भिएआर प्रविधिं डिफेण्डीङ्ग च्याम्पियन छेँय् लिहाँ वन

११३८ तछलाथ्व ज्यापुन्हि

विश्वकप २०१८ या झ्वलय् म्हिगः समूह ई व एफ या प्यंगू कासा क्वचाःगु दु । कासा लिपाया लिच्व कथं ब्राजिल, स्वीजरल्याण्ड, मेक्सिको व स्वीडेन नकआउटय् थ्यंगु दु ।

म्हिगः ७ः४५ ताःइलय् थी थी थासय् समूह एफ या निगू कासा जुगु खः । समूह एफया दक्षिणकोरियां डिफेण्डीङ्ग च्याम्पियन जर्मनीयात २–० गोलं बुकाः थःलिसें जर्मनीयात नं वर्ल्डकप २०१८ पाखें विदा कायेकल । इन्जुरी टाइमय् दक्षिण कोरियां याःगु गोलयात लाइन्समेनं अफसाइडया संकेत बिसेंलिं पिहाँ वःगु विवादयात भिएआर प्रविधि छ्यलाः गोल ब्यूगु खः । वयां लिपा लङ पासय् गोलकिपर मदुगु पोष्टय् हाकनं मेगु गोल थपे याःगु खः । डिफेण्डीङ्ग च्याम्पियन न्हापांगु राउण्डं लिहाँ वंगु जर्मनी प्यंगूगु देय् जुगु दु ।

सन् २००२ य् फ्रान्स, सन् २०१० य् इटली, सन् २०१४ य् स्पेन नं डिफेण्डीङ्ग च्याम्पियन न्हापांगु राउण्ड लिपा हे छेँय् लिहाँ वंगु खः । ओभर कन्फिडेन्स दुगु डिफेण्डीङ्ग च्याम्पियन जर्मनी टिम नं थुगुसी न्हापांगु राउण्ड लिपा छेँय् लिहाँ वंगु दु । अथेहे मेगु कासाय् स्वीडेनं मेक्सिकोयात २–० गोलं बुकाः गोल अन्तरं थुगु समुहपाखें न्हाप लाकुसें नकआउटय् थ्यंगु दुसा मेक्सिको ल्यूं लाकाः नकआउटय् थ्यंगु दु ।

किपाः रियुटर्स

 

किपाः रियुटर्स

अथेहे म्हिगः ११ः४५ ताःइलय् नं थी थी थासय् समूह ई या निगू कासा जुगु खः । छगू कासाय् ब्राजिलं सर्वियायात २–० गोलं बुकुगु खःसा मेगु कासाय् स्वीजरल्याण्ड व कोस्टारिकाया दथुइ २–२ गोलया बराबरी जुगु खः । थुगु पुचलं ब्राजिल न्हाप व स्वीजरल्याण्ड ल्यूं लानाः नकआउटय् थ्यंगु दु ।

किपाः रियुटर्स

 

किपाः रियुटर्स

थौं नं लिग चरणया अन्तिम कासाकथं प्यंगु कासा जुइ । थौंया कासा लिग चरणया अन्तिम कासा कथं समूह जी या इंग्ल्याण्ड व बेल्जियम, पनामा व ट्युनिसिया ११ः४५ ताःइलय् जुइगु खःसा समूह एच या सेनेगल व कोलम्बिया, जापान व पोल्याण्ड दथुइ ७ः४५ ताःइलय् जुइ ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.