं गबले तक झीसँ झीगु भाषा, कला, सम्पदा, संस्कार धर्म व परम्परायात म्वाकाः तयेगुलिइ जागृत जुइ मखु, झी नेवाः धइगु पहिचान ल्य‌ंकाः माः धकाः थ्व खँय् गौरव यायेसइ मखु उबले तक झी झी जुयाया औचित्य ल्यनीमखु । उकिं थौंकन्हेया पुस्तायात नेवाः धइगु छु अले झी धइपिं सु धकाः वने धुंकूगु ईयात हाकनं लुमंकाबिइगु तातुनां च्वयातःगु थुगु नेपालीभाषाया सफूयात प्रकाशकया जिम्मा कयाः प्रकाशन यानागु खँ खुलस्त यानादिल ।

अथेहे मू पाहाँ खड्गीजुं नेपाःया सम्पदा हे देशया गौरव खः, थ्व खँयात झीसँ गबलें ल्वमंके मज्यू, थनया हरेक देगः फल्चां नेवाः संस्कृतियात ब्वयाच्वंगु दु, जात्रापर्व, परम्परां यानाः हे हलिमं निसें विदेशीत झीगु संस्कार, सम्पदा धरोहर स्वयेत वइगु खः । उकिं उकियात ल्यंकातयेत नं झीसँ झी पुर्खां थापना याना थकुगु धरोहरयात ल्यंकातयेत छप्पं छधी जुइमाः । थौं स्वनिगःया आपालं नेवाः बस्ती धरापय् लानाच्वंगु इलय् विकास नामय् विस्तारया ज्यां नेवाःत मर्कालानाच्वंगु खँयात न्ह्यथनादिल लिसें थःगु सम्पदा व संस्कृतियात म्वाकातयेत सदां नापं दइगु खँय् प्रतिबद्धता प्वंकादिल ।

 

किपाः रेखा शाक्य

सफूया बारे न्ववायेगु झ्वलय् च्वमिं थुगु सफूतिइ स्वनिगःया वर्तमान चिन्तन व चेतनायात बारे च्वयागु खँ धयादिल । थुगु सफुतिइ दुथ्याःगु खँय् छकः सकल ब्वनामिपिन्सं चिन्तन मननयानाः जागृत जुइत इनाप यानादिल । अथेहे नेवाः देय् दबूया नायः नरेश ताम्राकारजुं न‌ं थुगु सफुतिइ न्हापाया व अाःया अवस्थायात कया च्वमि गुगु च्यूता प्वंकादिल व तसकं हे सान्दर्भिक जूगु व कमसे कम थुगु नेपालीभाषां पिथनादिगु सफूयात नेवाःभाय् मसःपिं थाैकन्हेया न्हूपिं युवा पुस्तां ब्वनेगु ह्वता चूलाकेमाःगु खँय् बः बियादिल ताकि झीगु पहिचान धइगु छु व थाै‌ंकन्हे थुकिया हबिगत गथे जुयाच्वन व वइगु दिनय् गुकथं पलाः न्ह्याकेमाः धइगु शिक्षा कायेत थ्व सफू लिधँसा जुइ धयादिल ।

अथेहे मेम्ह पाँहा २५ वडाया वडा अध्यक्ष नीलकाजी शाक्यं  “प्रकृतिं ब्यूगु मनुखं दयेकूगु देय् अमेरीका, प्रकृतिं मब्यूगु मनुखं दयेकूगु देय् इजरायल, अले प्रकृतिं ब्यूगु व जनतां स्यंकूगु देय् नेपाल जुयाच्वंगु दु धयादिल ।  । झीगु पहिचान धइगु हे झीगु नेवाः सभ्यता खः । तर थौं झीगु स्वनिगःया वर्तमान अवस्था दुरावस्थाय् लानाच्वंगु दु । उकिं स्वनिगःया अस्तित्व बचे यायेगु खःसा ११ गु वडा अध्यक्षपिं मिले जुयाः धर्म, भाषा, नेवाः संस्कार, सम्पदा धरोहर, संस्कृतियात बचेयायेत छप्पं छधी जुयाः न्ह्यावनेमाःगु वर्तमान ईया आवश्यकता खः । झीसँ झीगु स्थानीय सरकारय् पहुँच दु बलय् झी नेवाः पुर्खाया धरोहरयात बचे मयाःसा गबले यायेगु धकाः न्ह्यसः चिं नं थनादिल ।

किपाः रेखा शाक्य

म्हिगः जूगु ज्याझ्वलय् थी थी अन्य वडाया वडा अध्यक्षपिनिगुया लिसे‌ं गन्यमान्य ब्यक्तित्वपिनिगु नं सहभागिता दूगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.