बाला चःह्रेकुन्हु बाला ह्वलीपिनीगु न्हय्गु पुस्ता तकं मोक्ष प्राप्त जुयाः स्वर्गय् वने खनी

बालाचःह्रेबलय् छगः पु ह्वःसां नं छकुचा लुँति पुण्य दइ धकाः धाय्गु याः ।

छगू महिनाया पारूनिसें पुन्हितकया १५ न्हुया तिथियात शुक्लपक्ष अले मेगु पारूनिसें अमाईतकया १५ न्हुया तिथियात कृष्णपक्ष धाइ । थुकियात थ्व व गा नं धाइ । हरेक तिथिया थःथःगु हे तिथिस्वामी नं दु । अले हरेक तिथिकथं विस्कंकथं व्रत, उपासना, पुजा आदि यायेगु चलन परापूर्वकालंनिसें न्ह्यानाच्वंगु दु । थते १५न्हु शुक्लपक्षया व १५ कृष्णपक्षया तिथित मध्ये अष्टमि, पुन्ही, चःह्रे व अमाई तिथिकुन्हु अप्वः ब्रत, पुजा, पाठ याइगु परम्परा दु । लय्पतिकं वइगु चतुर्दशी अर्थात चःह्रेयात थःथःगु हे कुलया वैदिक विधिं कथं हनी । उकिमध्ये नं कृष्णपक्षय् वइगु प्यंगु चःह्रेयात विशेष महत्व बियाः हनाच्वंगु दु ।

(१) श्रावण कृष्ण दिल्लागा चतुर्दशीयात गठामुगः चःह्रे
(२) मार्गकृष्ण कछलाया चतुर्दशी तिथियात बाला चःह्रे
(३) फागुन कृष्ण सिल्लागा चतुर्दशीयात सिला चःह्रे
(४) चैत्र कृष्ण चिल्लागा चतुर्दशी तिथियात पाहाँ चःह्रे ।

थ्व प्यंगुलिं चह्रेबलय् महाद्यःया विभिन्न रूपयात पुजा याइ। महादेवया गणत नं भूतप्रेत, पिशाच, विषमज्वर, नन्दी भृन्दी आदि खः । थ्व प्यंगुलि चह्रे नाप स्वापू दुगु विविध रूपया महाद्यःपिन्त विविध रूपं हे आराधना पुजा याइगु परंपरा दु । चह्रेपुजा धकाः दीक्षा कया तःपिन्सं आगमय् पंचमकार कथं पुजा न्ह्याकाच्वंगु दु । दीक्षा मदुपिंसं नं चह्रेपुजायात षोडशोपचारया ज्वलंत तया महाद्यःयात हे पुजा याइगु चलन दु ।

बालाचःह्रे
कछलागा चतुर्दशि अथवा मार्गशिर्ष कृष्ण चतुर्दशिया न्हियात बालाचतुर्दशि धकाः हनेगु चलन दु । थुगु दिनय् दच्छिया दुने मदयावंपिं छेँजः अथवा थःथितिया नामय् आत्माया चीरशान्तिया कामना यासें पशुपतिया श्लेषमान्तक वनय् बालु व्हः वनेगु चलन दु । बालू वनेगु धकाः तछ्व, वा, हाम्वः, छ्व, माय्, चिग्वःगु कय्गू, ताय्, लैं, तःसि, हिसकि, कँय् हलू आदि तयाः पशुपति क्षेत्रया देगः देगलय् ह्वह्वं चाःहिलेगु याइगु खः । बालाचःह्रे कुन्हु मृगस्थली वा श्लेष्मान्तक वनय् शतबीज ह्वली । बालाचःह्रेबलय् छगः पु ह्वःसां नं छकुचा लुँति पुण्य दइ धकाः धाय्गु याः ।

छगु कथन कथं बालासुर धयाम्ह अघोर पन्थी महाद्यःया बहुरूप मध्ये छगू मशान भैरवया अनुयायी कपालिकया नायः जुयाच्वन । अले थुमिसं पुजाआजाय् नं पशुबलि, नरबलि आदिया चलन बीगु जुयाच्वन । मनूया हे ला नयेगु चलन दुगुलिं थुमिगु अत्याचारयात सहयाये मफया नायः बालासुरयात सकल जाना स्यानाबिल खनी । बालासुरयात स्यानाब्यूगुया प्रतकिार वइ धकाः ग्याना महाद्यःयाके प्रार्थना यात । महादेवं पशुपति क्षेत्रय् बालासुर स्याःगु न्हि वयागु हे नामं बालाचःह्रेकुन्हु श्लेषमान्तक वन चाःहिला सप्तधान्य ह्वला मत च्याकेगु यायेगु नापं पशुपति महाद्यःया पुजा यात धाःसा पापमोचन लिसें थःपिनिगु दिवंगत परिवारयात नं मुक्ति जुइ धकाः धयाबिज्यात । व हे जुया थाैंतकं नं थ्व परम्परा आःतक नं निरन्तर न्ह्यानाच्वंगु दु । बालासुरया नामय् बालु ह्वलेगु जुयाः थ्व दिनयात बालाचह्रे धायेगु यात ।  अघोर पन्थी व मेगु धर्मया आचरण भेदभाव दु । अाचरणय् भेदभाव दुगु जुयाः निगू पुचः दथुइ ल्वापु मजुइमा धकाः उत्तर प्राचिनकालिन सम्बत ४८७ या ग्वल देवपाटनय् सौरशंकर पादपिठया अभिलेखय् धर्मया भेदभाव मदु धकाः च्वयातःगु खनेदु । अले शंकर व केशवया मूर्ति बाम्ह बाम्ह तयाः अद्र्धशौरेश्वर द्यः स्थापना यानातःगुलिं नं धर्मया भेदभाव मदु धकाः क्यनातःगु नं सिइदु । उकें सर्वजाति धर्मयापिं बालाचह्रेकुन्हु पशुपति बालु वनेगु थौंतक नं न्ह्यानाच्वंगु नं स्पष्ट जू ।

अघोर पन्थी व मेगु धर्मया आचरण भेदभाव दु । अाचरणय् भेदभाव दुगु जुयाः निगू पुचः दथुइ ल्वापु मजुइमा धकाः उत्तर प्राचिनकालिन सम्बत ४८७ या ग्वल देवपाटनय् सौरशंकर पादपिठया अभिलेखय् धर्मया भेदभाव मदु धकाः च्वयातःगु खनेदु । अले शंकर व केशवया मूर्ति बाम्ह बाम्ह तयाः अद्र्धशौरेश्वर द्यः स्थापना यानातःगुलिं नं धर्मया भेदभाव मदु धकाः क्यनातःगु नं सिइदु । उकें सर्वजाति धर्मयापिं बालाचह्रेकुन्हु पशुपति बालु वनेगु थौंतक नं न्ह्यानाच्वंगु नं स्पष्ट जू ।

मेगु छगू किवदन्तिकथं परापूर्वकालय् पशुपतिया दिपय् बालानन्दंयात छन्हू सीम्ह उइगु पाः वल। पाःकथं सीम्ह उयाच्वबलय् सीम्हया न्ह्यपु बालानन्दं नयाच्वंगु ब्वय् लावन । बालानन्दं नसात्वंसा नापं उगु न्ह्यपु नं नयाछ्वये लाइ । बालानन्दयात मनूया न्ह्यपु तसकं सा ताइ । लिपा बालानन्दयात पशुपति दिपय् वनाः सीपिं मनूतय्गु न्ह्यपु नयेगु बानी हे जुइ । न्ह्यपु नयेगु लोभं हे बालानन्द न्ह्याबले हें पशुपतिइ वनाः सीम्ह उइगु ज्या याइ । लिपा बालानन्दं सीम्हेसिगु न्ह्यपु जक मखु ला नं नयेगु याइ । थथे मनूया ला नइम्ह बालानन्दयात राक्षसया रुपय् बालासुर धायेगु यात ।

सीम्ह मनूया न्ह्यपु व ला नइम्हेसिया अन उइत हःपिं सीम्ह मउइकं हे लाका कयाः गुँइ यंकाः नयेगु यात । थ्व खँ जुजुया थाय् थ्यनी । जुजुं बालासुरया त्वाय् बृषसिंहयात सताः यक्वः धन सम्पति लोभ क्यनाः बालासुर यात स्यायेगु आदेस बिइ । जुजुया उजं पूवंकेत महाद्यःया आरधना यानाः बृषसिंह थः त्वाय् बालासुरयात स्याये फइगु शक्ति फ्वनी । महाद्यःपाखें शक्ति कायेधुंकाः बृषसिंह बालासुरयात नकेत च्याम्ह झिम्ह ज्यामितय्त थ्वँ, अय्ला, ला, बजि क्वबीकाः बालासुर थाय् वनी । थः त्वाय् खनां अतिकं लय्ताम्ह बालासुरं व फुक्क नसा त्वंसा नइ । अय्लाखं काय्धुंकूम्ह बालासुरयात लिपा फुकं जाना तुँथिइ क्वफानाः स्याना बी ।

त्वाय् बालासुर स्यानागु पापं मुक्त जुइत हाकनं महाद्यःयाके बरदान फ्वनी । महाद्यःनं बृषसिंहयात बालासुर स्यानगु न्हिकुन्हु पशुपतिइ बालासुरया छ्यंयागु मतू दयेकाः पुइकाः पुजा यायेवं त्वाय् स्यानागु पापं मुक्त जुइ धकाः धाइ । थथे पशुपतिइ महाद्यःयात बालासुरया मतू पुइकूगु दिं सुनां नं महाद्यःया दर्शन यानाः बालु ह्वलेगु याइ, वयागु न्हय्गु पुस्ता तकं मोक्ष प्राप्त जुयाः स्वर्गय् वने खनी धकाः महादेवं हे धयाबिज्यागु दिं बालाचःह्रे खः । उबलेंनिसें थ्व चलन आःतक नं न्ह्याना वयाच्वंगु दु ।

नेपाली भाषां ब्वनेत

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.