बुँँया भाः थिकेय् जूगु धात्थेंं भिंं ला?

रोशन श्रेष्ठ (अमेरीका)

बुँ मियाः तःमि जुयेगु नियत बाँलाः ला ? बाँमलाः ।

बुँ मीमाःगु हे मदुसा आनाया ३० लाख छाय् ३० खरब वंसां नं छु मतलब जुल ? बुँ ममीक धेबा ल्हातय् लाइमखु । बुँइ धेबा सइमखु ।

बुँ मियाः ल्हातय् लाइगु धेबा सदां थःगु जुइमखु ।

यदि बुँ मियेगु पाय्‌छि खः धायेगु जूसा थौं बुँ मियाछ्वःपिं सकलें नेवाःत सः ताय्‌ मदयेक ह्वाँय् ह्वाँय् छाय् ख्वयाच्वने माल ? छाय् धाःसा बुँया मालिक थः मखय्‌वं छु जुइयः धैगु इमिसं प्रत्यक्ष खन ।

बुँया मालिक थःहे जुयाच्वनेगु नियत दुसा बुँया भाः गुलि म्ह्वः जुल उलि झीत जीवनयापन सहज जुइ । कर पुलेमाःसा म्ह्वः जक कर पुलेवं गाइ । बुँया प्राकृतिक उत्पादकत्वया महत्वया कदर जुइ । थःगु स्वामित्व कायम यानातयेत झीत यक्व संघर्ष यायेमालीमखु ।

झी पुर्खापिन्सं बुँया भाः हे मदैगु अवस्था यानामतःगु जूसा व बुँ झीके ल्यनाच्वनी ला ? हरेक ५०दँया अन्तरालय् आक्रमण याःवइपिं खसतसें तिसा वसः लुते यानायंकल । बुँ नं भाः यक्व वंगु वस्तु खः धकाः इमिसं स्यूसा न्हापा हे लाकाकाये धुंकल जुइ । तर दंगु बुँ जुयाः इमिसं त्वःताथकल । थिकेगु तिसा, लुँ, वहः आदि लाकाकाल । खि फायेगु कोपरा तक नं लाकाकाल धकाः इतिहासय् प्रमाण हे लुल।

आः जब बुँया महत्व सिल, इमिसं धुच्चापतिं बुँ लाकाकायेगु रणनीति दयेकाजुल । लँ छपु दयेकी, लँ या जवंखवं बुँया भाः थहांवनी । बुँ मी म्वाय्‌क मनग्य आम्दानी यायेगु लँपुइ नेवाःतय्‌त पंगः थनी । धेबा दइमखु । मू वंगु व हे बुँ जक खनी । बुँ मियाः वइगु यक्व धेबा खनाः लय्‌ताइ, व हे लसय् थःगु पुर्खां हिचःति हायेकातःगु बुँया मालिक मेपिं हे जुल धयागु ल्वःमनी ।

जब बुँया भाः थहांवनी, बुँ मीमखु धकाः च्वनीम्हेसित नं यक्व यक्व कर पुलेमालीगु बाध्यता जुयावइ । यक्व कर पुलेत कि मेमेगु उपाय छ्यलाः धेबा मुंकेमाल, कि मखुसा व हे बुँ छकूचा मीमाल ।

दाजुकिजा अंशवण्डा जुइबलय् नं मू वंगु छकूचा बुँया खँय् ताःहाकःगु कचमच पिहांवइ । सामाजिक सद्भाव स्यनी । बुँ मियाः धेबा इनाकायेगु लँपु ज्वनी । तर बुँया स्वामित्त्व थःपिनि ल्हातं फुस्केजूगु खँ होस दैमखु ।

थथे जुयाः बुँया भाः थहांवनीगु धयागु सुखी सन्तोषि व समृद्ध जीवनशैलीया नितिं तसकं घातक खः ।

 

  • बुँया भाः थहांवनीगु धयागु इमित जक फाइदा खः

– बुँ मियाः धेबा प्वःचिनाः मोजमस्ति याये धैगु मतिइ तइपिं हुत्तिहारा काय्‌म्ह्याय्‌पिन्त ।

– दंक बुँ न्यायेगु, थिके जुल कि मियाछ्वयेगु धयागु मौका मालाः बुँ न्यायेगु मियेगु पेशा यानाजुइपिं जुवाडि लगानिकर्तापिन्त ।

– थिकेय् थिकेय्‌गु बुँया कारोबार यानाः यक्व यक्व कमिशन नये धैगु मतिइ तइपिं दलाल कमिशनखोरपिन्त ।

– थिकेय् थिकेय्‌गु बुँया कारोबारया भ्वं च्वये धैगु मतिइ तइपिं लेखनदास, कर्मचारी, बिचौलिया, कानूनबिद पेशेवरपिन्त ।

– दंक बुँ न्यानातयाः थिकेय् जुइक मियाः धेबा यक्व कमे याये धयागु योजना दयेकातःपिं भू–माफियापिन्त ।

– थिकेय् थिकेय्‌गु बुँया यक्व यक्व कर म्हयाः थःपिन्सं व करया धेबां गाडी गया जुये, मोबाइल न्याये, मोजमस्ति याये धयागु मतिइ तइपिं राजनीतिक नेतापिन्त ।

– थिकेय् थिकेय्‌गु बुँया मालिक जुल छिकपिं, छिकपिं धनी खः, छिकपिन्के धेबा दु, जिमित चन्दा बियादिसँ धका ब्लाय्‌कमेल यानाः चन्दा म्हयाः नयाजुइपिं पार्टीया लफंगा कार्यकर्तापिन्त ।

  • तर यदि छि

– थःगु कर्मशील ल्हाः व दिमाग ज्वयेकाः थःगु वुद्धि वर्कत छ्यलाः ज्या यानाः नइम्ह मनू जुल धाःसा,

– थःगु बुँ धयागु थःगु पुर्खाया चिं खः, थ्व बुँया स्वामित्त्व थःयाके हे ल्यंकातयेमाः धयागु भावना दुम्ह जुल धाःसा

– तनावरहित, समृद्ध जीवनशैली बांलाः धयागु मतिइ तयाः समाज कल्याणया भावना दुम्ह जुल धाःसा

छि बुँया भाः थिकेय् जुल धकाः लय्‌ताये फै हे मखु ।

बुँया भाः थिकेय् जुइगु समाजयात भिं जुइगु खँ मखु । समाजय् बुँ यक्व दुपिं सिमित १–२ प्रतिशत मनूतय्‌त जक भिं जुइगु खँ खः । समाज स्यंकेगुलिक्ष् भुमिका म्हितीपिं हुत्तिहारा (अर्थात, मेगु उत्पादनशील ज्या यानाः नयेगु हुति मदुपिं मनू) मनूतय्‌त जक भिं जुइगु खँ खः ।

खँ थुइकादिसँ, मुसु कायादिसँ ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.