fbpx

द्वाल्खाय् बुगदेउ जात्रा क्वचाल

रेखा शाक्य/ झीगु सम्वाददाता 

ने सं ११३९ चौला गाः नवमी

द्वाल्खाय् बुगदेउ जात्रा म्हिगः शनिबाः क्वचाल । म्हिगःया दिंनय् बुगदेउ अर्थात मछिन्द्रनाथया मूर्तियात डोकलुंङ्गा त्वालय् च्वंगु द्यःछेँय् बिज्याका विधिवत रुपं थुगु दँया बुगदेउ जात्राया समापन याःगुु खः ।

किपा रेखा शाक्य . डोकोलुङ्गा त्वालय् निर्माणधीन बुगदेउया द्यः छेँ ।

 

किपा रेखा शाक्य। टसिचा त्वालय् दिका तःगु बुगदेउया रथ ।

द्वाल्खाय् दँय्दसँ चौलाथ्व पारु कुन्हुनिसें चौलागाः अष्टमी तक जात्रा जुइगु खः । द्यःछेँय् च्वम्ह बुगद्यःयात पुन्हिकुन्हु दुरुं न्हवं याकुगु खः । अथेहे द्वतीया कुन्हु डोकोलुङ्गा त्वालं पिंङ्गल त्वालय् हयाः तयार यानाःतःगु रथय् विधिवत रुपं बिज्याकूगु खः । पिङ्गल त्वालं नक्छेँ, नक्छेँत्वालं कोछेँ, कोछेँ त्वालं टसिचात्वालय् रथयात थ्यंकुगुु खः ।

किपा रेखा शाक्य । टसिचा त्वालं च्वयेया स्वयम्भु स्तुपा प्रांगणय् यंकेत्यंगु झ्वलय् ।बुगदेउया जात्राया दकलय्् न्ह्यइपुगु जात्राया दिं कथं टसिचा त्वालं ६० डिग्रीया स्वाहानय् पाःचाय् थःत यंका च्वये त्वाःया स्वयम्भु स्तुपा लिक्क थ्यंकुगु खः । टसिचाया पाखाचाय् बुगदेउया रथ चुलुया धेचुगु खःसा उघ्रिमय् हे रथयात थंगु नं खः । थुकियात स्थानीयवासीं सामान्य रुपं जक काःगु दु ।

किपा रेखा शाक्य । स्वयम्भु स्तुपा प्रांगणय् यंकेत्यंगु झ्वलय् स्वाहानय् थत यंकेगु कुतलय् रथ ।

अथेहे षष्ठीकुन्हु हाकनं रथयात क्वहाँ बिज्याकाः ४५ डिग्रीया पाःचा क्वतहयाः दुङ्गल त्वाःया स्वयम्भु स्तुपा तक थ्यंकूगु खःसा कन्हे कुन्हु दुङ्गगत्वालं पिंङ्गल त्वालय् तक हे रथजात्रायाना हःगु खः ।

बुगदेउया जात्रा स्वयेत येँ, यल, ख्वप, किपूया लिसें अन्य थाय्थासं तकं भक्तजन व धर्मालम्बीपि द्वाल्खा थ्यंकूगु खः । अनथ्यंपिं भक्तजनपिन्सं नं रथयात साःलेगु ज्या याःगु खः । यलया बुद्ध धर्म संघ मिसा पुचःपाखें बहनी भजन याःगु खःसा कन्हे कुन्हु सुथय् धलंदना पुजा तकं याःगु खः ।

येँ व यलय् बुँगद्यः व जनबहाः द्यःया रथजात्रा जुइगु सामान्य कथं खःसां द्वाल्खाया चिबालागु लँपुइ थज्यागु जात्रा जुइगुयात महत्वपूर्ण रुपं स्वयाच्वंगु दु ।

 

किपा रेखा शाक्य

किपा रेखा शाक्य
किपा रेखा शाक्य
किपा रेखा शाक्य । दाेलखाया २ वडाया वडा अध्यक्ष विराजमान श्रेष्ठ रथयात दिशानिर्देशया नितिं हःपा बिइगु झ्वलय् ।

 

किपा रेखा शाक्य

Leave a Reply

Your email address will not be published. Required fields are marked *