नन्दिताया ‘नन्दिता गुनगुन’ एल्बम सार्वजनिक

११३८ दिल्ला गाः अष्टमी/यल

बाल साहित्य क्षेत्रया वरिष्ठ साहित्यकार गणेश अपारया छय् बाल गायिकाया  रुपय् ११ दँया नन्दिता वैद्यया एकल गिती एल्बम “नन्दिता गुनगुन” या विमोचन जुगु दु ।

किपाः शरण ज्यापू हरि

म्हिगः छगू ज्याझ्वःया दथुइ सांगितिक एल्बम “नन्दिता गुनगुन” या लिसें उगु एल्बमय् हे दुथ्यागु छपू म्ये ‘पुतलीको नाना’ या म्यूजिक भिडियो नं सार्वजनिक याःगु खः ।

वाङमय शताब्दि पुरुष संस्कृतिविद् डा.सत्यमोहन जोशीया लिसें नेपाल विद्युत प्राधीकरणया कार्यकारी निर्देशक कुलमान घिसिङ, प्रिमियर इन्टरनेशनल स्कूलया संस्थापक निर्देशक पवित्रा लिम्बु, म्यूजिक नेपालया प्रवन्ध निर्देशक सन्तोष शर्मा, नृत्य निर्देशक संघ नेपालया केन्द्रीय अध्यक्ष भुवनदास श्रेष्ठ, नृत्य निर्देशकया नापं म्यूजिक भिडियो निर्देशक प्रदीपमान श्रेष्ठ, नन्दिताया अबुजु पिता नन्दनराज वैद्य व मां रीता नेमकुल वैद्यं संयुक्त रुपं एल्वमया विमोचन याःगु खः ।

किपाः शरण ज्यापू हरि

उगु हे ज्याझ्वलय् संस्कृतिविद् सत्यमोहन जोशीं अभिभावकपिन्सं थःमस्तय्त थःगु इच्छायात करं क्यंकेगु ज्या याये मज्यूगु धाःसें मस्तय्त थःगु चाहनायात पूवंकेत स्वतन्त्र त्वता बिलधाःसा थःके दुगु चाहना व प्रतिभा प्रष्फुटन स्वतस्फूर्त रुपं हे जू वनीगु धापू प्वंकादिल ।

अथेहे प्रिमियर इन्टरनेशनल स्कूलया संस्थापक निर्देशक पवित्रा लिम्बुं कलाकारपिन्सं सकरात्मकया लिसें नकरात्मक प्रतिक्रियायात नं नाला कायेमाःगु बिचाः प्वंकादिल ।

लिसें, म्यूजिक नेपाल प्रा.लि.या प्रवन्ध निर्देशक सन्तोष शर्मां विकसित प्रविधीया कारणं कला व कलाकारया क्षेत्र नं चकना वंगु बिचाः प्वंकादिसें थुकियात सही सदुपयोग यायेमाःगु खँय् बः बियादिल ।

किपाः शरण ज्यापू हरि

विमोचित एल्वमय् “नन्दिता गुनगुन” स न्यापू म्ये मचाम्ये दुथ्याना च्वंगु दु । एल्वमया म्येया रचनाकार गणेशराज वैद्य ‘अपार’, चतुर्भुज केवरत, गुरुदेव कामत, उत्तम थापा मगर, डि.पि. खनालपिं खः धाःसा संगीत गुरुदेव कामत व उत्तम थापा मगरयागु खः ।

बुखँ विराजकाजी राजाेपाध्याय

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.