‘मदय्धुंकूम्ह मांयात नापलायेत सगरमाथा गया’

११३८ गुँला गाः सप्तमी/येँ

सगरमाथा आरोही मिसा पत्रकार रोजिता बुद्धाचार्ययात नेवाः पत्रकारं हंगु दु । नेवाः पत्रकार राष्ट्रिय दबू, येँ जिल्लाया दँमूँज्याय् बुद्धाचार्ययात हंगु खः ।
येँय् थौं क्वचाःगु दबूया प्यक्वःगु दँमुँज्याय् सगरमाथाया सफल आरोहण यानावःम्ह मिसा पत्रकार बुद्धाचार्ययात जिल्ला नायः नातिकाजी महर्जनं दोसल्लां न्ययेकाः हनादिल सा प्रेस काउन्सील नेपालया का.वा. नायः किशोर श्रेष्ठं हनापौ लःल्हानादिल ।


ज्याझ्वलय् रोजितां थः चीधिकःबलय् हे मदयावंम्ह थः मांया ख्वाः छकः स्वयेगु ईच्छां सगरमाथा गयागु धयादिल । ‘ निदँत्या जक दुबलय् मां मन्त । जिं जिमि ख्वाःया ख्वाः गथे च्वं हे मस्यू । मांया मुलय् द्यने मास्तेवइगु, मांलिसे म्हिते मास्तेवइगु । मां गन दु धकाः न्ह्याम्हेसित न्यंसा चन्द्रमाय् दु धाइगु । उगु हे इलय् जिं बिचाः याना कि जिं सगरमाथा गये अले अन फुत्त तिंन्हुया वनाः चन्द्रमाय् मांयात नापलाये । व हे बिचालं थौं जितः सगरमाथाया च्वकाय् थ्यंकल’ भावुक जूम्ह रोजिता मिखां पिहांवयेत स्वःगु ख्वबियात हुहुं धाल ।

प्रेस काउन्सील नेपालया का.वा. नायः किशोर श्रेष्ठंस्वच्छ पत्रकारिताया कलमयात सुनां नं पने मफइगु धयादिल । वर्तमान मुलुकी ऐनं पत्रकारिताया नामय् धन्दा याइपिन्त जक पनीगु नायः श्रेष्ठया धापू खः ।
गोरखापत्र राष्ट्रिय दैनिकया नि.प्रधान सम्पादक श्रीओम श्रेष्ठ ‘रोदनं’ सकल नेवाः पत्रकारत संगठित जुयाः थुगु ख्यःया वृहत्तर विकासय् जायेमाःगु धयादिल ।
जिल्ला न्वकू बिराजकाजी राजोपाध्यायं न्हापांगु नेपालभाषाया न्हिपौ नेपालभाषा पत्रिकाया पिकाकः व सम्पादक फत्तेबहादुर सिंहया नामं आकिवंनिसें सिंह पत्रकारिता सिरपाः दबुपाखें बीगु घोषणा यानादिल ।
दबूया केन्द्रीय नायः श्रीकृष्ण महर्जन, जिल्ला नायः नातिकाजी महर्जनं मुक्कं नेवाः पत्रकारयात दबू दुने मुनाः थवंथवय् ल्हाः माः हनाः पत्रकारिता ख्यःया विकास लिसें पत्रकारया सीप, क्षमता थकायेत संगठित जुइत आव्हान यानादिल ।

किपाः रेखा शाक्य

झीगु डट कम

झीगु नितिं झीगु सञ्चार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.