बाह्य चक्रपथ व जग्गा अधिग्रहणयात कया किपुलिइ सहलह

११३८ बछलाथ्व चतुर्दशी/किपू

म्हिगः वैशाख १५ गते  नागरीक संवाद केन्द्रया ग्वसालय् किपू नगर मण्डप श्री कीर्ति विहारय्  काठमाडौं उपत्यका विकास प्राधिकरणं आः याकनं हे न्ह्याकेत्यंगु बाह्य चक्रपथ व जग्गा अधिग्रहणयात कयाः  छगू सहलह ज्याझ्वः यात ।

किपा गुहाली रजनी मिला

ज्याझवलय् उगु योजनाया न्हापांगु ब्व कथं च्वबहालं निसें सतुंगः तक्क न्ह्याकेत्यंगु विषयसं किपू, नगां व पांगाया चक्रपथ व अधिग्रहणं काइगु जग्गाया थुवाःत नापं उगु विषयसं च्यूताः तयाच्वनादीपिं नागरिकपिनि दथ्वी सहलह जूगु खः ।

उगु सहलह ज्याझ्वलय् सेभनेपाः भ्यालीया अभियन्ता भाजु सुरज महर्जनं बाह्य चक्रपथ व अधिग्रहण धैगु छु, थुकिं जग्गा थुवाःतय्त छु बी, सरकारी योजना छु व मुक्कं नेवाः समुदाय, व पर्यावरणीय असर गुकथं लाकी धैगु विषय न्ह्यब्वयादीगु खः ।

अथे हे सडक पीडित संघर्ष समितिया नायः भाजु सुमन साय्मिजुं सडक विस्तारया ज्यां जनतायात गज्यःगु हाथ्या जुल, छु कथं संघर्ष यायेमाल व थौं संघर्ष गुकथं न्ह्यानाच्वन धैगु विषयसं कनादिल ।

उगु हे संघर्ष समिती कानूनतः ग्वहालि यानाच्वनादीम्ह अधिवक्ता भाजु जितेन्द्र बज्राचार्यं जग्गा अधिकरण सम्बन्धी संवैधानिक व राष्ट्रिय अन्तर्राष्ट्रिय ऐन कानून व नेपाःया अभ्यासया विषययात न्ह्यब्वयादीगु खःसा नेपाल सांस्कृतिक पुनर्जारण मंचया केन्द्रीय दुजः भाजु असोज महर्जनं खोनाय् सरकारया थी थी योजना, खोनाया नेवाःतय्त जुयाच्वंगु समस्या व चक्रपथ सम्बन्धी खोनावासीपिंगु धारणाया विषययात कयाः थःगु खँ तयादिल ।

सहलहया झ्वलय् बाह्य चक्रपथयात सरकारं धिब्छ ध्यबा हे तये म्वायेक फुक्क जनतापाखें हे जग्गाया योगदान बीमाःगु जुइ धैगु विषयसयात गम्भीर रुपं काःगु खने दत । नापं सरकारं अधिग्रहण यानाः काःगु जग्गाा लित बिइबलय्  असर जूूवनीगु खँय् नं ध्यान बीमाःगु खँयात कयाः भाजु सुरजं जोड बिसें जग्गा थुवाःत तसकं सचेत जुइमाः धयादिल । थनया आदिवासी रैथाने नेवाः समुदाययात सरकारं विस्थापित याइ मखु धकाः धाःसां थुकिं मचाय्क विस्थापित याना यंकीगु व चक्रपथ दयेकाः न्ह्याइगु मोटर गाडीत पाखें काइगु करया रोयल्टी जग्गाथुवाःतय्त दै कि मदै धैगु विषयसं सहलह जूगु खः ।

बुखँ व किपाः – रजनी मिला 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.