मंसीर २९ गते शनिबार महानगर दिवस तःजिक हनिगु

https://www.facebook.com/rajendra.manandhar.7906

ने सं ११३९ थिंलाथ्व षष्ठी येँ

झीगु सम्वाददाता

थ्वहे वइगु मंसीर २९ गते शनिबार महानगर दिवस तःजिक हनिगु जूगु दु । थाैं जूगु येँ महानगरपालिकाया ज्याकुथिइ पत्रकार नापलाय्गु झ्वलय् येँ महानगरपालिकाया मेयर विद्या सुन्दर शाक्यजुं सकल पत्रकारपिन्त थुकिया जानकारी बियादिगु खः । वि सं २०५२ सालया मंसीर २९ गते थुगु नगरयात महानगर घाेषणायाःगुया लुमन्तिइ थुकथं थुगु दिवस तःजिक हनेगु ग्वसाः ग्वयागु खँ कनादिल ।

किपाः रेखा शाक्य

येँ महानगरपालिकाय् निवार्चित जनप्रतिनिधिपिं वये धुंकाः न्हापांगु खुसिइ महानगर दिवस खुल्ला रुपय् हनेगु तयारी याःगु खः । थुगु ज्याझ्वःया विधिवत उलेज्या यायेत सम्माननीय प्रधानमन्त्री केपी अाेलि झाइगु जूगु दु । ज्याझ्वःया उलेज्या धुंकाः थुगु हे अवसरय् परम्परागत बाज‌ंया गुरुपिन्त सम्मान कथं नगद २५००० द्वः तका बिइगु जूगु दु । अथेहे न्हापांम्ह मयेर जनकमान श्रेष्ठजुयात सम्मान दकलय् बांलागु ब्वनेकुथि सम्मान महानगरीय सुशासन पत्रकारिता पुरस्कार वितरण उत्कृष्ट करदाता सम्मान व कर्मचारी दीर्घ सेवा पदक नं लःल्हायेगु ज्याझ्वः जुइ ।

किपाः रेखा शाक्य

थुगु ज्याझ्वलं नगरया दक्वं सांस्कृतिक धार्मिक सामाजिक वैभवयात न्ह्यब्वइकथं हलिंया न्ह्यःने नगरया माैलिक पहिचान न्ह्यब्वया देशया पर्यटन उद्याेगयात समेत टेवा बिइगु तातुना‌ं थुकथं महाेत्सव यायेत्यंगु खः ।

किपाः रेखा शाक्य

महाेत्सवया विधिवत उलेज्या लिसें शुरु जुइगु थुगु ज्याझ्वलय् धुँन्या प्रदर्शनया लिसें सांस्कृतिक ब्वज्या नं जुइसा मंसीर २९ गते निसें पुषया २ गते तक बसन्तपुरय् ज्यापु महागुथि नेपाः येँ समितिपाखें सांस्कृतिक ज्याझ्वः बसन्तपुरया दबलिइ हनुमान ध्वाखा टेंगः किलाघः असं लगं थँहिति व वन्देय् थी थी नसात्वंसाया स्टलत नं तइगु जूगु दु । अथेहे पुष १ व २ गते न्हूसतकया दमकल न्ह्यःने निन्हुयंकं सांस्कृतिक ज्याझ्वः नं जुइगु जूगु दु ।

थाैंया थुगु ज्याझ्वलय् येँ महानगरपालिकाया उपमेयर हरिप्रभा खड्गी श्रेष्ठ महानगर पालिकाया प्रवक्ता र्इश्वर डंगाेल राजेन्द्र स्थापितया लिसें अन्य गन्यमान्य व्यक्तित्वपिनिगु नं उपस्थिति दुगु खः ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.