बसन्त ऋतु वइगु जुल

११३८ चिल्लाथ्व एकादशी/येँ

नेवाःउडय् चर्चाया विषय जुयाच्वंगु संकिपा बसन्त ऋतुया निर्माणया ज्या सकतां क्वचायाः वइगु चिल्लागा अष्टमि (फागुन २६) कुन्हु पिदनीगु जूगु दु ।

धुँदेय् प्रोडक्सन प्रा.लि.या ब्यानरय् दयेकूगु संकिपाया न्हापांगु क्यनेज्या चिल्लागा अष्टमीकुन्हु राष्ट्रिय नाचघर जमलय् जुइत्यंगु खः ।

न्हापांगु क्यनेज्याया दिनय् निगू शो जुइत्यंगु दु । न्हापांगु क्यनेज्या सुथसिया ११ताः इलय् जुइसा निगूगु शो न्हिनसिया २ताः इलय् तयातःगु दु ।

थुगु संकिपा समाजय् ब्वलनाच्वंगु विकृतिया दसु कथं वयेत्यंगु निर्देशक व च्वमि पवन जोशीं कनादिल । लिसें संकिपाय् नारी शक्ति नं म्ह्वः मखु धकाः क्यनेत स्वयागु नं निर्देशक जोशीं धयादिल ।

मुक्कं १७ लख तकाया लागतय् दयेकूगु संकिपाय् सामाजिक हसनाया लिसें स्वकुमियात पूर्ण मनोरन्जन नं दइगु जोशीया धापू खः । नेवाः संकिपायात नं थौंया विकसित प्रविधीलिसें न्ह्यःने यंकेत स्वयागु नं वय्‌कलं धयादिल ।

नेवाः संकिपाय् व कथंया लागत तःधं मजूला धइगु न्ह्यसलय् निर्देशक जोशीं स्तरीय संकिपा निर्माण जूगुलिं थःपिं बजाःया खँय् मग्याःगु धयादिल । लिसें थुगु संकिपा विदेशी बजारय् तक्क नं यंकेगु वय्‌कलं जानकारी बियादिल ।

थ्वयां न्ह्यः निर्देशक जोशीं राष्ट्रिय चलचित्र पुरस्कारय् बांलाःम्ह मय्‌जु संकिपापाखें बेस्ट डाइरेक्टरया अवार्ड त्याकेधुंकूगु दुसा उगु हे संकिपां बेस्ट फिल्मया अवार्ड नं त्याकूगु खः ।

संकिपाय् कलाकार किशोर चिपालु, अन्नु महर्जन, राजी किपू, लक्ष्मीकुमार महर्जन, सुशील श्रेष्ठ, लक्ष्मीकमल शाही, रुक्साना महर्जन, सुरेश महर्जन व सोनिका हेकाया अभिनय स्वयेदइ ।

संकिपाया निर्माता रामकृष्ण धिना खःसा संगीत गुजे मालाकारया दु । छायाङ्कनया ज्या राजेश शाक्यं यानादीगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.