धर्मादित्य धर्माचार्यया बुन्हिया लसताय् स्वक्वःगु मातृभाषा पत्रकारिता दिवसया हन

११३८ बछलाथ्व पुन्हि /येँ

नेपाल भाषाया पत्रकारिता शुरु जूगु ९३ दँ थ्यंगु लसताय् म्हिगः आइतबार स्वक्वःगु मातृभाषा पत्रकारिता दिवस हन । नेवाः पत्रकार राष्ट्रिय दबू केन्द्रीय समितिं यल कचाःया व्यवस्थापनय् उकथंया ज्याझ्वःया ग्वसाः ग्वःगु खः ।

नेपाल संवत् १०४५ अर्थात विसं १९८२ स बुद्धजयन्तीया दिनस भारतया कलकत्तां धर्मादित्य धर्माचार्यले (जगतमान वैद्य) बुद्ध धर्म व नेपाल भाषा नांया पत्रिका प्रकाशन याये धुंकाः नेपाल भाषाया पत्रकारिताया शुरुआत जूगु खः । वय्कःया हे सच्छि व झि‌ंन्हय्दँ बुन्हिया लसताय् मातृभाषा पत्रकारिता दिवसया रूपय् वंगु ३ दँ न्ह्यःनिसें उगु दिंयात हनावयाच्वंगु खः ।

थ्व हे पत्रिका सम्भवतः गैरनेपाली भाषाय् पिहाँवःगु न्हापांगु पत्रिका जूगु खँ आः तकया अध्ययनं क्यंगुलिं मातृभाषा पत्रकारिता दिवस हना वयाच्वनागु नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनजुं धयादीगु दु ।

अथेहे  यलया पुच्वःय् च्वंगु धर्मादित्य धर्माचार्य (जगतमान वैध) या सालिकय् नेपालभाषा ख्यःया भाषाप्रेमी व साहित्यकार कलाकार व पत्रकारपिन्सं वय्कःया योगदानयात लुमंकाः किपातय् स्वांमालं क्वखाय्काः वय्कःया बुन्हि हंगु खः ।

थुगु हे अवसरय् अन झायादिम्ह शताव्दी पुरुष डा. सत्यमोहन जोशीया लिसें विशिष्ट व्यक्तित्वपिन्सं मातृभाषा दिवसया आवश्यकता व महत्वया बारेमा नुगः खँ तयादीगु खः ।

लिसें मां भाय् पुचः, यलया ग्वसालय् नं धर्मादित्य धर्माचार्यया ११७ क्वःगु बुदिं यलया पूच्वय् हंगु दु । पुचःया नायः हिरारत्न शाक्यया नायःसुइ न्ह्यागु उगु ज्याझ्वलय् डा. पुष्प रत्न राजकर्णिकार, नातिकाजी महर्जन, प्रकाश शाक्य, राजेन्द्र रञ्जित, काजीमान महर्जन, जुलुम चित्रकार, नेपालभाषा मंका खलः यलया नायः ऋषि प्रसाद श्रेष्ठया लिसें अन्य व्यक्तित्वपिसं झ्वाताय् स्वां देछाःगु खः ।

किपाः राजेन्द्र रंजित

थुगु पुचलं तःदँ न्ह्यवःनिसें धर्मादित्य धर्माचार्य बुदिं हना वयाच्वंगु खःसा १०१ क्वःगु बुदिं निसें नेपालभाषा ख्यःया साहित्यकार, भाषाह्यःमिपिन्त सिरपाः नं देछाना वयाच्वंगु खः । थुगुसिइया सिरपाः छुं ई लिपा मेगु छगू ज्याझ्वः यासे लःल्हायेगु जानकारी संस्थाया छ्याञ्जे महर्जनं कनादिल ।

किपाः राजेन्द्र रंजित

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: