पाहाँचःह्रे नखःया छपुलु

११३८ चिल्लागा त्रयाेदशी/येँ

रेखा शाक्य

पाहाँचःह्रे नेवाःतय्सं हनिगु तःजिगु नखः मध्ये छगू महत्वं जाःगु नखः खः । स्वन्हु तक नखः हनिगु नखः । लुकुमहाद्यःया पुजा, मह्रः जा नकेगु व  अजिमाद्यः तताकेँहेपिं नापलायेगु जात्रा । तन्त्रशास्त्रया सिद्धान्त कथं चःह्रे धइगु तःधंगु सिद्धि दइगु तिथि खः । थुगु दिंया चान्हय् तान्त्रिक विधिकथं पुजा विधि पूवंकल धाःसा तःतःधंगु सिद्धि प्राप्त जुइगु जनविश्वास दु ।

पाहाँचःह्रे कुन्हुया नितिं धकाः सागालय् वा अन्य फोहर दुगु थासय् वा लँपुइ ल्हाना च्वंथाय् तकंया महाद्यःयात सफा यानाः वा गाः म्हूयाः उम्ह महाद्यःयात पुजा याइगु दिं खः । थ्व दिं कुन्हु छेँ छखां सुचुकुचु याना नी सिइ यायेमाः ।

लुकुंमहाद्यः । किपा रेखा शाक्य

महाद्यः अथे छाये लुकुंबिल वा सुलाच्वन धइगु बारे विभिन्न किवंदन्तित दु । उकि मध्ये छगू थुकथं दु । भष्मासुर राक्षसया कठोर तपस्यां लय्ताया महाद्यवं दर्शन बिल । राक्षसं थःम्ह थिउगु सकतां भष्म जुइमाः धइगु वर फ्वन । “तथास्तु”  धकाः  धायेवं व हे परिक्षण महाद्यःयात यायेत स्वयेवं महाद्यः बिस्यूं वन । भष्मासुरं लितुलिना यंकेवं गन सुले गन जुयाः सागालय् सू वन धैगु जनउक्ति दु ।

थथे खिउँगु थासय् सुलाच्वंम्ह द्यः जुयाः महाद्यःयात पाहाँचःह्रेबलय् सुर्द्यः बिइधुंकाः बहनी पुजा याइगु खः । थ्व दिं कुन्हु सुथय् हे त्वाः त्वालय् गन गन लुकमहाद्यः दु अन अन गाः खनाः सफा याइ । बँ थिला अबिरं ह्वला तइ । अथेहे लुँबुँ (पाछैया बुँ) व वहः बुँ (लैंमाया बुँ) या मां तयाः छायेपिया तइ ।

खय्तला महाद्यःयात थ्वँ, अयलाः, ला तयाः पुजा याइमखु तर पाहाँचःह्रे कुन्हु छन्हु धाःसा थुपिं सकतां तयाः पुजा याइ । थथे महाद्यःयात मद्यमांस तयाः पुजायाइगु लिउने नं छगू कथं किवंदन्ति दु । महाद्यः जोगी पहःम्ह । भांग, गाजा, धतूर त्वनीम्ह शुद्ध शाकाहारी । पार्वती धाःसा मांसाहारीम्ह । उकिं छन्हु भाःतयात ला खेँ, अय्लाः थ्वँ तयाः मद्यमास भपिइत इनाप याःगु जुया च्वन ।

पाहाँचःह्रेया लसताय् लाभा तरकारीया लिसें भ्वय् ब्वः तया द्यः पुजा याये त्यंगु । किपा रेखा शाक्य

कलाःया इनापयात म्हाः धकाः नं धायेमफत । उकिं खुल्ला रुपं भोजन याये मछालाः पशुपतिं दक्षिणरिखे छगू खुल्लागु तूब्वः (तुकं बुँइ) पिशाचया रुप कयाः मांसाहारी भोजन यात धाइ । थथे भोजनयाःगु दिं हे पाँहाचःह्रे वाय् कृष्ण चतुर्दशी लाःगुलिं उगु दिंयात पिशाच चतुदर्शी नं धायेगु याः ।

पाहाँचःह्रेया न्हि कुन्हु सुथनिसें हे त्वाःत्वालय् मस्त मुनाः बाजं थानाः त्वालय् छगू लागां मेगु लागाय् तक इरुथिरु जुया बाजं थाना जुइ । “कंसं निसें वये मखु लाभा तरकारी नये मखु” धइगु बोलय् बाजं थाइ । गुकिं यानाः त्वालय् नखः न्याःगुया न्ह्यइपुगु लकस ब्वलनी ।

पाहाँचःह्रेया बाजं थाना च्वंगु । किपा रेखा शाक्य

बहनी लुकुमहाद्यःयात पुजा यायेबलय् नं ला, अय्लाः,थ्वँ, वाउँगु लाभा, तरकारी तयाः भ्वय् ब्वः छाये हइ । थुगु इलय् चम्चाय् चिकं इला महाद्यःयाथाय् मत बिइगुलिइ अजः नं फइ । व हे अजः सकसिनं भ्वय् भपिइ धुंकाः मिखाय् “खुँया मिखा कां कां जिगु मिखा तेल्ला, तेल्ला धाधां “अजः उलिइगु चलन नं दु । थथे अजः उलेबलय् भूतप्रेत, पिशाच, डंकिनी थेंज्याःपिं मभिंगु आत्मापाखें थी फइमखु, पीर बाधा चिलावनी धइगु जनविश्वास दु ।

न्यतभलु अजिमा न्यतया दबलिइ प्याखं हुलेगु झ्वलय् । किपा रेखा शाक्य

दँयदँसं हे चह्रे कुन्हु बहनिइ न्यतया द्यः छेँय्ं न्यतअजिमा व मेपिं झिंछम्ह देवगणपिं बाजागाजा न्ह्यःने तयाः बस लायाः न्यतया दबलिइ बिज्याकिइ । उगु द्यः गणयात लसकुस यायेत मेमेगु बाजाया लिसें आपालं भक्तजनपिं नं द्यःयात पुजा यायेत लँपुइ जवंखवं धुँ धुपाँय च्याकाः पुजा याइ । अन सकलें द्यःपिन्त दबलिइ द्यः ल्हाकिइ । उगु प्याखं चान्हय् निसें कन्हे कुन्हु न्हिनय् तक हे न्ह्याइ । दकलय् लिपा द्यः गणपिन्त बलि बिइ धुंकाः थुगुसिया न्यतअजिमाया प्याखँ हुइगु क्वचाइ ।

मह्रः जा नके न्ह्यः किलाघलय् लुकुमहाद्यः पुजा याना च्वंगु किपा रेखा शाक्य

थ्व हे दथुइ आमैया दिनस थासं थासय् यःसिं नं थःनिगु ज्या जुइ । अथे हे थासं थासय् मह्रजा नं नकेगु याइ । न्हापा न्हापा मस्तय्त छुं ल्वचं कःल धाःसा थौंकन्हे थें थी थी वासः नकेगु चलन मदु । मस्तय्त मह्रःजा नकल धाःसा छुं नं ल्वचं कइमखु, अह्रिं चाइमखु धइगु जनविश्वास दु । मह्रः धइगु जंक्व मयाःनिपिं, दुरुवा महाःनिपिं मस्त, इहि मयाःपिं व बरे मछूनिपिं मिजंमस्तय्त छुं ल्वय् मजुइमाः धकाः तान्त्रिक बिधि कथं थुयातःगु छगू पवित्र जा खः ।

मह्रः जा नयाः च्वंगु । किपा रेखा शाक्य

व हे जाः थासं थासय् त्वालय् महाद्यःयात पुजा यानाः प्रसादया कथं नकिगु खः । थथे मह्रः जा नकिइगु इलय् गुथि पाखें जा, माय्, बुवः, ला, पालु, खय्पि, चय्पि, तुकंचा, हाकु मुस्या, कःसुविलि,पःमाय्, सतुगुलि, पिम्हुकं, मायबिलि, गुनुचा वा सकीमय् तयाः सिन्ह तिके धुंकाः लप्ते वा केरा लप्ते तया झ्वलिक मस्तय्त नकिगु खः । अथेहे थुगु हे इलय् सुयां छेँ सुं दुजः मदुगु खःसा दुरु, थ्वँ, चकलेट, बिस्कुट आदि इत्यादि नं बिइ हइगु चलन दु ।

मह्रःजा नकिगु थाय् मरुसतः मरु,कंग, किलाघः,त्यःर, ज्याथा, दुगंबही,तारिणीबहाः, वंघः, क्वहिति, भलंननी ब्रम्हत्वाः, लगंत्वाः, तेबहाः, ब्रम्हत्वाः, भिंद्यःत्वाः, प्यंगः थां, महाबू,चिकंअत, श्वेत गणेद्यः न्ह्यःने, कुसुमबियालाछि व त्यत खः । मह्रः जा नकेगु ई थाय् कथं पानाच्वंगु दु । गनं सुथय् गनं न्हिनय् सा गनं चान्हय् नकिइ ।

ज्याथाय् मह्रःजा नकेगु झ्वलय् । किपा रेखा शाक्य

अथे हे मेगु जात्रा धइगु द्यः ल्वाकेगु जात्रा । द्यः ल्वाकेगु धकाः अजिमाद्यःया तताकेँहेपिं नापलाकेगु व तिंप्वाः हिलाबुला याइगु नखः यात धाइ । थ्व चैत्र कृष्ण चतुर्दशीया कन्हे कुन्हु याइ । चान्हय् तिंख्यलय् च्याम्ह अजिमा मध्यय् स्वम्ह तताकेँहेपिं अजिमा द्यःपिं नाप लाकिगु याइ । लुँमधि अजिमाया वटु व तेबहाः पुचः नापं कंग अजिमाया खः ल्वाकिइगु खः ।

तिंख्यलय् द्यः ल्वाकाच्वंगु । किपा शरण डंगाेल

 

अथेहे असनय् न्हिनय् स्वम्ह तताकेँहेपिं अजिमाद्यः या खः ल्वाकिगु खः । उगु इलय् छेँ छेँ चटामरी नं ह्वलेगु याइ । असंया भिंतुना गुथिं दँयदसँ चटामरी ह्वला वयाच्वंगु दु । थथे द्यः ल्वाकिइगु धइगु दच्छिया छक्वः अजिमापिनि तताकेँहे नापलाइगु खः । अथे हे चीधिकःपिन्सं तःधिकःपिन्त हनाबना तयाः भागियाये कथं असनय् द्यः ल्वाकिइगु खः । द्यः खः ल्वाकिइगु इलय् तेबहाः खलःया म्हासुगु, वतु खलःया वँचुगु व कंग खलःया ह्याउँगु तपुलि पुनाः वइगु चलन दु ।

असनय् द्यः ल्वाकाः च्वंगु । किपा रेखा शाक्य

बंशावली कथं कलिगत संवत् ३८२५ स जुजु श्री गुणकाम देवं येँ दे दयेके धुंकाः देय् या च्यागू दिशाय् च्याम्ह शक्ति पीठ अजिमात तान्त्रिक विधिकथं नी स्वनाः देय्यात रक्षा याःगु खः धाइ । थ्व च्याम्ह अजिमापिं लुँमधि अजिमा, कंग अजिमा, म्हय्पि अजिमा, तकति अजिमा, मय्ति अजिमा, न्यतभलु अजिमा, बछला अजिमा, लुँतिमरु अजिमा खः ।

पाहाँचःह्रेकुन्हु विशेषयाना किलाघःया गणेद्यः, त्यंघःया गणेद्यः, न्हाय्कं त्वाःया उग्रतारा, प्यंगः थांया नर्सिंग आजु, महाबूया लुँचुमरु अजिमा, न्यतभुलु अजिमा आदिपिनिगु जात्रा नं जुयाच्वनी । अथे हे तिंख्यलय् सल याः नं न्ह्याइ सा उगु सल याः स्वयेत लाय्कु कुमारी नं पिहाँ बिज्याइ ।

नेवाःतय्गु तःजिगु नखः जुगुलिं नेवाः परम्परा कथं थःथिति, म्ह्याय्मस्त, भिनामस्त व पासाभाइपिन्त सःता हनाबना तयाः थःथःगु छेँ पाहाँ ब्वना नकेगु चलन नं दु उकिं थुकियात पासाचह्रे नं धायेगु याः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.