नेवाः आन्दोलनया नेतृत्व देय् दबुलिं याइगु

११३८ पोहेंलाथ्व सप्तमी/येँ

नेवाः देय् दबूया नायः नरेश ताम्रकारं आः नेवाः आन्दोलनयागु नेतृत्वया भाला देय् दबुलिं कायेगु धयादीगु दु ।

वइगु पोहेंलाथ्व नवमी (पुष १२) बुधबाःया नेवाः एकता दिवसया ज्याझ्वःया बारे जानकारी बीत येँय् जूगु पत्रकार सम्मेलनय् देय् दबूया नायः ताम्रकारं नेवाः स्वायत्त राज्य मंकाः संघर्ष समितिं न्यायेका वयाच्वंगु नेवाः एकता दिवस थुगुसी नेवाः देय् दबूपाखें हे यायेत्यनागु जानकारी बियादिल ।

लिपा लिपाया दिवस गुकथं न्यायेकेगु धइगु खँय् नायः ताम्रकारं थुगुसी संघर्ष समितिया क्वःजिना कथं देय् दबूपाखें दिवसया ग्वसाः ग्वयेत्यनागु धयादिल । देय्‌या लिपांगु राजनैतीक परिस्थितीं यानाः समितिइ समस्या वःगु स्वीकार यासें संघर्ष समिति दुनेया समस्या ज्यनीगु अवस्था मन्त धाःसा नेवाः आन्दोलन नेतृत्वया भाला देय् दबुलिं हे कयाः न्ह्याःवनेगु ताम्रकारं धयादिल ।

प्रतिनिधि सभा व प्रदेश सभा निर्वाचन क्वचायाः प्रदेशया नामाकरण, प्रादेशिक भाषा आदिया खँ वहसया विषय जुयाच्वंबलय् थुकी नेवाःत सचेत जुयाः ईया सदुपयोग यायेत छधी जुइमाःगु ताम्रकारया धापू खः ।

थुगुसी न्यायेकत्यंगु च्याक्वःगु नेवाः एकता दिवसया जानकारी ब्युसें नायः ताम्रकारं थुगुसी असनय् सभा यायेगु धयादिल ।

किपा : बुध्दशरण शाहि

सुथसिया ११ताः इलय् भुगोल पार्क न्हू सतकय् सकलें मुनाः झाँकि लिसेंया र्यालिं येँया थःने लागा चाःहिलेगु वय्‌कलं कनादिल । र्याली असनय् थ्यंकाः न्हिनसिया १ताः इलय् असनय् हे दिवसया सभा यायेगु जानकारी नं बियादिल ।

३ नम्बर प्रदेशयात नेपालमण्डल नां तयेमाःगु, सरकारी माध्यमया भाय् नेपालभाषा नं जुइमाःगु, शिक्षाय् नेपालभाषा शिक्षा नं दुथ्याकेमाःगु लिसेंया सः थ्वयेकाः थुगुसीया नेवाः एकता दिवस हनेत्यनागु देय् दबुलिं न्ह्यथंगु दु ।

लिसें थुगुसी येँया लिसें स्वनिगलं पिने नं थीथी थासय् उगु हे दिनय् नेवाः एकता दिवस हनेत्यंगु जानकारी ज्याझ्वलय् ब्यूगु खः । मेमेथाय् सामान्य रुपं दिवस न्यायेकेत्यंगु तर नवलपरासीया गैंडाकोटय् धाःसा तःधंगु हे ज्याझ्वः जुइगु नं धाःगु दु ।

ने.सं. ११३० पोहेंलाथ्व नवमीया दिनय् येँया दशरथ रंगशालाय् लखौं नेवाःतय् उपस्थितीइ नेवाः स्वायत्त राज्य घोषणा याःगु खः । उगु हे दिंया लुमंतिइ दँय्‌दसं पोहेंलाथ्व नवमीया दिंयात नेवाः एकता दिवस कथं हना वयाच्वंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.