पुलांगु समलिंगी प्रवृतिया इतिहास

ने स‌ं ११३९ कछला गाः प‌चमी

सिग्मण्ड

विपरीत लिंगी यौन स्वापूया इतिहास ला उलि हे पुलां जू, गुलि मनूया सृष्टिया इतिहास पुलां जू । अथे ला समलिंगी यौन स्वापूया इतिहास नं झीगु सामान्य अनुमान स्वयां गाक्कं पुलां जु ।

foto google

वास्तवय् गुलि न्हापा निसें मानव समाजय् समलिंगी यौन स्वापू प्रचलनय् वल धकाः पाय्छि ठोकुवा यानाः धायेमफु । सम्भवतः थ्व यौन शास्त्रीतय् नितिं अनुसन्धानया खँ जुइफु । अय्नं आः तक जूगु अध्ययन अनुसन्धान व उपलब्ध प्रमाणया ल्याखं धायेगु खःसा म्होतिं नं प्यद्वः दँ न्ह्यः हे मानव समाजय् समलिंगी यौन स्वापूया प्रचलन शुरु जुइ धुंकूगु दु ।

आःया आधुनिक मानव सभ्यता शुरु जुइ स्वयां द्वलंद्वः न्ह्यः हे हलिमय् थी थी सभ्यताया अस्तित्व दयाच्वंगु खः । गथेकिः युनानी सभ्यता, मिश्र सभ्यता, सिन्धु घाटीया सभ्यता, रोमन सभ्यता आदि । मिश्र सभ्यताया इलय् उबल्या मनूतय्त उमि द्यः “होरस” व “सेन” समलिंगी खः धयागु विश्वास दूगु जुयाच्वन ।

ग्रिक सभ्यता कथं नं उब्लेया ग्रीकबासीतय् दथुइ समलिंगी यौन स्वापू शारिरीक व मानसिक तन्दुरुस्तीया नितिं छगू अत्यावश्यक खः धइगु धारणा दुगु जुयाच्वन । उमिसं समलिंगी यौन स्वापूयात परिवार नियोजनया छगू अत्यन्त पत्याः यायेबहःगु व अचुक उपाय कथं कयातःगु जुयाच्वन ।

उबले ग्रीकय् बारम्बार युद्ध जुयाच्वनीगुलिं शुरुइ समलिंगी यौन स्वापू दुपिं सैनिक जोडीतय्त युद्ध विजयया नितिं “शुभ” भाः पिइगु खः । ग्रीसया नां जाःम्ह दार्शनिक एरिस्टोरलं तकं समलिंगी यौन स्वापूयात समर्थन यासें उकियात राष्ट्रब्यापी आचरण कथं नालेमाः धकाः धाःगु खः ।

उब्ले ग्रीसया छम्ह विद्वान सोलन नांजाःम्ह कानून्विद् लानाच्वन । सोलन स्वयं नं छम्ह समलिंगी प्रेमी मनू लानाच्वन । सोलनं थुकियात कयाः थी थी नियम दयेकुसें दास वर्गया मिजं व मालिक वर्गया मिजं दथुइ समलिंगी यौन स्वापू तये मज्यू कथं प्रतिबन्ध तयाब्यूगु खः ।

थुकथं उब्लेनिसें हे ग्रीसय् समलिंगी यौन स्वापूतिं कानूनी मान्यता काःगु खनेदु । उब्ले ग्रीसय् नच्चाःपि) ल्याय्म्हतय्त वयस्क मिजंतय्सं बलात्कार तकं याःगु थी थी घटना जुयाच्वनीगु जुयाच्वन ।

संसारय् अज्याःगु थाय् दइ हे मखु जुइ, गन छुं नं छुं मात्राय् समलिंगी यौन स्वापूया प्रचलन मदु । पश्चिमी देशय् समलिंगी यौन स्वापू तसकं पुलां । फ्रान्सया सम्राट नेपोलियन बोनापार्टं थ्व प्रवृतियात गुबलें अपराध कथं मकाः हँ । अथेहे जर्मनीया हिटलर स्वय्म हे समलिंगी यौन प्रेमी लानाच्वन । फ्रान्सया म्यारेट, बेलायतया सेक्सपियर वेकन, वाल्ट विटम्यान, हेन्स एण्डरसन, अस्कर वाइल्ड, आदि सकलें नांजाःपिं युग पुरुष समलिंगी यौन स्वापूया समर्थकत खः ।

https://www.facebook.com/rajendra.manandhar.7906

समलिंगी यौन स्वापूतिं विश्व साहित्ययात नं थाय् काःगु खनेदु । उर्दु व फारसी भाषाया काव्यय् यज्जुतय्गु वर्णन पुलिंगं हे यानातःगु खनेदु । सन् १८९८ निसें १९०८ तकया झिदँ दुने जर्मन भाषां जक समलिंगी यौन स्वापूयात कयाः थ्यंमथ्यं झिद्वः सफू पिहाँ वःगु अजू चायापुगु रेर्कड दु ।

एशिया महादेशय् धाःसा समलिंगी यौनाचारया प्रचारप्रसार थन वःपिं मेमेगु लागाया मनूतय्सं याःगुु खनेदु । यौन शास्त्रीतय्सं समलिंगी यौन स्वापूयात कयाः यक्व अध्ययन याये धुंकूगु दु । सन् १९५१ स यौन मनोवैज्ञानिक फ्रान्कविच व मानवशास्त्री क्लेमान कोर्डं मंकाः अनुसन्धान यानाः हलिमया ७६ समाज मध्य्ये ४९ समाजय् ला समलिंगी यौन स्वापूया प्रवृति दु धकाः ठोकुवा याःगु दु ।

साभारः स्वनिगः वाः पाै

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.