पत्रकारितायात समावेशी दयेकेत संगठनया सहकार्यय् बः

११३८ चिल्लागा सप्तमी/यल

समावेशी पत्रकारिताया लागिं सञ्चार सम्बद्ध संघसस्थात जानाः न्ह्याःवनेमाःगु खँय् यलय् जूगु छगू ज्याझ्वःया वक्तापिन्सं बः ब्यूगु दु ।

तामाङ सञ्चार समूह यलया बिहीबाः यलय् क्वचाःगु न्हापांगु अधिवेशनय् सम्बद्ध व्यक्तिपिन्सं राज्यसत्तां ल्यूने लाःपिं वा लाकाब्यूगु वर्ग व समुदायया मुद्दायात सञ्चारमाध्यम थाय् बीकेत नं संघसंस्थात जानाः न्ह्याःवनेगुया पले मदुगु वक्तापिन्सं धाःगु खः ।

अधिवेशनया उलेज्या यासें गोदावरी नगरपालिकाया उपप्रमुख मुना अधिकारीं नगरपालिकां पत्रकारतय्त दक्ष दयेकेत माःकथंया ग्वाहालि यायेगु प्रतिबद्धता प्वंकादिल । उपप्रमुख अधिकारीं पत्रकारतय्त संगठनं जवाफदेही दयेकेत महत्वपूणर््ा भूमिका म्हितीगु खँय् विश्वास प्वंकादिल ।

तामाङ संचार समूहया केन्द्रीय न्वकू दिपेन्द्र दोङ, समूहया केन्द्रीय महासचिव विष्णु मोक्तानं सञ्चार ख्यःयात समावेशी दयेकेत पुचलं याना वयाच्वंगु ज्यायाबारे जानकारी ब्युसें सूचना व राज्यसत्तां वहिष्करणय् लाःगु तामाङतय् मुद्दायात सञ्चारमाध्यमय् माःकथं थाय् बीकेत सकललिसे सहकार्य यानाः न्ह्याःवनेगु धयादिल ।

नेवाः पत्रकार राष्ट्रिय दबूया केन्द्रीय महासचिव सुनील महर्जनं दलीय आस्था व निकटताया लिधंसा पत्रकारत संगठित जुइगुलिसें निगू दशकनिसें जातीय लिधंसाय् नं पत्रकारतय्गु संगठन चायेकेगु ज्यां तीब्रता काःगु न्ह्यथनादिल । महासचिव महर्जनं पत्रकारितायात समावेशी दयेकेत थज्याःगु हे प्रकृतिया संगठनतय् दथुइया सहकार्य माःगु खँ ल्ह्वनादिल ।

जातीय पत्रकारयागु संगठन दक्ष पत्रकार उत्पादन यायेत, पत्रकारिताया हकहितया लागिं ल्वायेत नीस्वंगु जूगुलिं थुकिं नेपाली पत्रकारिताया चाकःयात तब्याकीगु नं महासचिव महर्जनया धापू खः ।

नेपाल पत्रकार महासंघया केन्द्रीय दुजः जानुका बरालं आर्थिक सुनिश्चितता मदुगुलिं पत्रकारत विस्थापित जुइमालाच्वंगु न्ह्यथनादिल । चीधंगु लगानीया पत्रिकात न्ह्याकाच्वने फइगु लकस तयार यायेत नगरपालिका, गांपालिकां माःकथं भूमिका म्हितेमाःगुलिइ बरालं बः बियादिल ।

नेपाल पत्रकार महासंघ यल जिल्ला नायः ज्ञानप्रसाद पौडेल, तामाङ संचार समूहया नायः साहिला तामाङ, प्रेस सेन्टर यलया नायः रामहरि कार्की, प्रेस युनियन यलया न्वकू केदारनाथ दाहालं पत्रकारिताया हकहितया सकललिसे जानाः न्ह्याःवनेमाःगु खँय् बः बियादिल ।

पुचलय् साहिला तामाङ नायः ल्यल

अधिवेशनं साहिला तामाङ (रासस) या नेतृत्वय् ११ दुजःया न्हूगु कार्यसमिति नं ल्यःगु खः ।

लिसें न्हूगु कार्यसमितिइ जिबी लामा (जनता टिभी) न्वकू, छ्यान्जेय् लक्ष्मी तामाङ (रेडियो पर्याबरण) व कविराज तामाङयात दांभरिं ल्यःगु दु ।
दुजलय् वविता घिसिङ (नेपाल खबर डटकम), शान्ति थिङ (सेतोपाटी डटकम), बाबुलाल स्याङतान, श्याम लामा, प्रकाश तामाङ (तामाङ डाजाङ मासिक) व बुद्धराम थिङ ल्यःगु दु ।

उगु हे अधिवेशनं नायः साहिला तामाङ, शान्ति तामाङ व सुरेश तामाङ (नेपाल समाचारपत्र) यात न्याक्वःगु राष्ट्रिय महाधिवेशनया लागिं सिफारिश याःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: