मिस नेवाः आइकन २०१८ जुइगु

११३८ सिल्लागा पारु/येँ

नेवाः मिसातय् दथुइ नेतृत्वया विकास अले सुलाच्वंगु प्रतिभा पिब्वयेगु आज्जु लिसें रेक्स फेसन होमं मिस नेवाः आइकन २०१८या ग्वसाः ग्वइगु जूगु दु ।

निदँ न्ह्यः मिस नेवाः आइकन २०१६ ज्याझ्वः याःगु रेक्स फेसन होमं कासाया निगूगु संस्करण यायेत्यंगु खः । थौं येँय् पत्रकार सम्मेलन यासें रेक्सं वइगु चैत १० गते येँया आर्मी अफिसर्स क्लबय् मिस नेवाः आइकन २०१८ यायेत्यनागु जानकारी ब्यूगु खः ।

ज्याझ्वलय् न्वःवासें रेक्स फेसनया प्रबन्ध निर्देशक खगेश रंजीतं कासाया आज्जु कँसें लिपांगु धेंधें बल्लाखय् न्हाप लाइम्हेसित ३०द्वः तकालिसें ७ तोलाया वहःया ताज सिरपाः बीगु जानकारी बियादिल । उकिया नापं, मिस नेवाः आइकन २०१८या उपाधि त्याकामियात सितिकं एअर होस्टेसया तालीम बीगुया लिसें जुम्बा, जिम, फिजिकल फिटनेसया तालीम नं बीगु जूगु दु ।

ल्यू लाइम्हेतिस २०द्वः तकालिसें ४ तोलाया वहःया ताज व लियांल्यूयात १०द्वः तकालिसें ३ तोलाया वहःया ताज सिरपाः बीगु जानकारी नं रंजीतं बियादिल । कासाय् मेमेगु टाइटल त्याकामि सकलसित म्हतिं ५द्वः तका सिरपाः बीगु जूगु दु ।

किपा : शरण डंगोल

रेक्स फेसन होमया प्रमुख कार्यकारी अधिकृत रेक्स रंजीतं अप्वःलय् ३० कासामि दथुइ मिस नेवाः आइकन २०१८ ल्ययेगु जानकारी बियादिल । कार्यकारी अधिकृत रंजीतं नां दुत्युंपिनिगु दथुइ अडिसन यानाः ल्यज्याय् लाःपिनिगु दथुइ लिपांगु धेंधें बल्लाः जुइगु धयादिल । ‘अडिसनय् जिमिसं क्षमता जक स्वयेगु जुइमखु, सम्भावनायात तकं ध्यानय् तयाः ल्यज्याय् वनेगु जुइ’ रंजीतया धापू खः ।

कासाया नितिं एसईई पास जूपिं १६दँनिसें २४दँतक्कयापिं नेवाः मिसापिन्सं थःगु नां दुतिनेफइ । नां दुतिनेगु नितिं स्वनिगः दुनेयापिन्सं माघ २७ गतेतक्क व स्वनिगलं पिनेयापिन्सं फागुन ४ गतेतक्क नां दुतिनेफइगु ग्वसाः खलकं न्ह्यथंगु दु ।

अडिसन धाःसा स्वनिगः दुनेयापिनिगु माघ २८ गते व पिनेयापिनिगु फागुन ५ गते जुइ । ल्यज्याय् लायेत ताःलाःपिन्त क्याटवाकलिसें थीथी तालीम बियाः लिपांगु धेंधें बल्लाःया नितिं तयार याइ । स्वनिगलं पिनेया ब्वतिमिपिन्त येँय् च्वनेगु व नयेगुया बछि खर्च ग्वसाः खलकं बीगु न्ह्यथंगु दु ।

रेक्स फेसन होमया सल्लाहकारलिसें ह्याउँनिभाः पुचःया दुजः अनुपसिं सुवालं नेवाः मिसातय् दथुइ नेतृत्व व क्षमताया विकास यायेगु रेक्सया अभियानय् थःपिंन्सं नं सहकार्य यायेखंगुलिं पुचलं गौरव महसूस याःगु धयादिल ।

ज्याझ्वः रेक्स फेसन होमया ग्वसालय् जुइत्यंगु खःसा ज्याझ्वःया ग्वसाःया नितिं ह्याउँनिभाः पुचलं नं सहकार्य यानाच्वंगु दु ।

jheegu.com ज्याझ्वःया अफिसियल वेब मिडिया पार्टनर खः ।

किपा : शरण डंगोल

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.