बुदिंया म्ये कासाया ई फुत

११३८ सिल्लाथ्व पंचमि/येँ

म्येहालामि लिसें संचारकःमि सुरजबीर बज्राचार्यया बुदिंया म्येया कभर म्ये कासाय् दक्कले आपाः भ्यूजपाखे सुमन मानन्धरं सिरपाः त्याकादीगु दु ।

थौं सिल्लाथ्व पंचमीया चान्हसिया १२ताः ईलिपा म्ये दुतिनेगु नितिं ई फूगुलिसें ग्वसाः खलकं ७७८१७क्वः भ्यू जूगु ल्याखं सुमन मानन्धर भ्यूजपाखे त्याःगु खः । मयजु मानन्धरं चेज ब्रान्डयागु २४ इन्चया एलइडि टिभि त्याकूगु दु ।

कासा क्वचाःबलय् तक भ्यूजया ल्याखं ल्यू लाःम्ह सजेना चित्रकारया भिडियो ५७,४९९ लियांल्यू लाःम्ह मन्जिल शाक्यया भिडियो ४८,०९९ स्वःगु दुसा प्यंगूगु ल्याखय् लाःम्ह राजु बज्राचार्य दथुलँया भिडियो ४४७३१, अमोघवीर बज्राचार्यया ४०९५१, खुगूगु ल्याखय् विधान तुलाधरया भिडियो ३२,२६९ स्वःगु दु ।

कासाया दक्कले बांलाःम्ह हालामि धाःसा लिपा जक घोषणा याइगु जूगु दु ।

ग्वसाः खलकं चान्हसिया १२ताः इलय् कासाया आधिकारीक फेसबुक पेजय् ई फूगु घोषणालिसें माघ २० गते शनिवाः सुथसिया ८ताः इलय् लिपांगु लिच्वः बीगु दिंया नं घोषणा यायेगु न्ह्यथंगु दु ।

ग्वसाः खलकं २० गतेया दिनय् कासामिपिन्त सुभाय् देछा लिसें दसिपौ लःल्हायेगु ज्याझ्वः यायेगु व अन हे मू ज्याझ्वःया विस्तृत सुचं पिथनेगु न्ह्यथंगु दु ।

वंगु थिंलागा त्रयोदशी (डिसेम्बर १६) निसें न्ह्याःगु कासाय् थौंतक्कया दुने १२१म्हेसिनं म्ये हालाः ब्वति काःगु दु ।

कासाय् यक्व हे मिसा लिसें मचापिं कासामिपिनिगु तकं ब्वति दुगु खः । म्ये हाला हे च्वंपिं कलाकारया नापं, संचारकःमि, मोफसलया लिसें देशं पिने च्वनाच्वंपिन्सं तकं ब्वति काःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.