पृथ्वीनारायणयात थुकलं बिल

११३८ पोहेंलागा दशमी/येँ

गणतन्त्र वयेधुंकूगु अवस्थाय् नं जुजुया नामय् ब्यूगु विदाया विरोधय् थौं गणतन्त्रवादीपिं जानाः विरोध ज्याझ्वः याःगु दु ।

राज्यं जुजुया नामय् विदा ब्यूगुलिसें राज्य विस्तार जक याःम्ह जुजुयात एकताया प्रतीक दयेकूगु धासें गणतन्त्रवादीपिन्सं पृथ्वीनारायण शाहयात लुमंकुसें किपूया छ्याकः ल्वहंतय् थुकलं बीगु ज्याझ्वः तःगु खः । किपूमिपिनि थः पुर्खायात याःगु अन्याययात लुमंकुसें थौंतक नं येँय् वनीगु वा वनावइगु इलय् पृथ्वीनारायण शाहयात लुमंकाः छ्याकः ल्वहंतय् थुकलं बीगु याना वयाच्वंगु दु ।

किपुलिइ छ्याकः ल्वहंतय् थुकलं बी धुंकाः वक्तापिन्सं राज्यं जुजुया बुदिं हनाः गणतन्त्रया उपहास याःगु धाःगु खः ।साधारण जनताया न्हाय्, ध्यनाब्यूम्ह, चान्हय् द्यनाच्वंपिन्त, जात्रा न्यायेकाच्वंपिन्त आक्रमण यानाः थःगु राज्य विस्तार याःम्हेसित एकताया प्रतीक धायेमफइगु खँय् वक्तापिन्सं बः बिल ।

विश्वया गुगु नं गणतन्त्रात्मक देशय् जुजुया बुदिं हनेगु परम्परा मदुगु धासें वक्तापिन्सं तानाशाहि जुजुयात राज्यं हे बडामहाराजधिराज धायेगु व राष्ट्रपतिं हे जुजुयात स्वांमाः कोखायेकः वनेगु धइगु मछालापुस्से च्वंगु ज्या जूगु धासें सकसिनं कुंखिन । एकता दिवस व जुजुया नामय् ब्यूगु विदाया खारेज यायेत नं सकसिनं माग यात ।

नेपाःया आदिवासीपिन्त जातीय रुपं खण्डित यानाब्यूम्ह धासें पृथ्वीनारायण शाहया पुतला तकं च्याकूगु खः ।

छ्याकः ल्वहंतय् ज्याझ्वः क्वचायेकाः ब्वतिमिपिं किपूया चुल्लू ल्वँहतय् नं मुंगु खः । पृथ्वीनारायण शाहं किपुलिइ न्हापां आक्रमण याःबलय् किपूमिपिन्सं लिनाछ्वःगु इलय् व हे ल्वँहतय् चुल्लुया दःगु खःसा किपूमिपिन्सं थौंतकं नं उगु ल्वहंयात पुज्यायेगु याना वयाच्वंगु दु ।

व स्वयां न्ह्यः सकलें असनय् मुनाः अनं मोटरसाइकल र्याली पिकाःगु खः । थौं पृथ्वीनारायण शाहया बुदिंकुन्हु ब्यूगु विदाया विरोधय् ‘पृथ्वीनारायणं एकिकरण मखु, थःगु राज्य विस्तार जक याःगु खः, गणतन्त्रय् जुजुया बुदिं राज्यं हने दइमखु’ लिसेंया नारा च्वयातःगु प्लेकार्ड व नेवाः राज्यया ध्वाँय् सहित मोटरसाइकल र्याली किपुलिइ वंगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.