मदुम्ह श्यामदासया लुमन्तिइ स्मृति ग्रन्थया पितब्वज्या

https://www.facebook.com/rajendra.manandhar.7906

ने सं ११३९ थिंलाथ्व सप्तमि

झीगु सम्वाददाता

समाजय् जुयाच्वंगु खँयात गथे खः अथे हे जक वर्णन मखु उकिइ मगाः मचाःगु खँयात न्ह्यब्वःया प्रस्तुत यायेगु नं कलाः दयेमाः । मदुम्ह श्यामदास प्रजापतियाके थ्व विचारधारां गाक्कं थाय् कया च्वंगु दु । वय्कःया बाखं कविताय् दुगु शैलींयाना हे वय्कः छम्ह प्रगतिशील विचारधारायाम्ह च्वमि खः धायेछिं । गबले तक झीसँ वय्कःया थ्व विचारधारायात कःघाना च्वनी श्यामदास सदां झीगु नुगलय् म्वानाच्वनी  डा याेगेन्द्र प्रधानजुं प्वंकादीगु बिचाः खः ।

किपाः रेखा शाक्य

वर्तमान पलिस्थाया नायः पूर्णकाजी ताम्रकारजुं मदुम्ह श्यामकाजीया किपातय् स्वामां व खादा क्वखाय्का  ज्याझ्वलय् न्ह्याकूगु खः । वय्कःया नायःसुइ न्ह्याःगु पलिस्था पाखें ग्वसाः ग्वःगु थाैंया ज्याझ्वलय् मू पाहाँ जुया झाःम्ह डा याेगेन्द्रजुं वय्कःया पूण्यतिथिस  संस्मरण च्वसुमुना श्यामदास स्मृति ग्रन्थया पितब्वज्या यानादीगु खः ।

किपाः रेखा शाक्य

उगु सफुतिइ  पलिस्थाया मदुम्ह नायः श्यामदासया व्यक्तित्व व कृतियात कयाः  ३७ म्ह साहित्यकनारपिन्सं  वय्कःया लुमन्तिइ वय्कःयात म्हसिउकथं थःथःगु संस्मरण च्वयादीगु लेखयात दुथ्याका तःगु दु ।

अथेहे ज्याझ्वःया नायः पूर्णकाजी ताम्राकारजुं ४२ दँ तक नापं ज्यानागु र्इयात लुमंका वय्कःया व्यक्तित्वया बारे लुमंकादिल । ८ दँ तक म्ह मफयेकाः छेँ हे जक लिकुना च्वनेमाःसां वय्कःया खँपुइ व वय्कःया च्वसुइ गबलें निराशापन मदुगु वय्कःया विशेषतायात च्वछाया दिल । सदां थःपिन्सं यायेमाःगु ज्या यानावं वनेगु व समाजयात माःगु खँ न्ह्यने तयाः समस्याया समाधानया लँपु तकं क्यनेमाःगु खँ थःगु प्रगतिशील  विचारधारां व्यक्त याइम्ह वय्कः च्वछायेबहःम्ह व्यक्तित्व खः धयादिल।

किपाः रेखा शाक्य

ज्याझ्वलय् वय्कःया बःचा हाकःगु म्हसिकाया नापनापं वय्कलं चिनादिगु मुक्तक महेशमान डंगाेलजुं न्यंकादीगु खः ।

किपाः रेखा शाक्य

अथेहे वय्कःया व्यक्तित्वबारे वय्कःया तःधिकम्ह म्ह्याय् रश्मिला प्रजापतिजुं अबुया संघर्ष व अबुया सुलाच्वंगु गुणया बारे चर्चा यानादिल । लिसें थःम्ह अबुनापं च्वना अबुयाके दुगु व्यक्तित्वयात बांलाक म्हसिके मलानिगु खँ थुगु सफुतिइ अापालं हनेबहःपिं साहित्यकारया लिसें राजनैतिक ज्याखँय् नापं न्ह्यानादिपिन्सं च्वयादिगु संस्मरणं अबुजुयात अझ बांलाक म्हसिके खंगु नं कनादिल ।

किपाः रेखा शाक्य

दकलय् लिपा लाेककवि राजभाइ जःकमिजुं श्यामदासया लुमन्ति चिनातःगु चिनाखँ सी डी वय्कःया किपाःय् समर्पित यानादिलसा पाहाँभाजुपिन्त नं लःल्हानादीगु खः ।

किपाः रेखा शाक्य

थाैंया ज्याझ्वलय् वय्कःया तःधिकम्ह काय् सुरज प्रजापतिया लिसें अन्य गन्यमान्य साहित्यकार व भाषासेवी पिनिगु उपस्थिति दुगु खः ।

किपाः रेखा शाक्य

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.