“मतिनाया जाँचय् पास या फेल” ?

११३८ बछलाथ्व सप्तमी

रेखा शाक्य

मनूतय्गु जीवनय् नये,त्वनेगुयालिसें न्ह्याइपुकेगु नं जीवनय् मदयेकं मगाःगु छगू तत्व जुयाबिउगु दु । अथेला न्ह्यइपुकेगु माध्यम तःगु मछिं हे दु थुकिइ शंका मदु । तर थौं कन्हे मुक्कं समाज आधुनिकरणया लिसें सामाजिक सञ्जालपाखे नं लिप्त जुयाच्वंगु ई खः । उकिं मनूतय्गु जीवनया छगू ई चाय्कं मचायकं फेसबुक यूट्यूब ट्वीटर, ह्वाट्सअप, इन्सतग्राम आदी इत्यादी ई फुनाच्वंगु दु थुकिइ सुयां बिमति दैमखु । थुकिया हे लिच्वः खः झीगु नेवाः समाजय् नं न्ह्यइपुकेगु माध्यम ईब्य कथं हिला वनाच्वंगु दु ।

सन्दर्भ, थौंकन्हे झीसँ न्ह्यइपुकेगु झ्वलय् नेवाः म्ये फेसबुक व यूट्यूबय् स्वया वयाच्वना । न्हापा व आःया ईयात लिफ स्वयेगु खःसा नेवाः म्येया नं आपालं म्युजिक भिडियो त झीसँ उगु इलय् नं स्वयावयाच्वना । आः नं स्वइच्वनागु हे दु । ई हे हिलावनिगु जुसेंलिइ झीसँ स्वयेगु व खनिगु हरेक बस्तु व खनीगु लु नं हिला वनिगु स्वभाविक हे खत । न्हापा न्हापा नेवाः म्ये न्यनेगु जक खः ।

न्ह्याय्पं जक ब्यूसां गाः उकिं म्ये ग्वः, सः व संगीत आदि इत्यादी जक ध्यान तःसां गाः । तर आः ई व मखये धुंकल । बांलाक हालातःगु व दयेका तःगु म्येया नं म्युजिक भिडियो दयेके माःगु थौंया अपरिहार्य थें हे जुइधुंकल । न्हापायापिं सर्जकपिनिगु धाःपू न्यनेगु खःसा म्ये धइगु हे न्यनेगु खः धाइ तर आःया न्हू पुस्तां धाःसा म्ये न्यनेगु जक मखु स्वयेगु नं खः धयाहये धुंकल ।

उकिया हे लिच्वः मखाः थौंकन्हे न्हू न्हूगु नेवाः म्येया म्युजिक भिडियो आपालं दयावःगु । थ्व बांलाःगु खँ ला खः हे खत तर आपाः नेवाः म्येया म्युजिक भिडियोपाखें अझं नं सकसिगु नुगः साले फूगु धाःसा मदुनि । अथेला न्हापा न्हापा म्युजिक भिडियो मात्र परम्परागत वसः पुनाः हे जक नं दयेका तःगु मदुगु मखु । तर आः थौंकन्हे ईब्ययात ल्वयेक वसः जक मखु थाय् नं ल्ववनापुक्क खने दइकथं कःघाना तःगु दु ।

प्रसंग, थौंकन्हे वयाच्वंगु युट्युबय् छपू म्ये दु । नेपालभाषाया संकिपा  “मां” या नितिं तयार जुइ धु‌ंकूगु उगु म्ये मनूतय्सं स्वयेगुया लिसें उकियात कयाः थवंथवय् खँ ब्याका च्वंगु नं दु । द्वछिं मल्याक युट्युबय् भ्यूज नं मुने धुंकूगु दु । “जिगु मतिनाया जाँच गुलि कायेगु छं का , छ बिना जि म्वाये मखु, छु धाये मास्ति वः धाः आइ लाइक यु” । म्येया ग्वलं हे नं युवा पुस्तायात थुकिं अःपुक सालाकाइगु खनेदु ।

अथेहे ड्रेसअप नं आधुनिकरण जुयाच्वंगु खनेदु । खय्तला थ्व सिबें न्ह्यः नं थज्यागु अाधुनिकीकरण व माेर्डन वसः पुनाः  आपालं म्ये पिहाँ वःगु खनेदु तर अथे खयानं थ्व म्ये स्वयेधुंकाः धायेगु खःसा थुकिइ खँग्वःयात ल्वयेक हे म्येहालामिया सः दु सा संगीत व संयोजन नं बांला जु अले प्याखँम्वःपिनिगु अभिनय् नं स्वभाविक हे दु धकाः न्यनामि व स्वकुमिपिनि धापू न्यनेदु ।

सुधिर ख्वबिया च्वसां पिज्वःगु खँग्वःयात दबल बहादुर शाक्यं लय् तयादिगु खःसा म्येयात अरेन्ज विरेन शाक्यं यानादिगु खः । दिपा महर्जनं म्ये हालादीगु दु । म्ये न्यनेबलये गुलि न्ह्इपुसे च्वनीगु खः उकियात दृश्यय् नं उलि हे यइपुक क्यनेगु नं छगू हाथ्या हे खः । बज्रक्रियशन प्रा लि या शैलेश डंगोलजुं थ्व खँयात बांलाक हे थुइकाः थःगु शीप व कौशलता न्ह्यब्वःगु खनेदु । अथेहे थुगु म्युजिक भिडियोस खनेदुम्ह रजनी खड्गी छम्ह बांलाम्ह प्याखं हुलामिया लिसें प्याखं म्वः नं खः धइगु दसू क्यनाबिउगु दु । मिजं कलाकार सन्जु खड्गीं नं थःगु भूमिकाय् न्याय् याःगु हे खनेदु ।

समग्रय् धायेगु खःसा छपू म्ये बांला धायेकेत छम्हसिगु जक मखु मुक्कं पुचःया उलि हे क्वातुगु भुमिका दयेमाः अले जक म्येय् हिट जुइगु खः । थुकिइ सकसिगु मिहेनत खनेदु ।

लुमंके माःगु छता खँ छु धाःसां थौंकन्हेया म्युजिक डाइरेक्टरपिन्सं ध्यबा दयेवं संख्या जक अप्वयेकेगु मखसें ज्याय् क्वालिटि नं बिइफयेकेमाः । म्ये ग्वलं छु धयाच्वन उकियात नं बांलाक हे होमवर्क यायेमाः । मात्र ध्यबा बिइ धायेवं ध्यबा फुकिम्ह सु धाल व हे पात्रयात प्याखँम्वः दयेकेगु ज्या यायेमज्यु ।

गुलिखे म्येय् थाय् वा विशेष प्रसंगया उल्लेख जुयाच्वनी तर लु धाःसा गनं खने दयाच्वनी मखु । अथे जुलकी आलु बुँया खँ ल्हाना भुति बुँयात क्यनेगु समान जुइ ।

अथेला हरेक थाय् मुक्कं विवादरहित जुइफइ मखु थ्व नं सत्य खः तर अथे खयानं म्युजिक भिडियो दयेकीपिन्सं खःगु इलय् खःगु खँया सुझाव बिइफत धाःसा झीगु नेवाः संकिपा ख्यः जक मखसें नेवाः म्येया म्युजिक भिडियोया लागा नं तब्याना वनीगु व थुकिया भबिष्य नं बांलाइगु खनेदु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.