मिडिया फेस्टिभलया औपचारीक समापन जुल

११३८ चिल्लाथ्व पारु/यल

नेवाः पत्रकार राष्ट्रिय दबूया ग्वसालय् वंगु पोहेंलागा पंचमी (पुस २२) शन्चरबाःया दिनय् यलया भन्दाः क्यबय् क्वचाःगु न्हापांगु मिडिया फेष्टिभलया औपचारीक समापन थौं याःगु दु ।

पत्रकार दबुलिं थौं यलया बखुंबहाःस्थित वाङमय शताब्दि पुरुष संस्कृतिविद् डा.सत्यमोहन जोशीया छेँय् छगू ज्याझ्वः यासें फेष्टिभलया औपचारीक समापन याःगु खः ।

ज्याझ्वलय् नुगः खँ तसें संस्कृतिविद् डा. जोशीं थःपिन्सं नेपालय् ७ सालया प्रजातन्त्र लिपा हे समावेशी व भाषिक समानता अभ्यास कलाकार पत्रिका मार्फत न्ह्याकागु धयादिल । तर थःपिन्सं उगु इलय् न्ह्याकागु उगु अभियानं थौंया दिनय् तक्क नं सार्थकता कायेमफुनिगु धासें दुःख प्वंकादिल । देय् संघीय संरचनाय् वनेधुंकूगु व प्रदेशं मुख्यमन्त्री तकं चूलाके धुंकूगु अवस्थाय् नेवाःतयसं थःगु भाषिक अधिकार स्थापित यायेत न्ह्यचिलेमाःगु खँ ल्ह्वनादिल ।

लसकुस न्वचु तसें दबूया दबूया मू छ्यान्जे सुनिल महर्जनं न्हापांगु मिडिया फेष्टिभलं समावेशी पत्रकारीताया सःयात सशक्त रुपं ल्ह्वंगु खँ लुमंकादिल । समावेशी लिसें मातृभाषा पत्रकारीताया मुद्दायात फेष्टिभलं स्थापित याःगु धासें आज्जुइ थ्यंंकेत सकलें छधी जुयाः न्ह्याःवनेमाःगु मू छ्यान्जे महर्जनया धापू खः ।

अथे हे फेष्टिभल कजि पत्रकार दबूया केन्द्रिय दांभरिं सुरेन्द्रभक्त श्रेष्ठं संस्कृतिविद कथं जक म्हस्यूम्ह सत्यमोहन जोशीयात थुगु हे फेष्टिभलं न्हापांम्ह समावेशी पत्रकारकथं म्हसीकूगु लुमंकादिल ।

फेष्टिभलया ल्यू कजि दबू यल कचाया छ्यान्जे राजेश बज्राचार्यं थुगु फेष्टिभलं बांलाःगु सांगठनिक अभ्यास जूगु धासें नेवाः संघसंस्थाय् सांगठनिक अभ्यासया विकास अझ धिसिलाक्क जुयावनेमाःगु न्ह्यथनादिल ।

ज्याझ्वलय् फेष्टिभल ताःलाकेत ग्वाहालि याःपिं सकलसित खादां न्ययेकाः दसिपौ लःल्हाःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.