दकलय् न्हापांगु खुसि नेपालभाषा मचा सिरपाः ११३८ – २० म्ह मस्तय्त लःल्हात

ने सं ११३८ कौलागा द्वादशी, येँ ।

रेखा शाक्य

” मस्तय्त नेपालभाषाप्रति नुगः क्वसायेकेगु लकस ब्वलंकेमाः । थःगु मां भाय्यात मतिना याये सयेकेया नितिं मांअबुपिन्सं मस्तय्त नेवाः भाय् स्यनेगु कुतः यायेमाः । स्वय्म  थःपिन्सं नं मस्तय्त नेवाः भाय् ल्हाना क्यनेमाः ।”  धइगु ग्यसुलाःगु सन्देश ज्वनाः न्ह्याकूगु अभियान कथं म्हिगः दकलय् न्हापांगु खुसि नेपालभाषा मचा सिरपाः ११३८ छगू ज्याझ्वःया दथुइ लःल्हात।

किपाः रेखा शाक्य

 

ग्लोबल नेपाः नेटवर्क व नेवाः वस्ती नेवाः स्कूल अभियानया ग्वसालय् थुकथंया अभियानया ज्या न्ह्याःगु खः । थुकिया नितिं थी थी ब्वनेकुथिइ नेपालभाषा विषय तया ब्वंकेगु यानाच्वंगु ब्वनेकुथिया मस्तय्त ब्वति कायेगु ब्यवस्था याःगु खः । वंगु शनिबाः नेपाः ब्या‌ंक्वेटय् जूगु मुक्कं ३२ गू ब्वनेकुथिया ९५ म्ह मस्तय्सं  धेंधेंबल्ला कासाय् ब्वति काःगु खः। गुकिइ नर्सरीनिसें न्यागू तगिंमय् ब्वनाच्वंपिं मस्त दुथ्याः ।

उगु धेंधेंबल्लाखय् मस्तय्त नेपालभाषां खँ ल्हायेगु, न्ह्यसःया लिसः बिइकेगु, नेपालभाषां च्वयेगु व नेपालभाषां ब्वंकेगुया लिधँसाय् ल्यःज्या कजिपिं प्रतिसरा साय्मि, पवित्र कसाः, जिएम श्रेष्ठ, रेखा शाक्य, उदेन न्हूसाय्मि व दर्शनवीर शाक्यजुपिन्सं मस्तय्सं लिसः बिउगु व च्वःगुया लिधँसाय् ल्याः बियाः २० म्ह मस्तय्त ल्यःगु खः ।

नेवाः स्कुल नेवाः बस्तिया नायः दिपक तुलाधरया नायःसुइ न्ह्याःगु उगु ज्याझ्वलय् अप्वः ल्याः हयाः त्याःपिं २० म्ह थीथी स्कूलया मस्ततय्त मू पाहाँ भाजु जनकवि दुर्गालाल श्रेष्ठ, ग्लोबल नेपाः नेटवर्कया कजि व मचासिरपाया आर्थिक कजि सुनिलकुमार शाक्यजुया लिसें अन्य दातापिन्सं त्याःपिं मस्तय्त दसिपौ व नगद सिरपा लःल्हानादिगुु खः । अथेहे थुथु सिरपाः नीस्वनेगु नितिं आर्थिक गुहालि यानादिइपिं दातापिं सकसितं नं शाक्यजुं दसिपौ लःल्हानादिगु खः ।

किपाः रेखा शाक्य

म्हिगः जूगुु ज्याझ्वलय् पाहाँ कथं नेवाः न्ह्यलुवाः मल्ल के. सुन्दर, नेवाः देय् दबूया नायः नरेश ताम्राकार, नेपालभाषा साहित्यिक लयपाैया सम्पादक व प्रकाशक नरेशबीर शाक्यलिसें अन्य थीथी ब्यक्तिपिं झायादिगु खः ।

किपाः रेखा शाक्य

ज्याझ्वलय् थीथी नेपालभाषा ख्यःया ब्यक्तिपिन्सं थःथःगु नुगः खँ तयादिगु खः । ज्याझ्वलय् मस्तय्सं सांस्कृतिक ज्याझ्वः नं न्ह्यब्वःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.