माेहनीया चालं कुन्हु बज्रबाराहीइ चित्रकला व मूर्तिकलाया प्रदर्शनी जुइगु

ने सं ११३८ काैलाथ्व पंचमी

झीगु सम्वाददाता

” मोहनीया चालं कुन्हु बज्रबाराही द्यःया दर्शन याःवइपिन्त लक्षित यानाः थुगसी बज्रवाराही जंगलया अवलोकन सहित कलाया पारखीपिन्त न्हूगु सवाः बिइत्यनागु खः । नेपाःया यइपुसे च्वंगु थौंकन्हय्या ची ची धाःगु लकसय् सकलें मुनाः द्यः दर्शन यावइपिनिगु नितिं थ्व छता बिस्कं कथंया अनुभव जुइ । उकिं जिमिसं उगु ज्याझ्वःया नां हे “प्रकृतिमा हामी” धकाः तयाग दु”  धकाः वादे कला स्टुडियोया आयोजकं झीगु डटकमयात जानकारी ब्यूगु दु ।

किपाः गुहाली सुरेम देशार

 

कला सम्पदाया धनी वादेय् पर्यटकीय नगरीया रुपय् प्रबद्र्धन यायेगु आज्जु कथं २०५५ सालं निसें बज्रबाराही जंगलय् थुकथं कलाकारया शीपया प्रदर्शनी यानाच्वंगु खः । उगु प्रदर्शनीइ कलाकार सुरेम देशार, अनिल महर्जन, दिलकुमार देशार, सृष्टि महर्जन, बिकी देशार शुसान्त मेहर कायस्थया कलाया प्रदर्शनी जुइत्यंगु दु । अथेहे वादे कलाः पुचलय् चित्रकला व मूर्तिकला सयेका च्वनादिपिं मस्तपाखें सिर्जना जुगु कला शीपयात नं प्रदर्शनी याइगु जुगु दु ।

उगु प्रदर्शनी जम्मा ५० चित्रकला व १० मूर्तिकला ब्वइगु आयोजकं जानकारी बियादिगु दु । समाज व राष्ट्रया नितिं जुसां सर्वसाधारया न्ह्यःने तक कला थ्यंकेगु लक्ष्य कथं थज्यागु ज्याझ्वःया आयोजना यानाच्वनागु धयादिल । अथेहे नेपाःया थी थी कलाकारपाखें निर्मित व सृजित कलायात फयांफक्व यक्वसिया छेँ छेँ थ्यनेमाः धकाः म्हो जक मू तया हे उगु प्रदर्शनी ब्वइगु शीपयात मिइगु तकं जुइ धयादिल कलाकार राजेन्द्र देशारजुं । नापनापं मेम्ह कलाकार सुरेम देशारजुं प्रकृतिं बियातःगु बांलागु जीवननाप स्वापू दुगु ज्याखँयात कलाया माध्यमं प्रकृतियात हे देछाय् त्यनागु खँ कनादिल ।

किपाः गुहाली सुरेम देशार

 

किपाः गुहाली सुरेम देशार

सदां थें थुगुसी नं थी थी कलाकारया कलाकारितां बज्रवाराही जंगल झः झः धायेत्यंगु दु सकसिनं उगु प्रदर्शनी स्वझाया कलाकारया ज्या यात तिवः बिइत आयोजक पाखें इनाप नं यानादिगु दु ।

किपाः गुहाली सुरेम देशार

 

किपाः गुहाली सुरेम देशार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: