न्युयोर्कया फिल्म फेस्टिभलय् निम्ह नेपाःमिया संकिपा

११३८ पोहेंलागा आमै/येँ

अमेरीकाया न्यूयोर्कय् जुया वयाच्वंगु प्रतिष्ठित संकिपा नखः क्विन्स वर्ल्ड फिल्म फेस्टिभलय् थुगुसी निम्ह नेपाःमिया संकिपा नं ल्यज्याय् लायेत ताःलाःगु दु ।

थुगुसी न्यूयोर्कय् जुइत्यंगु क्वीन्स वर्ल्ड फिल्म फेस्टिभलया ८क्वःगु संस्करणय् पत्रकार अनुज थापाया डकुमेन्ट्रि व निर्देशक रोशन विक्रम ठकुरीया सर्ट फिल्म ल्यज्याय् लायेत ताःलाःगु खः ।

छगू इलय् न्यूज २४लय् लोकंव्हाःम्ह न्यूज एंकर अनुज थापाया १० मिनेट ताःहाकःगु डकुमेन्ट्रि ‘ फाइटिग फर जस्टिस’ फेस्टिभलय् क्यनेत्यंगु खः । उगु वृत्तचित्रय् छगू मुस्लिम परीवारं न्यायया लागिं याना वयाच्वंगु संघर्ष क्यनातःगु दु ।

वृत्तचित्रय् पत्रकार थापां लिपांगु इलय् अमेरिकाय् विशेष यानाः मुसलिम समुदाय विरुद्ध अप्वयाच्वंगु घृणायात न्ह्यब्वयेत स्वःगु दु । वृत्तचित्रय् दच्छि न्ह्यः न्युयोर्क शहरय् हे छम्ह मुसलिम धर्मगुरु व वया पासायात तिन्हिहनय् हे स्यानाब्यूगु विषययात ल्ह्वनातःगु दु ।

फाइटिंग फर जस्टिस वृत्तचित्रया निर्देशक अनुज थापा

डकुमेन्ट्रि मेकर थापा थौंकन्हय् अमेरीकाया न्यूयोर्कय् हे च्वनाः पत्रकारीता याना वयाच्वंगु दु ।

अथे हे नेरेटिभ विधाया निर्देशक रोशन विक्रम ठकुरीया सर्ट फिल्म ‘सिल्भर ब्याङ्गल्स’ नं फेस्टिभलय् क्यनेत्यंगु दु । संकिपाय् सशस्त्र द्वन्दया इलय् छम्ह मिसां थःगु वैवाहिक जीवन ल्यंकेत याःगु कुतः क्यनातःगु दु ।

फेस्टिभलया नितिं थीथी विधाया लागिं ६५० संकिपा दुतिंगुलिइ १८० जक ल्यज्याय् लायेत ताःलाःगु खः । ल्यज्याय् लाःगु संकिपात वइगु मार्च १५ निसें २५ तारिखतक्क न्युयोर्क शहरया क्वीन्सय् क्यनेत्यंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.