‘न्हूपुखूया पुनर्निर्माण पुरातत्वया मापदण्ड कथं या’

११३८ पोहेंलाथ्व दशमी/येँ

सरकारं न्हूपुखूया पुनर्निर्माण पुरातत्व विभागया मापदण्ड कथं हे यायेत येँ महानगरपालिकायात निर्देशन ब्यूगु दु ।

वंगु २०७२ वैसाख १२ गतेया भुखाचं क्षतिग्रस्त जूगु न्हूपुखुया पुनर्निर्माणया सम्बन्धय् थौं च्वंगु मन्त्रिपरिषदया वैठकं येँ महानगरपालिकायात थथे निर्देशन ब्यूगु खः ।

येँ महानगरपालिकां न्हूपुखू पुनर्निर्माणया झ्वलय् पुखुलिइ लः मथाःगु धासें क्रंक्रिट ढलान याःगु खः । ऐतिहासिक पुखुलिइ उकथं क्रंक्रिटया ढलान यायेमज्यूगु धासें स्थानीयं विरोध याःगु खः ।

व झ्वलय् वंगु मंगलबाः पुरातत्व विभागया मापदण्ड कथं हे ज्या यायेमाःगु माग यासें स्थानीयं उपमेयरया उपस्थितीइ न्हूपुखुलिइ तालाबन्दि नं यानाब्यूगु खः । स्थानीयं ग्वयाब्यूगु ताः मेयरं धाःसा तछ्यानाब्यूगु खःसा वयां लिपा विवाद झन तच्वःगु खः ।

न्हूपुखू पुनर्निर्माणया सवालय् मेयर व उपमेयर दथुइ हे विवाद खनेदयेधुंकाः सरकारं थौं न्हूपुखू पुनर्निर्माणया ज्या पुरातत्वया मापदण्ड कथं यायेत येँ महानगरपालिकायात निर्देशन ब्यूगु खः ।

थ्व हे दथुइ न्हूपुखू पुनर्निर्माणया ज्या १५न्हुया लागिं द्यूगु दु । विवादया हे हुनिं पुरातत्व विभागं न्हूपुखू पुनर्निर्माणया ज्या १५न्हुया लागिं स्थगित जूगु विभागं न्ह्यथंगु दु ।

थुकिया नापं न्हूपुखूया पुनर्निर्माण पुरातत्वया मापदण्ड कथं जुइमाःगु माग यासें विरोधय् कुहांवःपिं स्थानीयं न्हूपुखूया अस्तित्व न्हंकेगु ज्या मयायेत चेतावनी नं ब्यूगु दु ।

स्वनिगःया सम्पदा बचाउ अभियानय् जानाच्वंगु पुचःया छम्ह अभियन्तां झीगु.कमलिसे खँ ल्हासें देगः, भवन वा भौतिक संरचना जक मखसें ऐतिहासिक पुखू नं नेपाःगाःया सम्पदा खः धकाः लुमंकेत येँ महानगरपालिकायात इनाप याःगु दु ।

क्रंक्रिट ढलान यानाः अथवा थन व्यापारीकरण यानाः पुखूया ऐतिहासिक महत्व न्हंकेत स्वल धाःसा थुकिया लिच्वः येँ महानगरपालिकां फयेमालीगु उम्ह अभियन्तां धाःगु दु । थज्याःगु अवस्थाय् जनसागर हे सडकय् कुहांवइगु धाःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: