फ्रान्स धुंकाः फाइनलया दावेदार सु, इंग्ल्याण्ड वा क्रोयसिया ?

११३८ तछला गाः त्रयोदशी

सन् २००२ या विश्वकपया क्वाटरफाइनलय् अग्रता दयकुसां ब्राजिलनाप बुइ धुंकाः गारेथ साउथगेटलिसे लकर रुमय् प्रशिक्षक स्भेन गोरान इरिक्सनया प्रेरणादायी भाषण कलाया कमी जुगु महसुस याःगु खः । उबलय् साउथगेट छम्ह कासामी खः । थौकन्हे वयागु हे प्रशिक्षणय् इङ्गल्यान्ड विश्वकपया सेमिफाइनल थ्यंगु दु । अथेजुया आः व ई वःगु दु, विश्वकपया उपाधि निगू कासा ल्यं दनिसां उकिया महसुस यायेम्वाल्येमाः ।

किपाः गुगल

इङ्गल्यान्डया ४७ दँया पूर्व अन्तर्राष्ट्रिय कासामी साउथगेटं आः थ्व टिमयात बुधबाः क्रोएसियाविरुद्ध जुइगु कासाया नितिं तयार यानाच्वंगु दु । इङ्गल्यान्ड २८ दँ लिपा न्हापांखुसिं विश्वकपया सेमिफाइनल कासा म्हितेत्यंगु दु । सेमिफाइनल कासा त्यात धाःसा इङ्गल्यान्डं विश्वकप ट्रफीपाखें थःगु झण्डा धस्वाकि । सन् १९६६ या विश्वकप इङ्गल्यान्डं त्याकुगु खः । अथे खसां व धुंकाः इङ्गल्यान्ड विश्वया तःधंगु कासाय् निरास जक जुगु दु । थ्व दथुइ इङ्गल्यान्डया गेरी लिनेकर, माइकल आवेन, एलन सिएरर, डेभिड बेकहम, पल गिग्स, पल स्कल्स, स्टिभन जेरार्ड व वायन रुनी थें जापिं विश्वस्तरीय कासामि न्ह्यब्वय् धुंकुगु दु । आः थुमिसं यायेमफुगु ज्या हेरी केनयां ब्वहलय् थ्यंगु दु । प्रशिक्षक साउथगेट व केन युवा टिम नाप रुस वःगु खः ।

किपाः गुगल

फिफा वरीयताय् इङ्गल्यान्ड १२ औं व क्रोएसिया २० औँ थासय् दु । विजेतां आइतबाः जुइगु फाइनल कासाय् फ्रान्स नाप म्हिति । सन् १९९६ या विश्वकपय् क्रोएसियां सेमिफाइनल म्हिते धुंकुगु खः । उबलय् कासाय् दुथ्याबलय् हे अन्तिम चारय् थःत थ्यंका विश्वयात चकित यानाब्युगु खः । व धुंकाः क्रोएसियां लिग चरण पार याये फुगु मदुनी ।

थुगुसि धाःसा क्रोएसियां २क्वःगु खुसिइ सेमिफाइनलय् थ्यंकेफत । अर्जेन्टिना, नाइजेरिया व क्रोएसिया दुगु समूहपाखें विजेता जुया नकआउटय् थ्यम्ह क्रोएसियां नकआउट व क्वाटरफाइनलय् त्याकेत टाइब्रेकर या सहारा काय् माःगु खः । इङ्गल्याण्डं नं कोलम्बियाविरुद्धया नकआउटय् पेनाल्टी सुटआउटया सहारा काःगु खः । अथेखसां क्वाटरफाइनय् स्वीडेनयात २–० गोलं अपुक बुकुगु खः ।

हेड टु हेड
इङ्गल्यान्ड व क्रोएसिया दथुई मुक्कं ७गू कासा जुगु दु । गुकिइ इंग्ल्याण्डडं ४ गू कासा त्याकुगु खःसा २ गू कासाय् बुगु खः । छगू कासा बराबरीइ क्वचाःगु खः । युरो २००४ या समुह चरण कासाय् क्रोयसियायात ४–२ गोलं बुकुगु खः । अथेहे सन् २०१० या विश्वकप छनौटय् न थुपिं निगूलिं टिम छगू हे समूहलय् लाःगु खः, गुकिं इंग्ल्याण्ड्र जाग्रबेय् ४–१ व वेम्ब्लय् ५–१ गोलं त्याकुगु खः ।

सन् २००६ या युरो छनोटय् धाःसा क्रोएसियां इङ्गल्यान्डयात २–० गोलं बुकुगु खः । अथेहें मेगु दँय् नं क्रोएसियां इङ्गल्यान्डयात ३–२ गोलं बुकल । थ्व निगू कासाय् इङ्गल्यान्ड बुगुया मू हुनि धयागु वया गोलरक्षकया गल्तीं नं तधंगु भूमिका म्हितुगु खः । क्रोएसियाविरुद्धया निक्वःगू हार धुंकाः इङ्गल्याण्ड युरो कप २००८ य् चयन जुइ मफुत ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.