fbpx

देगः मदुम्ह द्यः महालक्ष्मीया जात्रा नालाय् (१२ पाः किपाः)

रेखा शाक्य । झीगु सम्वाददाता

ने सं ११३९ बछला थ्वः पंचमी । नाला

यल देशय् श्री करुणामय्या रथजात्रा म्हिगः शुरु जुयाः यलय्  जात्रामय् लकस जुयाच्व‌ंगु  इलय् काभ्रेया प्राचीन न्हय्गु बस्तीत मध्यय् पुलांगु व व्यवस्थित बस्ती उग्रचण्डी नाला भगवतीइया प्रांगण् म्हिगः महालक्ष्मी द्यःया लिसें महाद्यः व नारांद्यःया सिन्हजात्रा जुल ।

किपा रेखा शाक्य

थःगु देगः तकं मदुम्ह पालाया छेँय् विराजमान जुयाः दँय् जात्राया इलय् लक्ष्मीपाटीइ विराजमान जुइम्ह द्यः खःसां वसपोलया अपार अनुकम्पाया गुणयात लुमंकाः स्वम्ह द्यःपिनिगु जात्रा खःसां जनमानसं महालक्ष्मी द्यःया जात्रा कथं सम्बोधन यायेगु याः । महालक्ष्मी द्यःयागु जात्रा हरेक दँय् बैशाख शुक्ल पक्ष दितीयानिसें सुरु जुयाः पंचमी तक मुक्कं प्यन्हु तसकं झः झः धायेक हनेगु चलन दु ।

किपा रेखा शाक्य

म्हिगः चौथीया दिं कुन्हु मू जात्रा कथं सिन्हजात्राया रुपय् भब्य रुपं स्थानीयवासीया सहभागिताय् तसकं झः झः धायेक हंगु खः । सोह्रखुट्टेपाटीइ वा लक्ष्मीपाटीइ जात्राया नितिं विराजमान याकाः तःम्ह महालक्ष्मी द्यः नितं जाःगु देगःरुपी खतय् दुने बिज्याकाः खण्ड खण्ड कथं दयेकाः खःयात ब्वहलय् तयाः ल्ह्वना लागनत्वालं वलाछेँ त्वाःः, दुपिचात्वाः, ईपात्वाः, गुशं त्वाः जुया हाकनं लागन त्वालय् हे द्यःयात लित हःगु खः ।

किपा रेखा शाक्य

जात्राया झ्वलय् हरेक त्वालय् च्वंगु दबलिइ थ्यनेवं ह्याउँगु म्हासुगु सिन्हंलं थवंथवय् सिन्हजात्रा कथं इलाः तसकं हर्षोल्लासया लकसय् बाजंया तालय् प्याखं हुला न्ह्यइपुकुगु खः। अथेह हे द्यःया आगमनया लसताय् छेँ छेँया झ्यालं व लँपुइ स्वयाच्वंपिन्सं चकलेट नं ह्वःगु खः ।

किपा रेखा शाक्य

म्हिगःया दिनय् नालावासीपिनी थौं नखत्या ब्वनेकथं थःथिति, इष्टमित्र सःतीगु चलन दु । अथहे हे नालाया महालक्ष्मी जात्रा स्वयेत थाय्थासं मनूत जात्रा स्वः वःगु खः ।

जात्राया दकलय् न्हापांगु दिं कथं दुतिया बलय् महालक्ष्मी द्यःयात लक्ष्मी द्यःया छेँ पितहयाः इपा त्वालय् च्वंगु लक्ष्मी पाटीइ ब्वःगु खःसा व हे न्हि कुन्हु महालक्ष्मी द्यःयात चिधंगु खतय् तयाः इपात्वालं लागन त्वाः जुयाः पोडे त्वालं दुम्ब खुसि (महादेव खुसि) यंका अन पुजाआजा यानाः लिहाँ वया लागन त्वालय् भगवती देगलय् सिथय् सोह्रखुट्टे पाटीइ हे विराजमान याकूगु खः । बैशाख शुक्ल पक्ष तृतीया कुन्हु महाद्यः व पार्वतीया इहिपा जुगु दिं जुगुलिं लागन त्वाः भगवती देगलय् नाप च्वंगु दबली महालक्ष्मीयालिसें मिसामस्तय्त इही नं याःगु खः ।

किपा रेखा शाक्य

आः थौं जात्राया लिपांगु दि कथं चिधंगु खः महाद्यः व नारांद्यःया खःयात देश चाहुका भगवतीया प्रांगणय् खतय् हे विराजमान जुयाच्वम्ह महालक्ष्मीया खःयात चिधंगु खःयात ल्वाकेगु अर्थात थिइकेगु याइ । अथे धयागु छगू खतं मेगु खःयात थिकेगु खः । थुकथं थुगु दँया जात्रा विधिवत रुपं सम्पन्न जुइ । महालक्ष्मीया तधंगु खः थ्यंमथ्यं स्वीनिम्हसिनं कुबिइगु याइ धाःसा मेगु चिधंग निगू  खः मस्तय्सं क्वबिइगु खः ।

किपा रेखा शाक्य

परापूर्वकालय् नाला देय्यात दुःख बियाच्वंम्ह हिदुम्ब राक्षसयात मिसामचाया रुपय् बाय् च्वंवम्ह स्वयम महालक्ष्मीं आहारा जूवनेगु झ्वलय् थःगु खँया जालय् तक्यंकाः दुम्ब खुसिइ सिथय् च्वंगु तुंथिइ क्वफाना अन्त याःगुया लसताय् सकल नालावासीयात जीवनदान ब्यूम्ह आराध्यदेवीया रुपं भाःपियाः थुकथं हर्षोल्लास कथं जात्रा याना वयाच्वंगु नाला उग्रचण्डी भगवतीया पुजारी सिद्धि बहादुर कर्माचार्यजुं थ्व पंक्तिकारयात कनादीगु खः ।

किपा रेखा शाक्य
किपा रेखा शाक्य

किपा रेखा शाक्य

 

किपा रेखा शाक्य

 

किपा रेखा शाक्य

Leave a Reply

Your email address will not be published. Required fields are marked *