प्रा‍‍ सुवर्ण शाक्यया सफू “वय्कःपिन्त लुमंकाबलय्” (निगूगु ब्व) पितब्वज्या

 

ने सं ११३८ कौला गाः चह्रे, येँ ।

रेखा शाक्य

भाषिक आन्दोलनया प्रणेता, मानवअधिकारकःमि मदुम्ह पद्मरत्न तुलाधरयात लुमंकुसें प्रा सुवर्ण शाक्यजुं वय्कः मदुगुया ह्याकिं गुबलें मजाइगु धयादिल । वय्कःया अन्त्येष्टिया इलय् राजकीय सम्मान बिउथें वय्कःया बिचाःयात नं राजकीय सम्मान बिइके कथं वय्कःया म्हगस झीसँ पूवंकेमाः  थौं जूगु ने.सं ११३९ क्यनेत्यंगु न्हूदँया लसताय् ओलम्पस क्लबपाखें ग्वसाः ग्वःगु ज्याझ्वलय् समाजसेवी च्वमि भाजु सुवर्ण शाक्यं धयादिल ।

किपाः रेखा शाक्य

ओलम्पस क्लबया नायः पवित्र बज्राचार्यया नायसुइ न्ह्याःगु उगु ज्याझ्वलय् मू पाहाँ जनकवि दुर्गालाल श्रेष्ठजुं प्रा शाक्यया “वय्कःपिन्त लुमंकाबलय्” (निगूगु ब्व) सफू विमोचन यानादिगु खः ।

किपाः रेखा शाक्य

स्वम्ह बौद्ध न्ह्यलुवापिं मोतिलक्ष्मी उपासिका, भिक्षुणी धर्मरक्षिता व कमला गुरुमा, बुद्धघोष, कुमार काश्यप, सुर्दशन भन्ते, महास्थविर भाजुरत्न शाक्य, लक्ष्मीदास मानन्धर, शेषराज दली चित्तधर हृदय्, सिद्धिचरण श्रेष्ठ, डा. थीरमान शाक्य, चक्रमान डंगोल व चन्द्रमान महर्जन यानाः थुगु सफुतिइ मुक्कं १४ म्ह व्यक्तित्वपिनिगु गुण व योगदानयात लुमंका तःगु दु ।

थ्व सिबें न्ह्यः ने.सं ११२८ स न्हापांगु खुसिइ २८ म्ह व्यक्तित्वपिनिगु समाजसेवा व योगदानयात कदरयाना वय्कःपिन्त लुमंकाबलय् धकाः सफू पिथने धुंकूगु दु ।

किपाः रेखा शाक्य

भाजु ज्योतिशाक्यजुं दँय्दसँ हे क्लबपाखें भिंतुनाया लिसें सफू विमोचनयात नं कथं हनाच्वनागु खँ न्ह्यथनादिल । नेवाः आन्दोलनया न्ह्यलुवा मदुम्ह पद्मरत्न तुलाधरया आकाझाकां मदुगु दुखया ईयात लुमंका वय्कःप्रति श्रद्धाभावतसें १ मिनेट मौन धारण यायेगु ज्या नं जुल ।

https://www.facebook.com/rajendra.manandhar.7906

किपाः रेखा शाक्य

ज्याझ्वलय् मू पाहाँ दुर्गालालजुं मदुम्ह पद्मरत्नयात लुमंका चिनाखँ ब्वना न्यंकादिगु खःसा सफूया बारे साहित्यकार मंगला कारंजितजुं चर्चा यानादिल । अथेहे नायः भाजु पवित्रजुं नं नुगः खँ प्वंकादिगु खः ।

किपाः रेखा शाक्य

थौंया ज्याझ्वलय् उपमेयर हरिप्रभा खड्गी, बालकृष्ण श्रेष्ठ, प्रयागराज सिं सुवालया लिसें अन्य व्यक्तित्वपिनिगु सहभागिता दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.