fbpx

नेपालभाषाया संकिपा ‘जामनः गुभाजु’ -‘न्हापांगु एभरेष्ट इन्टरनेशनल नेपाली फिल्म अवार्ड २०१९’ य् 

रेखा शाक्य । झीगु सम्वाददाता

ने सं ११३९ बछला थ्वः तृतीया

नेपालभाषाया संकिपाः एभरेष्ट इन्टरटेन्टमेन्ट हंगकंगया ग्वसालय् आः वइगु जून महिनाया ३० तारिख कुन्हु हंगकंगय् जुइगु ‘न्हापांगु एभरेष्ट इन्टरनेशनल नेपाली फिल्म अवार्ड २०१९’ य् नेपालभाषाया संकिपा ‘जामनः गुभाजु’ नं सिरपाःया नितिं धेंधेंबल्लाय् दुथ्याःगु दु ।

“जनमानसय् किंवदन्तीया रुपय् बय्बय् जुयाच्वंगु विषय बस्तुइ संकिपा दयेकेगु धइगु तःधंगु जोखिमपूर्ण ज्या खःसांं न्हापांगु खुसिइ निर्देशनय् पलाः न्ह्याकाः चुनौतियात स्वीकार यानागु खः । संकिपातय्  १७ गू शताब्दीया जुजु प्रताप मल्ल व जनताया दथुइया सैद्धान्तिक पक्षत व  सहकर्मी कथं जामनः गुभाजुयात क्यनेगु तसक‌ं थाकूगु जक मखु उकियात न्ह्यब्वयेगु न‌ं चानचुनया खँ मखु ।

मल्लकालीन ईया राजनैतिक, सैद्धान्तिक, बाैद्धिकया लिसें धार्मिक बज्रयाननाप स्वापू दूगु खँ, एतिहासिक तान्त्रिकया नितान्त व्यक्तिगत खँ, राजनैतिक, संवैधानिक, प्राकृतिक समाजय् उगु इलय् जुयाच्वंगु कुरीति, विकृति (भारतया चटकें नेपाःया जनतायात झंगः ल्हाःसें चटक क्यनेगु)  ज्यायात जामनः गुभाजुपाखें निमूर्ल याःगु खँया लिसें गुभाजुपाखें राज्ययात व जनमानसयात वा मवःया दुखः जूगु इलय् जुजु प्रताप मल्लयात दिक्षा बियाः स्वयम्भुया शान्तिपुरय् नवनागःया ही‌ं च्वया तःगु सफू कायेका छ्वःगु,  गुगु निभालय् क्यनेवं वा वया सहकाल वःगु खँ आदि इत्यादि क्यनेगु कुतः जुल ।  थःगु तन्त्रविद्यां जनहीत याःगु खँ लिसें पुलांगु बस्तीया उगु हे कथंया भेषभुषाया नापं अन्य मेमेगु लु क्यनेगुया नितिं भी एफ एक्स कलर ग्रेडिंग थ्री डी एनिमेशन प्रविधियात छ्यला १७ गू शताब्दीया कथ‌ं क्यनेगु कुतः यानाः ।

फिल्मपाखें येँ देय्या नांजाःम्ह तान्त्रिक जामनः गुभाजु गज्याःम्ह व्यक्तित्व खः धयागु थौंया पुस्तायात कनेगुया लिसें नेपालय् वइगु संकटय् गुकथं छम्ह सिद्धहस्तम्हं तान्त्रिक थःगु विद्यां पूण्य ज्याय् छ्यलाः उगु संकटयात चिइकल धइगु खँ ऐतिहासिक जुया नं यक्वसिनं मसिउगु जुयाः थुकियात संकिपाःया माध्यमं थुइका बिइगु कुतः याना । सम्पूर्ण टिमया अथक प्रयासया लिच्वः हे खः थुकथं धेंधेंबल्ला कासाय् दुथ्यात । थ्व हे नं महत्वपूर्णगु खँ जुल । त्याइ मत्याइ धइगु थःगु थासय् जुल ।”

नेपालभाषा संकिपाः ख्यलय् संख्यात्मक जक मखु गुणात्मकता नं दयेमाः लिसें हथासं मखु ऐतिहासिक व लोकंह्वागु न्यनाखँय् संकिपा दयेकेबलय् उकिया ज्ञातापिं, विज्ञपिंके व अन्य सामग्री नं उलि हे महत्वपूण जुइ उकिं व सम्पूर्ण खँयात नाला अध्ययन यानाः जक थज्यागु संकिपा दयेकेमाःगु साय्मिया धापू दु ।

