fbpx

भाइचा (कुम्हाः) प्रजापतिया प्यक्वःगु जंक्व क्वचाल

११३८ बछलाथ्व तृतीया /यल

थपाहिटी यलया भाइचा (कुम्हाः) प्रजापतिया प्यक्वःगु जंक्व क्वचाल । ९९ दँ ९ महिना ९ दिं क्यंम्ह भाइचा (कुम्हाः) प्रजापतियात विधिवत रुपं सिजःया क्वँ दुने सुनानं मखंक तयाः विशेष पूजाआजा यानाः बज्रं थिइकाः गुरुजुं क्वँ चायेकाः क्वनं पिकाःगु खः । पुजा सिधयेकाः जंक्वः चाः न्हाय्पनय् तीकुगु खः । थथे जंक्व ज्याझ्वलय् मिसा मचातय्त इही यायेमाःगु प्रथा कथं इही नं याःगु खः ।निसन्तान प्रजापतिया थुगु प्यक्वःगु जंक्वया सकतां ज्या वया किजा पराससिं प्रजापतिं यानादीगु खः । ९२ दँया पराससिंया काय् पूर्ण प्रजापतिं थुकथं कर्म खंकेगु ज्या नेवाः संस्कार व परम्परा जुगुलिं तःबाया सुख शान्त व भिं उसाँय्या कामना यासें पूवंकागु खँ कनादिल ।

न्हापा न्हापा जुसा थथे प्यक्वःगु जंक्वः यायेबलय् चाया तेपं पिकाइगु खःसां भाइचा कुम्हाःयात सिजया तेपय् तया पुजा याःगु खः । तेप मेपिनिगु नितिं नं ज्याख्यलय् वइगु तातुनां थथे यानागु धापू पूर्ण प्रजापतिया खः । भाइचा कुम्हा थुगु उमेरय् तक नं पूर्णरुपं स्वस्थ दु । नेवाः संस्कारय् थुकथं जंक्वः यायेधुंकुपिन्त द्यःया रुपय् हनेगु चलन दु ।

थपाकु गुथिया थकाली जुया च्वनादिम्ह प्रजापति लजगां कृषक खःसा चाया थलबल दयेकेगु ज्या याना दी । यलया बुँग द्यः जात्राया झ्वलय् बुँगद्यः यलया लुँहितिइ थ्यनेवं थुगु गुथिं द्यःयात चा या थलबल देछाय् माःगु परम्परा दु ।

नेवाः जातिइ दुगु आपालं संस्कार व संस्कृति मध्यय् थःगु हे विशेषता व महत्व दुगु परम्परागत संस्कृति व संस्कारय् बुह्राबुह्रीया जंक्व नं खः । बुह्राबुह्रीपिनिगु ज्या जंक्व करीब १०दँया दुने स्वक्वः तक यानाः क्वचायेकेगु नेवाः परम्परा दु । दकलय् न्हापां ७७दँ ७ला ७न्हु ७गु पलाया इलय् न्हापांगु भिं जंक्व याइ । थुकियात भिमरथारोहण नं धायेगु याः ।

थुगु इलय् छेँजःपिन्सं घःचा दुगु चिधंगु खतय् फ्येतुका बस लाया सकलें थःथितिपिन्सं खः साला थपिनिगु छेँ चाःहिके कथं निश्चित लँपुइ चाहिकेगु याइ । अन लिपा निक्वःगु जंक्व ८१दँ निसें ८४ दँया दुने याइ । थुकियात देवरथ नं धायेगु याः । थुबले झ्यालं पितहइगु खःसा महारथारोहण धकाः ९९दँ ९ला ९न्हु क्यंका याइगु खः । थुबले चाया टेपं पिकाइगु खः ।

बुखँ व किपाः बुद्ध शरण

Leave a Reply

Your email address will not be published. Required fields are marked *