नेतापिं दक्वं कुर्सीजात्राया प्याखं हुयेत व्यस्त

 

राजधानी वने नू हजूर, सरकार हिलिगु दु जात्रा
झीगु भाग्ययात जुलय् पाइगु दु, झीपिनिम्ह नेतां
स्वःला शासन याइपिं सरकारं प्यदँया म्हगसः इना
सोझापिं जनतायात दुगुचित म्वःहायेकेथें याना ।

नेतापिं दक्वं कुर्सीजात्राया प्याखं हुयेत व्यस्त
बञ्जा दाजुकिजापिं जनताया हि त्वनेगुलि मस्त
कमिशन व घुसखोरीं देय् भ्वाभः जुल
दुनं दुनं ध्वगिये धुंकल पिने जक यचूगु खोल ।

नेतापिं दक्वं आशाकुति जुल मन्त्री पदया निंति
विकास निर्माणया ज्या दित, दुःख जनया निंति
ल्याय्म्ह ल्यासे दक्वस्वक्वं परदेशय् वन
लजगाः छगुं दःगु मखु, छु याइगु थःगु देय् च्वना ?

जुजु दुबले थम्हं थःत द्यः भाःपिल
बरु वं हे प्रजायात भक्त भाःपिल
द्यःवं थेंतु प्रजायात प्वाःजायेका स्वःछा नकल
झीम्ह द्यः ग्वाखने थ्यन, सुनां पूजा याइ ?

लोकतन्त्र–गणतन्त्र मतूगु जुल झी देय्यात
जङ्गबहादुर बुइकेमाल हाकनं थ्व देय्लय्
लोकतन्त्र–गणतन्त्र जुल मनोमानी तन्त्र
हये माल निरंकुश शासन, जपे यायेनू मन्त्र ।

 

(थाैंकन्हे लय्पाैपाखें ल्ह्ययागु)

Share this...
Share on Facebook
Facebook
Tweet about this on Twitter
Twitter

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.