न्हापांगु पलाःया न्ह्यानाच्वन पलाः ज्याथजिथिया नितिं

 

११३८ बछलाथ्व पुन्हि /येँ

२५६२ क्वःगु बुद्ध जयन्तिया लसताय् न्हापांगु पलाःया ग्वसालय् ज्याथ जिथिपिन्त म्हिगः निशुल्क सेवा प्रदान यात । थुगु ज्याय् जैशी देगः क्वसं च्वंगु हुकुम मालिस तेलपाखें न्हापांगु पलाःया करीब ६०म्ह दुजः जुयाच्वनादिपिंया लिसेंं अन्य म्हिगः  झायादिपिं ज्याथजिथिपिन्त निशुल्क मालिसया लिसें वासः नं इनाब्यूगु खः ।

किपा-रेखा शाक्य

शान्तिया दुत बुद्ध भगवानया जन्मदिंया पावन अवसरय् जुगु ज्याझ्वलय्  मू पाहाँ प्रदेश सभाया सभासद क्षेत्र नं ३ या राजेश शाक्यजुं देवाःय् मत च्याकाः ज्याझ्वःया शुभारम्भ यानादीगु खः ।

किपा-रेखा शाक्य

मनुखं मनूया सेवा यायेगु धइगु हे मानवधर्म खः । बुद्धं बियावंगु शिक्षा धइगु नं थ्वहे खः धयादिसें   न्हापांगु पलाखं यानाच्वंगु मानवसेवा व उकियात लिधँसा बिया हुकुम मालिस तेलपाखें गुगु निशुल्क सेवा प्रदान यात व तसकं च्वछायेबहःगु खँ खः धयादिल ।  मां अबु धयापिं जन्मदाता व कर्मदाता खः । छम्ह मचाया नितिं मां अबु हे न्हापांगु जग खः । छखा छेँ सदां धस्वना च्वनेत जग हे बल्लायेमाः । थ्व खँ सदां नुगलय् स्वचाके फःसा छेँया लकस सदां न्ह्याइपुइगु खँ धयादिल ।

ज्याझ्वलय् न्हापांगु पलाः(नेवाः मिसा पुचः)या नीस्वनामि नकिं शिला साय्मिं उगु संस्था नीस्वनाया तातुना कनादिसें ज्याथजिथिपिन्त अप्वःयाना जुइगु ल्हाःतुति, म्हः स्याःगुइगु व अन्य नशा सम्बन्धि ल्वचं कमजोर याइगु हुनि थुकथंया ज्याझ्वः यानागु खँ न्ह्यथनादिल ।

किपा-रेखा शाक्य

म्हगः स्वस्थ व मन सन्तोष जुसा जक हे छखा छेँया लकस नं सदां सदाबहार जुयाच्वनीगु खँयात कुलादिसें वडा नं १२, २० व २१ लागाय् च्वंपिं ज्याथजिथिपिन्त न्हि निघौ उगु संस्थाय् वयाः याक ई छ्यायेगु नितिं लुखा चायेका तयागु व अन झायादिपिन्त थःम्ह मन जक मखसें तन नं स्वस्थ यायेगु लकस ग्वयागु खँय् न्हापांगु पलाः व नेवाः मिसा पुचः सदां न्ह्यज्यानाच्वंगु नुगः खँ तयादिल ।

ज्याझ्वलय् नुगः खँ तयेगु झ्वलय् हुकुम मालिस तेलया प्रोपाइटर राजेन्द्र मानन्धरजुं थःपिन्सं झिदँ न्ह्यःनिसें थुकथं सेवा यानाच्वनागु खँ कनादिल । विशेषयाना गुरुपुन्हि, गोरख जयन्ती, कतिं पुन्हि, बुद्ध जयन्तीया लिसें बुंगः द्यःया जात्रा जुइबलय् सुथय् सुथय् अन झायादिपिं ज्याथज्याथिपिन्त निशुल्क सेवा बियावयाच्वनागु खँ कनादिल ।

किपा-रेखा शाक्य

अथेहे न्हियान्हिथं जैशी देगःया क्वसं थःगु पसलय् सुथसिया ६ बजेनिसें ८ बजे तक अक्यूप्रेसर थेरापी व परम्परागत मालिस अन झायादिपिन्त निशुल्क रुपं याकावयाच्वनागु  खँ  धाःसें थःपिनिगु सेवां सकलें लय्तागुलिं थःपिनिगु ज्याय् अझ अप्वः उत्साहित जुयागु खँ कनािदल ।

म्हिगःया ज्याझ्वलय् नेवाः पत्रकार राष्ट्रिय दबू येँ जिल्लाया नायः नातिकाजी महर्जनजुया नापं  गाैरी श्रेष्ठ नं नुगः खँ तयादिगु खः।

किपा-रेखा शाक्य
किपा-रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.