नेवाः लहना विश्व सफाई अभियान अाज्जु २०७८ सालंनिसें मानवीय फोहररहित यायेगु




ने स‌ं ११३८ कौलागाः नवमि/ किपू

रेखा शाक्य

“समाज सफा धइगु सुनां नं याना मखु थःम्ह नि न्ह्यलुवाः जुया न्ह्यःने वना ज्या यायेमाः अले तिनि ज्यां पलाः न्ह्याकी अले व हे पलाखय् मेपिनिगु पलाः नं छस्वाः जु वइ ।”

किपाः रेखा शाक्य

थ्व धापू विश्व सफाई अभियानया अभियन्ता राजमान मानवजुं वंगु छवाः न्ह्यः किपुलिइ थःगु हे छेँसं छगू पत्रकार सम्मेलन याना धयादिगु खः । उगु हे झ्वलय् वयकलं नेवाः लहनाया आः तक जुयाच्वंगु व यानाच्वंगु ज्याखँ व गतिविधिया बारे पत्रकारपिन्त विस्तृत जानकारी नं बियादिगु खः ।

किपाः रेखा शाक्य

थःजन्मदाता लक्ष्मी माया महर्जनयात सभाध्यक्ष यानाः न्ह्याःगु उगु ज्याझ्वलय् वय्कलं जनमानसय् किपुलिइ नेवाः लहना धायेवं नेवाः नसाज्वलं भपिगु धकाः जक म्हसकिा दयाच्वंगुलि अन नेवाः लहना पाखें आः तक यानाच्वंगु ज्याखँत धकाः नेवाः लहना बेकरी, टेलरिंग, नेवाः नसा, नेवाः पसःया नापं जंकु क्वचापिनिगु नितिं दयेकाच्वंगु भवनया लिसें अन हे दूगु फल्चाय् न्हियान्हिथं मुनेगु व्यवस्था व न्हिनसिया बजि नकेगु व्यवस्था तकं याना च्वनागु खँ पत्रकारपिन्त स्थलगत भ्रमण याकुसें क्यनादिगु खः ।

किपाः रेखा शाक्य
जंक्व क्वचाय्धुंकुपिं अजा अजिपिन्त च्वनेगु नितिं व्यवस्था याना तःगु फल्चा

 

किपाः रेखा शाक्य
नेवाः लहनापाखें संचालित बेकरी उद्याेग

दकलय् न्हापां २०६७ साल भाद्र महिनां निसें थःगु जीवन सफाई अभियानय् हे फ्यानादिम्ह वयकलं किपू महोत्सवय् ५ न्हु तक ४० रोपनी जग्गाया ४० दँ पुलांगु डम्पिंग साइडया झारपात व फोहरयात व्यवस्थित याना सफाई याःगु खः । अनलिपा २९ म्ह मिसापिनिगु पुचः दयेकाः ५५०० मिसापिं छथासं मुंकाः १ घौया दुने किपूया डाँडा यचुकेगु ज्या यात ।

किपाः रेखा शाक्य
नेवाः लहनापाखें संचालित पसः

किपुलिं न्ह्याःगु वय्कःया सफाई अभियानय् वय्कःया सहयात्रीपिं शुशिला मर्हजन व कमला महर्जन जाना येँ, यल, ख्वपया लिसें येँया पिने हेटौंडा, चितवन, पोखरा, धरान, जनकपुर, विराटनगर, दांग, सुर्खेत, घोराही, बुटवल, धनगढी, नेपालगंजया लिसें अन्य थासय् व नेपालंपिने भारत, बंगलादेशय् नं सफाई अभियान यायेधुंकुगु दु ।

वय्कःया आः यायेमानिगु उद्देश्य कथं १०००००० मनूत मुनाः येँय् १ घौया दुने हे यचुपिचु यायेगु खःसा वि सं २०७८ सालंनिसें मानवीय फोहररहित यायेगु, विश्वय् सन् २०२८ निसें मानवीय फोहररहित यायेगु खः ।

किपाः रेखा शाक्य
नेवाः लहनापाखें संचालित टेलरि‌ग

थुकिया नितिं वय्कःया पुचलं विभिन्न सरकारी निकाय, एन जि ओ, आइ एन जि ओ, स्वास्थ्य कर्मचारी, निजामती कर्मचारी, नेपाल स्काउट, पर्यटन व्यवसायीया लिसें अन्य संघसंस्थायात अवधारण पत्र थ्यंकागु व नापलायेगु ज्या जुइ धुंकुगु जानकारी बियादिल ।

किपाः रेखा शाक्य
जंक्व क्वचाय्धुंकुपिं अजा अजिपिन्त च्वनेगु नितिं व्यवस्था यायेत दयेका च्वंगु छेँ ।

 

किपाः रेखा शाक्य

थुगु विश्व सफाई अभियानय् न्ह्याम्ह मनुखं नं जि धकाः वाः चायेका ब्वति कायेत इनाप यासें जि व छि जाना झी जुया विश्वया न्ह्यःने नेपाःयात अथेहे हलिंयात हे नं यचुपिचु यायेमाःगु सन्देश बिइगु व मनूतय्गु फोहरयाना न्ह्याथासं वांछ्वयेगु बानीयात हिलेगु हे थःपिनिगु मू आज्जु खः धयादिसें सकसितं ब्वति कायेत इनाप यानादिगु दु  ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.