पंचायतकालीन सडक ऐन खारेज यायेमाःगु खँय् नयाँ शक्तिया उम्मेदवारपिनिगु बः

कछलागा षष्ठी ११३८ बिहिबाः
येँ÷न्ह्यःने वयाच्वंगु प्रतिनिधि व प्रदेश सभा निर्वाचनय् नेवाः राष्ट्रिय परिषदया नयाँ शक्ति पार्टिपाखें ३ नम्बर प्रदेशय् उम्मेदवारी ब्यूपिं नेवाः उम्मेदवारपिनिगु नां घोषणा जूगु दु । थौं परिषदं येँय् घोषणा सभाया लिसें पत्रकार सम्मेलनया ग्वसाः ग्वयाः उम्मेदवारपिनिगु नां लिसें थःपिनिगु एजेन्डा घोषणा याःगु खः ।
ज्याझ्वलय् नयाँ शक्तिपाखें प्रदेश नम्बर ३ या लागिं प्रदेश सभापाखें समानुपातिक उम्मेदवार नेवाः राष्ट्रिय परिषदया सुरेश शाहिं उम्मेदवारपिनिगु नां घोषणा यासें सकलसिगु म्हसिका नं बियादिल ।

नुगः खँ तयेगु झ्वलय्, प्रतिनिधि सभापाखे समानुपातिक उम्मेदवार अनुपसिंह सुवालं थःपिनिगु मू एजेन्डा धयागु हे प्रदेश नम्बर ३ यात पहिचान सहितया नेवाः प्रदेशया रुपय् स्थापित यायेगु धयादिल । सुवालं आः जुयाच्वंगु सडक विस्तार गैर न्यायिक रुपं जुयाच्वंगु धासें थुकियात तत्काल दिकाः पंचायतकालीन सडक ऐन पूवंक हे खारेज यायेमाःगु धयादिल । अथे हे नयाँ शक्ति पार्टिया नेता हिसिला यमिं आः नेवाःतय्सं थःगु व थः सन्ततिया भविष्ययात बिचाः यानाः मतदान यायेत आव्हान यानादिल । आः जुइत्यंगु निर्वाचनयात सदुपयोग यासें आर्थिक क्रान्ति यानाः देय्यात समृद्धिपाखे यंकेगु थःपिनिगु अभियानय् सकलसित नापं न्ह्याःवनेत नेता यमिं आव्हान यानादिल ।
प्रतिनिध सभापाखे क्षेत्र नम्बर १० या प्रत्यक्ष उम्मेदवार पंचलाल महर्जनं देय्या समृद्धि झीगु हे पालय् यायेफइगु धासें थुकिया नितिं स्थीर सरकार आवश्यक दुगु धयादिल । तारन्ताः सरकार हिलीगु प्रवृत्तीं देय्या विकासय् लिच्वः लाकाच्वंगु अवस्थाय् थःपिन्सं देशय् स्थीर सरकारया लकस ब्वलंकाः समृद्धिपाखे देय्यात न्ह्याकायंकेगु महर्जनया धापू खः । ज्याझ्वः प्रतिनिधि सभापाखे क्षेत्र नम्बर ९ या उम्मेदवार भीमकुमार महर्जनं न्ह्याकाद्यूगु खः ।
नयाँ शक्ति पार्टिं आसन्न प्रतिनिधि व प्रदेश सभा निर्वाचनया लागिं आर्थिक विकास व समृद्धि, समावेशी समानुपातिक लोकतन्त्र, प्रत्यक्ष निर्वाचित सरकार, हाकु बजारी व भ्रष्टाचार नियन्त्रण थुज्वःगु नारात पितहःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.