फ्रान्स विश्वविजेता, निक्वःखुसि विश्वकप त्याकल

११३८ दिल्ला थ्वः चाैथि

थुगुसिया विश्वकप फ्रान्सं त्याकूगु दु । सन् १९९८ य् घरेलु मैदानय् विश्वकप त्याकुम्ह फ्रान्सं थुगुसी निक्वःखुसी विश्वकप त्याकुगु खः । मस्कोया लुजझिन्की रंगशालाय् क्वचाःगु थुगुसिया विश्वकपय् क्रोयसियायात ४–२ गोलं बुकुसें फ्रान्सं विश्वकप त्याकूगु खः ।

किपाः रियुटर्स

कासाया १८ औं मिनेटय् क्रायेसियाया मारियो माण्ड्जुकिकया पाखें जुगु आत्मघाती गोलया ग्वाहालिं फ्रान्सं १–० या अग्रता काःगु खः । गुगु गोल विश्वकपया इतिहासय् फाइनल कासाय् जुगु न्हापांगु आत्मघाती गोल खः । फ्रान्सया ग्रिज्म्यानं थ्वाःगु फ्रिकिक मारियो मान्ड्जुकिकया छ्यनय् लानाः पोस्टया दिशाय् वनाः गोल जुगु खः । २८ औं मिनेटय् क्रोयसियाया पारिससं गोल यासें कासा १–१ या स्थितिइ हःगु खः । भि.एअ.आर. प्रविधिया ग्वाहालिकया अम्पायरं दिपा न्ह्यः फ्रान्सयात पेनाल्टि थ्वायेगु अवसर बिल । ग्रिजम्यानं पेनाल्टिइ अपूक गोल यासें दिपा न्ह्यः तक फ्रान्सं २–१ गोलया अग्रता काल ।

दिपा लिपा ५९ औं मिनेटय् उत्कृष्ट ल्याय्म्ह कासामिया उपाधि त्याकुम्ह किलियान एम्बाप्पेया पासय् पाउलो पोग्बां गोल यात सा ६५ औं मिनेटय् एम्बाप्पें मेगु गोल यासें फ्रान्सया अग्रता ४–१ जुल । वया लिपां ६९ औं मिनेटय् फ्रान्सया डिफेन्डरतय्गु गल्तीया फाइदा कासें क्रोयसियाया मारियो माण्ड्जुकिकं छगू गोल थ्वानाः स्थिति ४–२ या अवस्था हसां क्रोयसियायात थ्व पर्याप्त मजुल ।

किपाः रियुटर्स

विश्वकप २०१८ य् गोल्डेन ग्लोबया उपाधि उत्कृष्ट गोलकिपर बेल्जियमया थिबाउट कोर्टिएसयात, यक्व गोल थ्वाम्हः इंग्ल्यान्डया ह्यारि केनयात गोल्डेन बुट या व उत्कृष्ट ल्याय्म्ह कासामि फ्रान्सया केलियन एम्बाप्पे जुगु दु ।

अथेहे फ्रान्सया प्रशिक्षक डिडियर डेस्च्याम्प कासामी व प्रशिक्षक जुया विश्वकप त्याकुम्ह स्वम्हम्ह व्यक्ति जुगु दु । थ्व स्वया न्हुयः ब्राजिलया मारियो जगालो व जर्मनीया फ्रान्ज बेकनबाउर नं प्रशिक्षक व कासामी जुया विश्वकप त्याके धुंकुपिं खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.