बुदिं म्ये कासाय् च्वछायेबहःगु ब्वति

११३८ सिल्लाथ्व तृतीया/येँ

सुरजबीर बज्राचार्यया बुदिंया भिंतुना कभर म्ये कासाय् च्वछायेबहःगु ब्वति खनेदुगु दु ।

कासाय् म्ये दुतिनेत स्वन्हु ई ल्यं दनिबलय् ७९म्हेसिनं थुगु म्ये हालाः कासाया फेसबुकय् शेयर यायेधुंकूगु दु । कासाय् ब्वति कायेत मस्तलिसें देशं पिने च्वनाच्वंपिन्सं तक्क नं म्ये दुथ्याकूगु दु ।

कासाय् आःतक्क न्याम्ह मस्तय्‌सं म्ये हालाः दुथ्याकेधुंकूगु दुसा ५दँ दुम्ह सजगता मानन्धर आःतक्कया दक्कले क्वकालिम्ह कासामि जूगु दु ।
३दँ दुम्ह अपूर्व शर्मा राजोपाध्यायं नं बुदिंया म्येयात कभर यानाः सामाजिक संजालय् खनेदयेधुंकूसां कासाया पेजय् धाःसा म्ये शेयर याःगु मदुनि । कासाया पेजय् म्ये शेयर मजूतल्ले कासाया नितिं दुथ्याइमखु ।

१४दँया विनित ज्वालानन्द राजोपाध्यायं म्येया बाँसुरी भर्सन नं कासाया पेजय् शेयर याःगु दु ।

भ्यूजया ल्याखं सुमन मानन्धर दक्कले न्ह्यःने लानाच्वंगु दु । सुमन मानन्धरया भिडियोया ६७०८९ भ्यूज दयेधुंकूगु दु ।

कासाया नितिं ‘जिमिगु पलाः’ एल्बम पिथनेधुंकूम्ह म्येहालामि वीरेन्द्रमान शाक्यं नं थुगु म्येयात कभर यानादीगु दुसा चन्द्रदेवी शाक्य, भुपेन शाक्य नं थःगु ओरिजिनल म्ये रेकर्डिंग यायेधुंकूपिं खः । राजेश्वरी राजोपाध्यायं हालादीगु म्ये नं ब्वाला म्येचालय् पिदनेधुंकूगु दु ।

कासाय् ब्वति काःपिं मध्ये शर्मिला राजोपाध्याय, मणिका शर्मा राजोपाध्याय नं कलाकार हे खःसा मिनर्वा राजोपाध्याय नं हुलाप्याखंमि खः । कल्पना श्रेष्ठ नं थीथी ज्याझ्वलय् म्ये हाला वयाच्वंम्ह खः ।

मेम्ह कासामि विनय राजोपाध्याय नं छ्वालि कलाय् बांलाःम्ह कलाकार खःसा वयकलं म्ये लिसें संकिपाया स्क्रीप्ट नं च्वयादीगु दु । विगेन तुलाधर व लजना मानन्धर रेडियो उपत्यकाय् ज्या यानाच्वंपिं संचारकःमि खः । कुसुम शाक्य नं किप्स एफ एमय् ज्या यानाच्वनादीम्ह संचारकःमि हे खः ।

उकिया नापं नेपालं पिनं अमेरीकाय् च्वंच्वनादीम्ह रोशन श्रेष्ठं नं कासाय् ब्वति कयादीगु दु । ऋतु तण्डुकार Robinson, रमा महर्जन (kalikakali) नं थौंकन्हय् अमेरीकाय् च्वंच्वनादीगु दुसा रुपा न्याछ्‌यं श्रेष्ठ क्यानडाय् च्वनाच्वंम्ह खः ।

कासा जुयां तुं च्वन धाःसा थुकथं हे न्हूपिं म्येहालामिपिं नं पिहांवयाच्वनीगु प्रमाणित जूगु वय्‌कःया धापू खः

कासाय् खने दयाच्वंगु ब्वतिमिपिनिगु उत्साहं थःत नं उत्साहित याःगु म्येया ओरीजिनल हालामि सुरजबीर बज्राचार्यं धयादिल । बुदिंया भिन्तुना थःगु हे भासं थःगु हे तजिलजि कथं देछायेगु परम्परा स्थापित यायेगु थःगु आज्जुइ यक्व हे न्ह्यःने थ्यनावःगु थें ताःगु बज्राचार्यं झीगु.कमयात धयादिल । नेवाः भाय् मसःपिं, मल्हाःपिनिगु दथुइ नं थुगु कासां यानाः हे नेवाः भासं म्ये हालेगु ज्या जूगुलिं थः लय्‌ताःगु वयकःया धापू दु ।

थः नं न्हापा म्ये कासां हे म्येहालामिया रुपं न्ह्यःने वयागु खँ कँसें बज्राचार्यं थुगु कासां नं यक्व हे बांलाःपिं व न्हूपिं म्येहालामिपिं पितहःगुलिइ न्ह्यइपुसेच्वंगु धयादिल । कासा जुयां तुं च्वन धाःसा थुकथं हे न्हूपिं म्येहालामिपिं नं पिहांवयाच्वनीगु प्रमाणित जूगु वय्‌कःया धापू खः ।

कासाय् ब्वति कायेत वइगु माघ ८ गते श्रीपंचमिया दिंतक्क म्ये दुतिनेफइ । कासाय् ब्वति कायेत बुदिंया भिंतुना म्येयात कभर यानाः भिडियो दयेकाः थःगु फेसबुक पेजय् भिडियो अपलोड यानाः बुदिंया भिन्तुना म्ये कासा फेसबुक पेजय् शेयर यायेमाः ।

कासाय् दक्कले बांलाःम्ह म्येहालामियात २४ इन्चया चेज एलइडि टिभि छगः नापं सुरजबीर बज्राचार्यया च्वसा व जुगल डंगोलया लसय् थःगु हे ओरिजिनल म्ये छपु रेकर्डिंग सिरपाः दइसा दक्कले आपाः भ्यूजयात २४ इन्चया चेज एलइडि टिभि छगः सिरपाः बीगु जूगु दु ।

कासाया ब्वतिमिपिनिगु धलः स्वयेत थन क्लिक यानादिसँ

Share this...
Share on Facebook
Facebook
Tweet about this on Twitter
Twitter

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.