मुक्कं ४० गू शो क्यने ज्या जुइ धुंकूगु थुगु जामनः गुभाजु संकिपाः स्वयादिपिं सकल स्वकुमियात आपालं सुभाय् धाःसें स्वये ल्यंदनिपिं स्वकुमिया नितिं याकनं हे हाकनं शो क्यनेगु व्यवस्था जुयाच्वंगु जेस्सी पेन्नि इन्टरटेनमेन्ट व द वाइल्ड बुल प्रोडक्सनपाखें दयेकूगु थुगु संकिपाया निर्देशन रवि सायमिं  झीगु डटकमयात जानकारी बियादीगु दु ।

‘न्हापांगु एभरेष्ट इन्टरनेशनल नेपाली फिल्म अवार्ड २०१९’ य् आपालं थी थी भाषाया संकिपाया किपात दुथ्यागु दु । टप फाइभं टप थ्री तक लाकेत नं भोटिंग प्रणालीया व्यवसथा जूगु दु । जामनः गुभाजुयात भाेट यायेत type  EINFA space code no 28 A send to 35005 बियातःगु दु ।

मुक्कं २८ गू विधाय् सिरपाःया नितिं नां दुथ्याःगु दु । मुक्कं २५ गू विधाया खस नेपाली संकिपा अले स्वंगू विधाया आदिवासी जनजाति संकिपायात धेंधेंबल्लाखय् दुथ्याकातःगु दुसा थ्व विधाया दकल बांलाःगु संकिपाया नितिं सिरपाःया मनोनयनय् राई भाषाया ‘यारी’, तामाङ्ग भाषया ‘आप्लेङ्गा ला नाम्सो’, गुरुङ्ग भाषाया ‘खै ओ म्हिथेवा’‘म्ले क्यु’ नं दुथ्यानाच्वंगु दु ।

किपाः सामाजिक सञ्जाल पाखें

थ्व न्यागू संकिपाः मध्ये छगू संकिपायात हंगकंगय् जुइगु अवार्ड ज्याझ्वलय् ‘बेष्ट फिल्म इन इन्डिजिनस ल्यांग्वेज’या सिरपाः लःल्हाइगु जुइ ।
सिने कलाकार सुनिल थापाया कजिसुइ उगु क्वछिना कमिटीइ नांजाम्ह सिनेमाटोग्राफर गौरीशंकर धुँजु, नांजाःम्ह बरिष्ठ सिने पत्रकारलिसें बरिष्ठ संकिपा निर्देशक विजयरत्न तुलाधर असंबरे, नेपाल चलचित्र संघया नायः नांजाःम्ह संकिपा बञ्जाःमि प्रदीप उदय व नांजाःम्ह सिनेकःमि मनोज केसी दुजः कथं च्वनादीगु दु ।

नेपाःया संगीक्षा इन्टरटेन्टमेन्ट व एभरेष्ट फिल्म एकेदेमिया मंकाः ग्वसालय् हंगकंगय् जुइत्यंगु न्हापांगु एभरेष्ट इन्टरनेशनल नेपाली फिल्म अवार्ड ताःलाकेया नितिं ग्वसाः खलःपाखें हंगकंगय् गौरब राम ठकुरी, लोकराज लिम्बु, सञ्जु भट्ट व लिलेश्वरी खड्कापिं दूगु समिति नीस्वनातःगु दुसा नेपाःया व्यवस्थापन भाला संगीक्षा इन्टरटेन्टमेन्टया कजि मनोज केसीयात बियातःगु दु ।

3 thoughts on “नेपालभाषाया संकिपा ‘जामनः गुभाजु’ -‘न्हापांगु एभरेष्ट इन्टरनेशनल नेपाली फिल्म अवार्ड २०१९’ य् 

  • May 7, 2019 at 10:20 am
    Permalink

    Many many thanks to jhigu .com for awesome writing.

    Reply
    • May 7, 2019 at 2:31 pm
      Permalink

      लसकुस रवि सर ।

      Reply
  • May 9, 2019 at 8:43 am
    Permalink

    Is it possible to have a copy of the story itself?

    Reply

Leave a Reply

Your email address will not be published. Required fields are marked *