भारतया विहारय् अलपत्रय् लानाच्वंपिं न्हय्म्ह नेपाली मस्तय् उद्धार

११३८ बछलाथ्व चतुर्दशी/यल

भारतया विहारय् अलपत्रय् लानाच्वंपिं न्हय्म्ह नेपाली मस्तय्त गैरसरकारी संस्था छोराछोरी नेपालं उद्धार यानाः यलय् हःगु दु । भारतया विहार राज्यया छपरा व मुजफ्फरपुरय् च्वंगु बाल गृह तथा बालिका गृहपाखें उपिं न्हय्म्ह मस्तय्त केन्द्रीय बाल कल्याण समिति, हरिहरभवनया पहलय् गैरसरकारी संस्था छोराछोरी नेपालं शुक्रवार उद्धार याना येँ हःगु खः ।

उद्धार यानाहःपिं मध्यय् ४म्ह मिजंमस्त सर्लाही जिल्लाया हरिवन धाःगु थासय् यापिं खः । इमित बिहारया छपरास्थित बाल गृहपाखें अथेहे रौतहत, जनकपुर व वीरगन्जया ३म्ह मिसामस्तय्त मुजफ्फरपुरया बालिका गृहपाखें उद्धार याना हःगु खः । मिजं मस्तय्गु उमेर ११ निसे‌ १५ वर्षयापिं खः धाःसा मिसा मस्त छम्ह ११ अथेहे निम्ह ९ वर्षया खः ।

दिल्लीइ ज्या यायेत धकाः छेँपाखें बिस्यूवंपिंन्त छपरा रेल्वे स्टेशनया रेल्वे प्रहरीं नियन्त्रणय् कयाः बालगृहलय् तइतःगु सूचंया लिधँसाय् उगु थासं उद्धार यानाः येँ हयागु छोराछोरी नेपालया कार्यक्रम संयोजक अनिला डंगोलं जानकारी बियादीगु खः । मेपिं स्वम्ह मस्त मध्यय् निम्ह छेँ ज्या यायेया निति‌ं अन थ्यंगु खःसा छम्ह दाजुम्ह नापं बिस्यूं वनेगु झ्वलय् लँपुइ छखे लाना अलपत्रय् लाःगु खः ।

मस्तय्त उद्धार यायेत छोरीछोरी नेपालया कार्यकारी निर्देशक शैलजा सि.एम.या नेतृत्वय् कार्यक्रम संयोजक अनिला डंगोल व सञ्चारकर्मी तेज नारायण महर्जनया पुचः वंगु शनिबार हे बिहार थ्यंकवंगु खः ।

आः उपिं मस्तय्त छोराछोरी नेपालया गोदावरी तौखेल स्थित अस्थायी सेल्टरय् संरक्षणय् तयातःगु दु । संयोजक डंगोलं संस्थाया नियम कथं उद्धार याना हयापिं मस्तय्त पुनस्र्थापनाया नितिं छवाः तक सेल्टरय् हे तयेगुया लिसें माःगु कथं मनोसामाजिक काउन्सिलिंग यानाः छेँजःया जिम्माय् छ्वयेगु धाःगु दु ।

मस्त छेँया लकसं व गरिबीया कारणं हाकनं बिस्यूं वनेफुगु खँयात बिचाः यानाः छेँजःयात जिम्मा बिइ न्ह्यः उमिगु परिवारिक अवस्थाया नं मूल्यांकन यायेमानिगु खँ धयादिगु दु ।

छोराछोरी नेपालं वंगु ३दँ निसें भारतय् अलपत्रय् लानाच्वंपिं मस्तय्गु उद्धार यानावयाच्वंगु दु । २०७३ चैतय् नं संस्थापाखें भारतया दरभंगा व मुजफ्फरपुर बाल गृहलं केन्द्रीय बालकल्याण समितिया पहलय् ३३ म्ह मस्तयत उद्धार याःगु खः । संस्थां थौं तक १२२म्ह मस्तय्त उद्धार यानाः छेँय् लित छ्वःये धुंकूगु दु ।

बुखँ व किपाः – राजेश बज्राचार्य, यल

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.