मिजं व मिसा पासा जक जुइला ?

र्इ हिलाच्वंगु दु अले मनूतय्‌गु बिचाः नं । आः व र्इ मखय्‌धुंकल गबले छम्ह मिसा व मिजं पासा जुइ फइमखु धाइ । आ: उपिं पासा जक मखु बेस्ट फ्रेन्ड नं जुइ ।

थौंकन्हय् छम्ह मिसा व मिजं पासा जक जुइला धकाः न्यनेगु बेमानी जुइ । छाय्‌धाःसा थौंकन्हय् गन मिजंतय्‌गु जक पहुँच दयाच्वंगु खः आ: मिसात हरेक क्षेत्रय् थःगु सशक्त भूमिका न्ह्यब्वयाच्वंगु दु ।

मिजं व मिसा नापं ब्वनी, नापं ज्या याइ अले गुलि ला पासाया कथं जक नं नापं च्वनी ।



झी चेञ्ज जुया च्वंगु दु

मिजं व मिसा नापं ज्या याइ, नापं ब्वनी । छम्हेसिनं मेम्हेसित थःगु नुगया खँत प्वंकी । समाजं पनातःगु छुनं खँत बुलुहुँ उमिसं चीका हयाच्वंगु दु ।

लैंगिक आधारं भेदभाव यायेगु आःनं जूसां मिजं व मिसायागु फ्रेन्डशीपयात न्हापा सिबें सामान्य रुपं स्वयेगु यानाच्वंगु दु । मिजं व मिसातय्‌सं नं फ्रेन्डशीपयात हे सरल कथं हे कयाच्वंगु दु ।

आम मध्यमवर्गीय परिवारय् नं उमिगु सम्बन्ध स्वीकारे यायेगु अप्वयाच्वंगु दु । अयनं छम्ह मिसा व मिजं पासा जक जुइ फइमखु धइगु बिचाः न्हापांनिसें वयाच्वंगु दु अले थौंकन्हय् नं आपालं आपाः मनूतय्‌सं थःगु नुगलय् थ्व खँ तया नं च्वंगु दु ।

थ्व धापूयात माने याइपिंसं धाई कि निम्ह अःखः लिङ्गयापिं जुइ, व हे जुयाः निम्हेसिया दथुइ छम्ह मेम्हप्रति आकर्षिक जुइगु स्वाभाविक खः । निम्हेसिया दथुइ फ्रेन्डशीप जुइधुंकाः अन मतिना अले सेक्स जुइ धइगु उमिगु आशंका खः ।

समाज, चाहे व गां जुइमा वा शहर, अप्वः थें मनूतय्‌सं मिसा व मिजंयागु फ्रेन्डशीपयात पचे यायेमफु । न्ह्याबलेंं नं उमिगु सम्बन्धया खँय् उमिसं वैचारिक मंथन याना हे च्वनी । उमीगु मनय् थ्व खँ दया च्वनीकि थुपिं निम्हेसिया दथुइ छुं ला द हे दु ।



पासाया आधार विश्वास खः

सम्बन्ध न्ह्यागु हे जुइमा, विश्वासया आधारय् जुइ । तर, थ्व सम्बन्ध मिसा व मिजंया खँय् वल धाःसा खँ भचा मछिना वनी । छाय् थें मस्यू गुलिं मनूतय्‌त थ्व सम्बन्ध यइमखु । उमित मिखाया धू थें जुइ मिजं व मिसाया पासाया सम्बन्ध ।

मिजं व मिसा पासा जक जुइफइ धाइपिं यक्व दया वयाच्वंसां न्ह्यसः सुचूक्क हे धाःसा तनामवंनि ।



मिजं व मिसा पासाजक जुइ फइला ?

थौंकन्हय् मनूतय्‌सं हरेक सम्बन्धयात थःगु सोच व आवश्यकता कथं हिलावनी । थन खँ जुयाच्वंगु दु पासा यागु, गुगु छगू तसकं हे बांलाःगु सम्बन्ध खः । अले थुगु सम्बन्ध वंश वा परम्परापाखें दइगु नं मखु, बरु झीसं थम्हं तु ल्यइ अले सम्बन्ध दयेकी ।

पासाया सम्बन्ध हरेक किसिमयागु भेदभावं तापाइ । दकलय् यचुगु सम्बन्ध, गुकिया जाति–धर्म नापं छुं नं स्वापू दइमखु । तःमि चीमि धयागु बिचालं थुकियात गुबलें नं थी फइमखु ।

अय्‌सां थ्व सम्बन्धयात लिङ्गयागु आधारय् छाय् भेदभाव याइ ? पासा मात्र पासा जुइ । पासायागु सम्बन्धय् थ्व न्ह्यसः गबलें नं पायछि जुइ मखु कि पासा मिसा खः कि मिजं ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.