धिमे धेंधेंबल्ला कासाय् श्री कंकेश्वरी दाफा खलः समाज न्हाप

झीगु सम्वाददाता ।

ने सं ११३८ पोहेलागा त्रयोदशी ।

न्हापांगु येँ महानगरव्यापी मेयर्स ट्रफि चिग्वः धिमे धेंधेंबल्लाः पोहेंलागाः द्वादशी कुन्हु येँया इटुम्बहालय् क्वचाःगु दु ।

येँ महानगर दुनेया ३२ वडाया ६३ ज्यापु त्वाः खलः मध्ये मुक्कं १७ गू खलःया ब्वति दूगु थूगु धेंधेंबल्ला कासाय् श्री कंकेश्वरी दाफा खलः समाज, यतखा न्हाप, ॐबहाः त्वाः खलः ल्यू व धिमे गुथि खलः परिवार, बिज्यापू त्वाः लियांल्यू लाःगु खः । न्हाप लाःगु पुचःयात छगूलख, ल्यू लाःगु पुचःयात न्यय्द्वः व लियांल्यू लाःगु पुचःयात नीन्याद्वःलिसें ट्रफी, मेडल व दसिपौ लःल्हाय्गु ज्या जूगु खः ।

किपाः तेज महर्जन

भाषा कला तजिलजिया संरक्षण व संर्बद्धन यायेगु आज्जु ज्वना ज्यापू जातिया मस्त व ल्याय्म्हतय्त थौंकन्ह धिमेबाजा, बाँसुरी, प्याखँ हुलेगु, धुँन्याः चाहुकेगु आदि इत्यादी स्यना च्वंगु दु । थःगु जातिया धरोहर व संस्कारयात म्वाका तयेगु तातुना ज्वना सांस्कृतिक व सामाजिक लागाय् थःगु त्वालं मस्तय्त न्ह्यःने थनेगु नं यानाच्वंगु दु । थ्व मात्र जातिय् धरोहर धकाः लिकुंका तयेगु जक मखसें थुकियात विश्वन्यकं प्रचार प्रसार यानाः यंकेमाः धैगु खँ यात वा चायेका थौं कन्हे ज्यापू जाति तसकं सक्रिय रुपं न्ह्यानाच्वंगु दु ।

किपाः शरण डंगोल

उकिया हे लिच्वः कथं एतिहासिक बहाः इतुंबहालय् वंगु ने सं ११३८ पोहेलागा द्वादशी कुन्हु किलाघः संस्कृति पुचःया ग्वसालय् न्हापांगु येँ महानगरव्यापी मेर्यस ट्रफि चिग्वः धिमे धेंधें बल्ला कासा तःजिक न्ह्यात ।

उगु ज्याझ्वलय् मू पाहाँ कथं झायादिम्ह येँया मेयर विद्या सुन्दरपाखें त्वाः देवाय् मत च्याका उले यानादीगु खः । धेंधें बल्लाकासाय् ब्वति कयाच्वंपिं जक मखु, त्याकाच्वंपिं जक नं मखु थूगु सकतां ज्या तालाकेत ग्वसाः ग्वयादिपिं नं बधाईया पात्र जुइ धकाः मनोबल सकसितं प्वंकादिसें थज्यागु ज्याय् थः नं प्रत्यक्ष न्ह्यःने वयेखंगुलि गौरान्वित जुयागु खँ मेयर शाक्यजुं धयादिल । थ्व केवल ज्यापू जातिया जक धरोहर मखसें सिंगो नेपाःया धरोहर जूगुलिं थुकियात ल्यंकातयेगु जिम्मेवारी नं झी सकसिगु खः धयादिल । गबले गबले देशय् छुं जात्रा पात्रा जुइ अन प्रतिनिधित्व यायेकथं ज्यापू बाजं नं वयेमाःगु कारणं नं थ्व ज्यापू जातिया जक धरोहर धाये मजिउगु व थुकियात ज्यापू जातिं प्रतिनिधित्व यानाच्वंगु जक धकाः थुइकेमाः धयादिल । उकिं थुकियात राष्ट्रिय संस्कृति व राष्ट्रिय सम्पदाया रुपय् संरक्षण व संर्बद्धनय् याये माःगु थौंया आवश्यकता जुइधुंकूगु व थुकिइ झी सकसिगु योगदान अपरिहार्य जूगु खँ यात कुलादील ।

किपाः शरण डंगोल

येँया उपमेयर हरिप्रभा खड्गी श्रेष्ठजुं मन्तब्य तयेगु झ्वलय् नेपाःयात हलिमय् म्हसिकेगु धैगु हे झीगु कला सम्पदा नं खः । थ्व हे संस्कार व संस्कृतियात दुने लाःगु बाजागाजाया नं थाय् महत्वपूर्ण जूगुलिं थुकियात नं संरक्षण यायेगु अति आवश्यक हे खः । आः थौंया थुगु इलय् स्थानीयस सरकार वयेधुंकुगुलिं छगू स्थीर सरकारया व्यवस्था जुइगु हुनिं यानाः झीसं झीगु भाषा, कला, संस्कृति व संस्कारय् दुथ्यागु हरेक सम्पदायात बचेयायेत नेवाः भावनाया लिसें त्याजिगु आजुया लँपु क्वछिना न्ह्यायेत अपुइगु जुल । थ्व हे आज्जुयात पूवंकेत झी सकलें छप्पं छधी जुया वनेगु ई वयेधुंकल धयादील ।

येँ महानगरपालिकां थज्यागु सम्पदायात धकाः अलग बजेट तकं फ्यायेगु बिचाः याना स्वरुप तयार याना तःगु दुसा मुक्कं थ्व ज्या पदय् च्वंपिनिगु जक मखसें झी धैपिं सकसिगु जिम्मेवारी दुने लाःगु खः धकाः सकसितं सचेत व जिम्मेदार जुयादीइत इनाप यानादिल ।

किलाघः सांस्कृतिक पुचःया नायः भाजु सानुकाजी महर्जनजुं लसकुस यानादीगु खः ।

 

 

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.